Amit Shah BIMSTEC Meeting | ఏ దేశంపైనా దాడి చేయడం మా సిద్ధాంతం కాదు

• బిమ్‌స్టెక్ వేదికగా అమిత్ షా
• 'గోల్డెన్ ట్రయాంగిల్' కాదు 'డెత్ ట్రయాంగిల్' అంటూ హెచ్చరిక

Amit Shah BIMSTEC Meeting | భారతదేశం ఎప్పుడూ ఏ దేశంపై దాడి చేయాలని గానీ, ఎవరిపైనా ఆధిపత్యాన్ని చెలాయించాలని గానీ భావించదని కేంద్ర హోంమంత్రి అమిత్ షా స్పష్టం చేశారు. ప్రతి వివాదాన్ని శాంతియుత చర్చలతో, దేశాల సార్వభౌమాధికారాన్ని గౌరవిస్తూ పరిష్కరించుకోవడమే మన విధానమని తేల్చిచెప్పారు. మంగళవారం జరిగిన ప్రతిష్టాత్మక 'బిమ్‌స్టెక్' (BIMSTEC) దేశాల హోంమంత్రులు, హోం సెక్రటరీల స్థాయి తొలి సమావేశంలో ఆయన పాల్గొని ప్రసంగించారు.

సరిహద్దులు దాటి విస్తరిస్తున్న అంతర్జాతీయ ఉగ్రవాదం, వ్యవస్థీకృత నేరాలు, మాదకద్రవ్యాల అక్రమ రవాణాను అడ్డుకోవడానికి బంగాళాఖాత ప్రాంత దేశాలన్నీ ఐక్యంగా పనిచేయాలని ఆయన గట్టిగా పిలుపునిచ్చారు.

టెక్నాలజీతో నేరాల సరికొత్త ముప్పు

నేరగాళ్ల ఆలోచనా విధానం వేగంగా మారుతోందని హోంమంత్రి ఆందోళన వ్యక్తం చేశారు. "క్రిమినల్ నెట్‌వర్క్‌లు ఇప్పుడు ఎన్‌క్రిప్టెడ్ కమ్యూనికేషన్, సోషల్ మీడియా, డ్రోన్లు, క్రిప్టోకరెన్సీ, డార్క్ వెబ్‌లను ఉపయోగించి కార్యకలాపాలు సాగిస్తున్నాయి. వీటిని నియంత్రించాలంటే దేశాల మధ్య రియల్-టైమ్ ఇంటెలిజెన్స్ షేరింగ్ చాలా ముఖ్యం. ఏ సభ్య దేశం కూడా ఇలాంటి నేరగాళ్లకు ఆశ్రయం ఇవ్వకూడదు. నేరస్థుల అప్పగింత (ఎక్స్‌ట్రాడిషన్) ప్రక్రియలో ఒకరికొకరు పూర్తిగా సహకరించుకోవాలి" అని షా స్పష్టం చేశారు.

అది గోల్డెన్ ట్రయాంగిల్ కాదు.. 'డెత్ ట్రయాంగిల్'

డ్రగ్స్ మాఫియాపై విరుచుకుపడుతూ అమిత్ షా కీలక వ్యాఖ్యలు చేశారు. "నార్కో వాణిజ్యంలో బంగారం లాంటిది ఏదీ లేదు. అందుకే నేను అంతర్జాతీయంగా పిలిచే 'గోల్డెన్ ట్రయాంగిల్'ను 'డెత్ ట్రయాంగిల్' (మరణాల త్రికోణం) అని పిలవడానికే ఇష్టపడతాను. డ్రగ్స్ వ్యాపారం అనేది మన యువత భవిష్యత్తుపై జరుగుతున్న ప్రత్యక్ష దాడి. ఒకే ఒక్క దేశం ప్రయత్నిస్తే ఇది ఆగదు. ప్రాంతీయ దేశాలన్నీ కలిస్తేనే దీన్ని అడ్డుకోగలం. ముఖ్యంగా సింథటిక్ డ్రగ్స్ తయారీకి వాడే రసాయనాల దారిమళ్లింపును అరికట్టాలి" అని పేర్కొన్నారు.

సైబర్ బానిసత్వంపై ఉమ్మడి పోరు.. బిమ్‌స్టెక్ డేటాబేస్

మానవ అక్రమ రవాణా, యువతను మోసగించి ఇతర దేశాల్లో ఐటీ నేరాలకు బానిసలుగా మార్చే 'సైబర్ స్లేవరీ' (Cyber Slavery) తీవ్రమైన ముప్పుగా పరిణమిస్తున్నాయని షా హెచ్చరించారు. దీనికోసం బిమ్‌స్టెక్ పరిధిలో ఒక కామన్ ప్రొటోకాల్‌ను రూపొందించాలని పిలుపునిచ్చారు. ఉగ్రవాదం, సరిహద్దు నేరాల సమాచారాన్ని పరస్పరం పంచుకునేందుకు 'బిమ్‌స్టెక్ నేషనల్ సెక్యూరిటీ డేటాబేస్ అండ్ ఇన్ఫర్మేషన్ షేరింగ్ సెంటర్' ఏర్పాటు చేయాలని ప్రతిపాదించారు.

కాగా, బంగాళాఖాత ప్రాంతంలో పరస్పర ఆర్థిక, సాంకేతిక, భద్రతా సహకారాన్ని పెంపొందించేందుకు ఏర్పాటైన 'బిమ్‌స్టెక్' కూటమిలో భారతదేశంతో పాటు బంగ్లాదేశ్, భూటాన్, మయన్మార్, నేపాల్, శ్రీలంక, థాయ్‌లాండ్ దేశాలు సభ్యులుగా ఉన్నాయి.