New Jobs | హెల్త్‌కేర్‌, ఫార్మాస్యూటిక‌ల్స్‌లో ఉద్యోగాల వెళ్లువ‌.. నాలుగేండ్ల‌లో కొత్త‌గా..

New Jobs | త్రినేత్ర‌.న్యూస్‌: ఓవైపు ఐటీ రంగంలో ల‌క్షల్లో ఉద్యోగాల కోత ప‌డుతున్న‌ది. ఎప్పుడు ఎవ‌రిని తీసేస్తారో తెలియ‌ని ప‌రిస్థితి. మ‌రోవైపు హెల్త్‌కేర్ (Healthcare), ఫార్మాస్యూటికల్స్‌ రంగాల్లో (Pharma Sector) క్ర‌మంగా మాన‌వ వ‌న‌రుల‌కు డిమాండ్ పెరుగుతున్న‌ది. దీంతో ఈ రంగంలో యువ‌త‌కు పెద్ద ఎత్తున ఉపాధి అవకాశాలు (New Jobs) రానున్నాయి. దేశంలో 2030 నాటికి కొత్తగా 20 నుంచి 25 లక్షల ఉద్యోగాలు రానున్నాయ‌ని ఓ అధ్య‌యం తెలిపింది. అదేవిధంగా 30 నుంచి 35 శాతం సిబ్బందికి కొత్త నైపుణ్యాలపై శిక్షణ అవసరం పడుతుందని సోమ‌వారం విడుద‌లైన అడెకో నివేదిక వెల్ల‌డించింది.

హెల్త్‌కేర్, ఫార్మాస్యూటికల్స్‌ రంగాలు సామర్థ్య ఆధారిత వృద్ధి దశలోకి అడుగుపెట్టాయని పేర్కొంది. ఇందులో భాగంగా ద‌వాఖాన‌లు, ఆయుష్, హోమ్‌కేర్, వృద్ధుల సంరక్షణ, ఫార్మా, లైఫ్‌ సైన్సెస్, డయాగ్నొస్టిక్స్, టెలి మెడిసిన్, క్లినికల్‌ పరిశోధన, ప్రజారోగ్యం వంటి విభాగాల్లో ప్రత్యేక నైపుణ్యాలు, టెక్నాలజీ వినియోగం పెరుగుతున్నట్టు వెల్లడించింది. దేశ ఆర్థిక వ్యవస్థలో విస్తరిస్తున్న ఈ రంగం వాటాపై వృద్ధి ఆధార‌ప‌డి ఉంటుంద‌ని తెలిపింది. 2022లో జీడీపీలో 3.3 శాతంగా ఉన్న హెల్త్‌కేర్, ఫార్మాస్యూటికల్స్‌ వాటా 2030 నాటికి 5 శాతానికి చేరుతుంద‌ని నివేదిక అంచ‌నావేసింది. ముఖ్యంగా క్లినికల్‌ పరిశోధనలు, డిజిటల్‌ హెల్త్‌కు ప్రాధాన్యం అధిక‌మ‌వ‌డంతోపాటు ఔషధాల అభివృద్ధి, తయారీ కార్యకలాపాల అవుట్‌సోర్సింగ్‌కు అంతర్జాతీయంగా ప్రాముఖ్యం పెర‌గ‌డం వంటివి వృద్ధికి తోడ్ప‌డుతాయ‌ని తెలిపింది.

ద్వితీయ‌, తృతీయ శ్రేణి నగరాల్లో..

ప్రస్తుతం ఈ రంగంలో బెంగళూరు, హైదరాబాద్, ముంబై, చెన్నై, ఢిల్లీ వంటి మెట్రో నగరాల్లోనే ఎక్కువగా ఉద్యోగాలు ఉన్నప్పటికీ.. భ‌విష్య‌త్‌లో పుణె, అహ్మదాబాద్, కోయంబత్తూరు వంటి ద్వితీయ‌, తృతీయ శ్రేణి నగరాల్లో కూడా అవకాశాలు విస్త‌రిస్తాయ‌ని వెల్ల‌డించింది. ఈ నగరాల్లో ద‌వాఖాన‌లు క్ర‌మంగా అధిక‌మ‌వుతుండ‌ట‌మే దీనికి కార‌ణ‌మ‌ని విశ్లేషించింది. ఇక డయాగ్నొస్టిక్స్, వ్యాధి నిరోధక ముందస్తు చెకప్‌లు, టెలిమెడిసిన్‌ విభాగాల్లో 20 నుంచి 25 శాతం మేర ఉపాధి అవకాశాలు పెరుగుతాయ‌ని తెలిపింది.

అలాగే, కాంప్లెక్స్‌ జనరిక్స్, బయోలాజిక్స్, స్పెషాలిటీ చికిత్సలకు ప్రాధాన్యం పెరుగుతుండడంతో.. అత్యాధునిక పరిశోధన, అభివృద్ధి (R & D), నియంత్రణ పరమైన విభాగాల్లోనూ ఉద్యోగాలకు 25 నుంచి 30 శాతం మేర డిమాండ్‌ పెరుగుతుందని అంచనా వేసింది. విదేశాల్లో కూడా భార‌తీయ నిపుణుల‌కు డిమాండ్ భారీగా పెరుగుతుంద‌ని వెల్ల‌డించింది. రానున్న 5 నుంచి ఏండు ఏండ్ల‌లో ఇది 25 నుంచి 30 శాతానికి పెరిగే అవకాశం ఉంద‌ని చెప్పింది. ముఖ్యంగా మ‌ధ్య ప్రాచ్యం, ప‌శ్చిమాసియా, యూకే, ఇత‌ర అభివృద్ధి చెందిన దేశాల్లో భార‌తీయ వృత్తి నిపుణుల‌కు డిమాండ్ ఉంటుంద‌ని అంచ‌నా వేసింది.