ED Freezes TMC Bank Accounts | తృణమూల్ కాంగ్రెస్‌కు ఈడీ బిగ్ షాక్.. రూ.440 కోట్ల ఖాతాలు ఫ్రీజ్, ఆ హెలికాప్టర్ కొనుగోళ్లే కొంపముంచాయా?

ED Freezes TMC Bank Accounts | త్రినేత్ర.న్యూస్ : పశ్చిమ బెంగాల్‌లో (West Bengal) ఇటీవల బీజేపీ చేతిలో అధికారం కోల్పోయిన తృణమూల్ కాంగ్రెస్ (TMC) పార్టీకి ఎన్‌ఫోర్స్‌మెంట్ డైరెక్టరేట్ (ED) కోలుకోలేని షాకిచ్చింది. మనీ లాండరింగ్ (Money laundering), నిధుల మళ్లింపు ఆరోపణలపై బుధవారం ఆ పార్టీకి చెందిన ఏకంగా రూ.440 కోట్ల బ్యాంకు డిపాజిట్లను ఫ్రీజ్ చేస్తూ సంచలన నిర్ణయం తీసుకుంది. దేశ చరిత్రలో ఒక ప్రధాన రాజకీయ పార్టీకి చెందిన అంతర్గత ఖాతాలను (Internal expenditure accounts) కేంద్ర దర్యాప్తు సంస్థ నేరుగా స్తంభింపజేయడం ఇదే తొలిసారి.

ఖాతాల ఫ్రీజింగ్ వెనుక అసలు కథ

మనీ లాండరింగ్ నిరోధక చట్టంలోని (PMLA) సెక్షన్ 17 (1-A) కింద ఈడీ బుధవారం ఈ చర్యలు చేపట్టింది. టీఎంసీకి చెందిన మూడు హెచ్‌డీఎఫ్‌సీ (HDFC) బ్యాంక్ అకౌంట్లలో ఉన్న రూ.440.42 కోట్లను స్తంభింపజేసినట్లు అధికారులు వెల్లడించారు. జూన్ నెలలో కోల్‌కతా సైబర్ క్రైమ్ పోలీసులు నమోదు చేసిన సైబర్ ఫ్రాడ్ ఎఫ్ఐఆర్ (FIR) ఆధారంగా ఈడీ రంగంలోకి దిగింది. కోల్‌కతాలో కేర్‌వెల్ ట్రావెల్స్ (Carewell Travels), ఒక ఎలక్టోరల్ ట్రస్ట్, చార్టర్డ్ అకౌంటెంట్ ఆఫీసులతో సహా ఐదు చోట్ల మంగళవారం సోదాలు నిర్వహించి కీలక డాక్యుమెంట్లు, ఎలక్ట్రానిక్ పరికరాలను సీజ్ చేసింది.

హెలికాప్టర్లు కొని.. అద్దె పేరుతో మళ్లింపు

ఈడీ ప్రాథమిక దర్యాప్తులో విస్తుపోయే నిజాలు వెలుగుచూశాయి. ఏప్రిల్ 2023 నుంచి జూన్ 2026 మధ్య కాలంలో టీఎంసీ ఖాతాల నుంచి సుమారు రూ.160 కోట్లు 'కేర్‌వెల్ ఏవియేషన్ ఇండియా ప్రైవేట్ లిమిటెడ్'కు (Carewell Aviation India Pvt. Ltd) మళ్లినట్లు అధికారులు గుర్తించారు. ఇందులో రూ.82.96 కోట్లను కొత్తగా ప్రారంభించిన మరో సంస్థకు బదిలీ చేసి, అందులో రూ.112 కోట్లతో 'ఎంబ్రేయర్ లెగసీ 600' (Embraer Legacy 600) బిజినెస్ జెట్, 'అగస్టా వెస్ట్‌ల్యాండ్ 109ఎస్పీ' (AgustaWestland 109SP) చాపర్‌ను కొనుగోలు చేశారు.

అయితే, పార్టీ ఫండ్స్‌తో ఈ ఎయిర్‌క్రాఫ్ట్‌లను కొనుగోలు చేసి వాటిని తిరిగి పార్టీ నాయకులకే అద్దెకు (Rented) ఇచ్చినట్లు రికార్డులు సృష్టించారు. అద్దె ఖర్చుల పేరుతో భారీగా నిధులను మళ్లించి అసలు లబ్ధిదారులెవరో బయటకు తెలియకుండా, లావాదేవీలను కప్పిపుచ్చే ప్రయత్నం చేశారని ఈడీ అనుమానిస్తోంది.

రెబల్ ఎమ్మెల్యేల ఫిర్యాదుతో మొదలైన చిక్కులు

పార్టీ ఫండ్స్ దుర్వినియోగం అవుతున్నాయంటూ టీఎంసీకి చెందిన కొందరు రెబల్ ఎమ్మెల్యేలు ఫిర్యాదు చేయడంతో పార్టీ అంతర్గత వ్యవహారాలు రచ్చకెక్కాయి. దీంతో జూన్ నెలలోనే కోల్‌కతా పోలీసులు ఈ మూడు ఖాతాల్లో డెబిట్ లావాదేవీలను నిలిపివేశారు. ఈ ఖాతాల ఫ్రీజ్‌ను సవాల్ చేస్తూ మమతా బెనర్జీ (Mamata Banerjee) నేతృత్వంలోని వర్గం కలకత్తా హైకోర్టును (Calcutta High Court) ఆశ్రయించింది. దీనిపై జూలై 2న విచారణ జరిపిన న్యాయస్థానం.. ఖాతాల్లోని నిధుల వివరాలను వెల్లడించాలని సంబంధిత బ్యాంక్ అధికారులను ఆదేశిస్తూ తదుపరి విచారణను గురువారానికి (జూలై 9, 2026) వాయిదా వేసింది.