Baramati By-Election | ఏకగ్రీవానికి అడ్డంకులు.. అజిత్ ప‌వార్ స‌తీమ‌ణిపై పోటీకి కాంగ్రెస్ సిద్ధం

Baramati By-Election | త్రినేత్ర‌.న్యూస్‌: మహారాష్ట్ర డిప్యూటీ సీఎం సునేత్ర ప‌వార్ (Sunetra Pawar) ఆశ‌ల‌కు విప‌క్ష కాంగ్రెస్ గండికొట్టింది. త‌న భ‌ర్త‌, మాజీ ఉప‌ ముఖ్య‌మంత్రి అజిత్ ప‌వార్ (Ajit Pawar) మ‌ర‌ణంతో ఆయ‌న స‌తీమ‌ణి సునేత్ర బారామ‌తి ఉపఎన్నిక బ‌రిలో (Baramati By-Election) నిలిచారు. అయితే ఈ స్థానంలో సునేత్ర ఏకంగ్రీవంగా ఎన్నికవుతారని అంతా అనుకున్నారు. అయితే కాంగ్రెస్ పార్టీ రంగంలోకి దిగడంతో ఎన్నికలు నిర్వహించడం అనివార్య‌మైంది. ఆమెపై కాంగ్రెస్ తన అభ్యర్థిని బరిలోకి దింపింది.

ఆదివారం సాయంత్రం కాంగ్రెస్ అధ్యక్షుడు మల్లికార్జున ఖర్గే న్యాయవాది ఆకాష్ విశ్వనాథ్ మోర్ అభ్యర్థిత్వాన్ని ఖరారు చేశారు. కాగా, సునేత్ర పవార్ సోమ‌వారం నామినేషన్ దాఖలు చేయనున్నారు. ఈ ఎన్నికను ఏకగ్రీవం చేయడానికి ఆమె విపక్షాలను సంప్రదించారు. ఇందులో భాగంగా మహారాష్ట్ర కాంగ్రెస్ చీఫ్ హర్షవర్ధన్ సప్కల్‌ను కూడా కలిశారు. అయితే, అభ్యర్థిని పోటీలో దింపాలనే నిర్ణయం కేంద్ర నాయకత్వం నుంచి వచ్చిందని ఆయన తెలిపిన‌ట్లు సమాచారం. మరోవైపు, ఉద్ధవ్ ఠాక్రేను ఆమె కూడా సంప్రదించిన‌ప్ప‌టికీ శివసేన (యూబీటీ) ఎలాంటి నిర్ణయం తీసుకోకపోవ‌డం గ‌మ‌నార్హం.

బారామ‌తి ప‌వార్ కుటుంబానికి పెట్ట‌ని కోట‌గా ఉన్న‌ది. గ‌త లోక్‌స‌భ ఎన్నిక‌ల్లో బారామ‌తి నుంచి శ‌ర‌ద్ ప‌వార్ కుమార్తె సుప్రియా సూలే పోటీచేశారు. ఆమెపై ఎన్డీయే కూట‌మి త‌ర‌పున సునేత్ర ప‌వార్ బ‌రిలో నిలిచారు. అయితే ఆమెపై 1,58,333 ఓట్ల‌తో సుప్రియ విజ‌యం సాధించారు.