Minor Liver Donation | తండ్రి కోసం కొడుకు ప్రాణదాత: 17 ఏళ్ల మైనర్ లివర్ దానానికి ఢిల్లీ హైకోర్టు గ్రీన్ సిగ్నల్

• ఢిల్లీకి చెందిన 17 ఏళ్ల బాలుడు తన తండ్రికి లివర్ దానం చేసేందుకు హైకోర్టు అరుదైన అనుమతి
• తీవ్రమైన కాలేయ వ్యాధితో బాధపడుతున్న తండ్రికి లివర్ ట్రాన్స్‌ప్లాంట్ (Liver Transplant) మాత్రమే ఏకైక మార్గమని తేల్చిన వైద్యులు
• మైనర్లు అవయవదానం చేయడానికి సాధారణంగా చట్టం అంగీకరించకపోయినా, అత్యవసర వైద్య పరిస్థితి దృష్ట్యా కోర్టు మినహాయింపు
• శస్త్రచికిత్స సమయంలో బాలుడి భద్రత కోసం కఠినమైన మెడికల్ ప్రోటోకాల్స్ పాటించాలని ILBS ఆసుపత్రిని ఆదేశించిన కోర్టు 

Minor Liver Donation | త్రినేత్ర.న్యూస్ : ఢిల్లీలో అరుదైన, హృదయ విదారక ఘటన చోటుచేసుకుంది. ప్రాణాపాయ స్థితిలో ఉన్న కన్నతండ్రిని కాపాడుకునేందుకు 17 ఏళ్ల కొడుకు చేసిన అభ్యర్థనకు ఢిల్లీ హైకోర్టు (Delhi High Court) సానూకూలంగా స్పందించింది. మైనర్లు అవయవదానం చేయడం చట్టప్రకారం నిబంధనలకు విరుద్ధమైనప్పటికీ, తండ్రి పరిస్థితి అత్యంత విషమంగా ఉండటంతో జూన్ 30, 2026న జస్టిస్ మినీ పుష్కర్ణ ధర్మాసనం ఈ చరిత్రాత్మక తీర్పునిచ్చింది. అయితే బాలుడి ఆరోగ్యం, భద్రత విషయంలో ఎలాంటి రిస్క్ తీసుకోకూడదని.. అన్ని క్లినికల్ ప్రోటోకాల్స్ (Clinical protocols) పాటిస్తూ సర్జరీ చేయాలని వసంత్ కుంజ్‌లోని ILBS (Institute of Liver and Biliary Sciences) హాస్పిటల్‌ను ఆదేశించింది.

ఏకైక మార్గం ట్రాన్స్‌ప్లాంటేషన్

ఉత్తమ్ కుమార్ షా అనే వ్యక్తి దీర్ఘకాలిక కాలేయ వ్యాధితో (Chronic liver disease), సిర్రోసిస్, పోర్టల్ హైపర్‌టెన్షన్ వంటి తీవ్రమైన సమస్యలతో బాధపడుతున్నాడు. ఆయన బతకాలంటే లివర్ ట్రాన్స్‌ప్లాంటేషన్ ఒక్కటే మార్గమని వైద్యులు స్పష్టం చేశారు. అయితే, ఆ కుటుంబంలో అవయవ దానం చేయడానికి వయసు పైబడిన వారెవరూ మెడికల్‌గా మ్యాచ్ కాలేదు. దీంతో 17 ఏళ్ల 6 నెలల వయసున్న కొడుకు మాత్రమే ఆ కుటుంబానికి ఆఖరి ఆశాకిరణంగా, వైద్యపరంగా సరైన డోనర్‌గా మిగిలాడు.

కోర్టులో సాగిన న్యాయపోరాటం

భారతీయ చట్టం (Transplantation of Human Organs and Tissues Act, 1994) ప్రకారం మైనర్లు అవయవదానం చేయడానికి వీల్లేదు. కానీ, ఆ బాలుడు తన తల్లి ద్వారా హైకోర్టును ఆశ్రయించాడు. తండ్రి మీద ఉన్న ప్రేమతో, స్వచ్ఛందంగానే తన లివర్‌లో కొంత భాగాన్ని దానం చేయడానికి సిద్ధపడ్డానని, ఇందులో ఎలాంటి కమర్షియల్ ఉద్దేశం గానీ, బలవంతం గానీ లేదని కోర్టుకు విన్నవించుకున్నాడు. ఈ అభ్యర్థనను సున్నితంగా పరిశీలించిన కోర్టు.. 2014 రూల్స్ లోని రూల్ 5(3)(g) కింద ఉన్న మెడికల్ ఎమర్జెన్సీ మినహాయింపులను అమలు చేసింది. దీనికి ముందే ఢిల్లీ లెఫ్టినెంట్ గవర్నర్, సంబంధిత ప్రభుత్వ అథారిటీలు కూడా ఈ సర్జరీకి ఆమోదం తెలుపుతూ కోర్టుకు లేఖ సమర్పించాయి.

వెంటనే సర్జరీకి ఏర్పాట్లు

బాలుడి అభ్యర్థనను నిరాకరిస్తే తండ్రి ప్రాణాలు కోల్పోయే ప్రమాదం ఖచ్చితంగా ఉందని భావించిన న్యాయస్థానం, రాజ్యాంగంలోని ఆర్టికల్ 226 (Article 226) కింద తనకున్న ప్రత్యేక అధికారాన్ని ఉపయోగించి లివర్ దానానికి అనుమతించింది. కోర్టు ఆదేశాల కోసమే ఎదురుచూస్తున్నామని, ఇప్పుడు తక్షణమే సర్జరీకి తేదీ ఖరారు చేస్తామని ILBS ఆసుపత్రి వర్గాలు వెల్లడించాయి. ఆపరేషన్ తర్వాత బాలుడి ఆరోగ్యానికి ఎలాంటి ఇబ్బంది కలగకుండా కఠినమైన ఎథికల్, మెడికల్ ప్రోటోకాల్స్ (Safeguards) అమలు చేయాలని కోర్టు ఆసుపత్రికి స్పష్టమైన ఆదేశాలు జారీ చేసింది.