Four Stars of Destiny | ఆర్మీ మాజీ చీఫ్ నరవణే పుస్తకం లీక్.. వాట్సాప్‌లో చక్కర్లు: ఢిల్లీ పోలీసుల ఎఫ్ఐఆర్

Four Stars of Destiny | భారత ఆర్మీ మాజీ చీఫ్ జనరల్ మనోజ్ ముకుంద్ (ఎంఎం) నరవణే రాసిన పుస్తకం ఇంకా అధికారికంగా విడుదల కాకముందే వివాదంలో చిక్కుకుంది. ఆయన రాసిన ఆత్మకథ 'ఫోర్ స్టార్స్ ఆఫ్ డెస్టినీ' (Four Stars of Destiny) పుస్తకంలోని అంశాలు, పీడీఎఫ్ కాపీలు చట్టవిరుద్ధంగా సోషల్ మీడియాలో చక్కర్లు కొడుతున్నాయి. దీనిపై ఢిల్లీ పోలీసులు ఎఫ్ఐఆర్ (FIR) నమోదు చేశారు.

అసలేం జరిగింది?

జనరల్ నరవణే తన అనుభవాలను పొందుపరుస్తూ రాసిన ఈ పుస్తకం ప్రస్తుతం రక్షణ శాఖ, విదేశాంగ శాఖల అనుమతి (Clearance) కోసం వేచి ఉంది. ఇందులో అగ్నిపథ్ స్కీమ్, తూర్పు లడఖ్‌లో చైనాతో ప్రతిష్టంభన వంటి కీలకమైన అంశాలను నరవణే ప్రస్తావించినట్లు సమాచారం. అయితే, పుస్తకం ప్రచురణకు నోచుకోకముందే, అందులోని కొన్ని భాగాలు ఫోటోల రూపంలోనూ, పీడీఎఫ్ రూపంలోనూ వాట్సాప్, టెలిగ్రామ్ లాంటి మాధ్యమాల్లో వైరల్ అయ్యాయి.

పోలీసుల చర్యలు

అనుమతి లేకుండా, ప్రచురణ కాకుండానే పుస్తకాన్ని లీక్ చేయడం, కాపీరైట్ ఉల్లంఘన కింద పరిగణించబడుతుంది. ఈ వ్యవహారంపై ఫిర్యాదు అందడంతో ఢిల్లీ పోలీసులు కేసు నమోదు చేశారు. ఈ పుస్తకంలోని కంటెంట్‌ను ఎవరు లీక్ చేశారు? ఎక్కడి నుంచి ఇది మొదలైంది? అన్న కోణంలో పోలీసులు దర్యాప్తు చేస్తున్నారు. చట్టవిరుద్ధంగా ఈ పుస్తకాన్ని ప్రచారం చేసే వారిపై కఠిన చర్యలు ఉంటాయని హెచ్చరిస్తున్నారు.

వివాదానికి కారణం

సాధారణంగా ఆర్మీ చీఫ్‌లు పదవీ విరమణ తర్వాత రాసే పుస్తకాలకు ప్రభుత్వ అనుమతి తప్పనిసరి. దేశ భద్రతకు సంబంధించిన సున్నితమైన అంశాలు బహిర్గతం కాకూడదనే ఉద్దేశంతో ఈ నిబంధన ఉంది. నరవణే పుస్తకంలో 2020 గల్వాన్ ఘర్షణలు, అగ్నిపథ్ నియామక ప్రక్రియపై సంచలన విషయాలు ఉన్నాయని వార్తలు వచ్చాయి. ప్రభుత్వం దీనిని సమీక్షిస్తుండగానే, ఈ లీక్ జరగడం గమనార్హం.