Early Monsoon | వారాంతంలో అండ‌మాన్‌కు నైరుతి రుతుప‌వ‌నాలు: ఐఎండీ

Early Monsoon | త్రినేత్ర‌.న్యూస్‌: ఈ ఏడాది దేశంలో నైరుతి రుతుపవనాలు ముందుగానే ప్రవేశించే (Early Monsoon) అవకాశం ఉంద‌ని భారత వాతావరణ కేంద్రం (IMD) తెలిపింది. ప్ర‌స్తుతం రుతుప‌వ‌నాలకు (Southwest Monsoon) వాతావ‌ర‌ణం పూర్తి అనుకూలంగా ఉంద‌ని, ఈ వారాంతానికి ద‌క్షిణ బంగాళాఖాతం, అండమాన్ స‌ముద్రం, అండ‌మాన్‌ నికోబార్ దీవుల‌ను అవి తాకుతాయ‌ని వెల్ల‌డించింది. నైరుతి బంగాళాఖాతంలో ఏర్పడిన అల్పపీడనం మరింత బలపడి.. చక్రవాత గాలుల ప్రభావం సముద్ర మట్టానికి 4.5 కిలోమీటర్ల ఎత్తువరకు విస్తరించి ఉందని తెలిపింది. ఇది రాబోయే 48 గంట‌ల్లో మ‌రింత బ‌ల‌ప‌డే అవ‌కాశం ఉంద‌ని పేర్కొంది.

సాధార‌ణంగా ప్ర‌తి ఏడాది మే 22 నాటికి రుతుప‌వ‌నాలు అండ‌మాన్‌ను తాకి, త‌ర్వాత భార‌త ప్ర‌ధాన భూభాగంపైకి విస్త‌రిస్తాయి. జూన్ 1 నాటికి అవి కేరళను తాకుతాయి. కానీ ఈసారి కాస్త ముందుగానే రుతుప‌వ‌నాలు రానున్నాయ‌ని ఐఎండీ అధికారులు తెలిపారు. 5 నుంచి 6 రోజులు ముందుగానే రుతుప‌వ‌నాలు వ‌స్తున్నాయ‌ని వెల్ల‌డించారు. గ‌తేడాది మే 13న అండ‌మాన్ తీరాన్ని తాకాయ‌ని చెప్పారు.