CM Devendra Fadnavis | ఆమె ప్ర‌ముఖ న‌టే కావొచ్చు.. బీఎంసీకి ఆ హ‌క్కు ఉంది.. దియా మీర్జా వీడియో వివాదంపై మౌనం వీడిన సీఎం ఫ‌డ్న‌వీస్‌

CM Devendra Fadnavis | త్రినేత్ర న్యూస్ : బాలీవుడ్ నటి దియా మీర్జా దీపావళి అవగాహన వీడియోపై (Dia Mirzas Diwali firecracker awareness video) వివాదం మ‌రింత ముదిరింది. వీడియోని బృహ‌న్ ముంబై మున్సిప‌ల్ కార్పొరేష‌న్ (BMC) తొలగించడం పట్ల బాంబే హైకోర్టు (Bombay High Court) తీవ్ర అసంతృప్తి వ్య‌క్తం చేసిన విష‌యం తెలిసిందే. ఆ వీడియోని సోష‌ల్ మీడియాలో రీపోస్ట్ చేయాల‌ని సూచించింది. ఈ నేప‌థ్యంలో ఈ వివాదంపై ముఖ్య‌మంత్రి దేవేంద్ర ఫ‌డ్న‌వీస్ (CM Devendra Fadnavis) స్పందించారు. ఇది చాలా చిన్న విషయమని, తమ స్థాయికి సంబంధించిన సమస్య కాదని పేర్కొన్నారు. వీడియోని తొల‌గించే పూర్తి హ‌క్కు బీఎంసీకి ఉందంటూ సంస్థ చ‌ర్య‌ల‌ను స‌మ‌ర్థించారు.

ఇవాళ పూణెలో విలేక‌రుల‌తో సీఎం మాట్లాడారు. "ఇది చాలా చిన్న విషయం. హైకోర్టు ఎవరినైనా మందలించిందా లేదా ఏదైనా అభిప్రాయం వ్యక్తం చేసిందా అనేది నాకు తెలియదు. ఎందుకంటే అస‌లు ఈ విషయం హైకోర్టుకే వెళ్లలేదు. ఇక వీడియోను తొలగించడం అనేది పూర్తిగా ముంబై మున్సిపల్ కార్పొరేషన్ నిర్ణయం. బీఎంసీ (BMC) తన విచక్షణతోనే ఆ వీడియోను తొలగించింది. ఏ కంటెంట్‌ను ఉంచాలి, దేన్ని తొలగించాలి అని నిర్ణయించే హక్కు సోషల్ మీడియా హ్యాండిల్‌ను నిర్వహించే అధికార సంస్థకు ఉంటుంది" అని ఆయన అన్నారు. అదేవిధంగా దియా మీర్జా ప్ర‌ముఖ న‌టే కావొచ్చ‌ని, కానీ ఆమె జాతీయ స్థాయి నాయ‌కురాలు కాద‌ని సీఎం వ్యాఖ్యానించారు. "దియా మీర్జా పేరుమోసిన నటే కావొచ్చు. కానీ ఆమె జాతీయ స్థాయి నాయకురాలు మాత్రం కాదు. ఇలాంటి చిన్న విషయాలు మా స్థాయికి సంబంధించినవి కావు" అని సీఎం వ్యాఖ్యానించారు.

అంత‌కుముందు వీడియోని BMC తొలగించడం పట్ల బాంబే హైకోర్టు (Bombay High Court) తీవ్ర అసంతృప్తి వ్య‌క్తం చేసింది. ఈ మేర‌కు బీఎంసీ తీరుపై ఆగ్ర‌హం వ్య‌క్తం చేసింది. రాజ‌కీయ ఒత్తిళ్లు, విమ‌ర్శ‌ల‌ కార‌ణంగా ప్ర‌జ‌ల్లో ప‌ర్యావ‌ర‌ణ స్పృహ‌ను పెంపొందించే ఇలాంటి సామాజిక ప్ర‌చార వీడియోల‌ను తొల‌గించ‌డం ప‌ట్ల జస్టిస్ గిరీష్ కుల్కర్ణి, జస్టిస్ నీలా గోఖలేలతో కూడిన ద్విస‌భ్య ధర్మాసనం అభ్యంత‌రం వ్య‌క్తం చేసింది. మ‌న‌ది సెక్యుల‌ర్ దేశ‌మ‌ని, కాలుష్యంపై అవ‌గాహ‌న క‌ల్పించేందుకు చేసిన వీడియోకు అన‌వ‌స‌ర రంగులు పుల‌మ‌డం ఏంట‌ని ప్ర‌శ్నించింది. కాలుష్య ర‌హిత దీపావ‌ళి జ‌రుపుకోవాల‌ని ప్ర‌జ‌ల్లో అవ‌గాహ‌న క‌ల్పించేందుకు బీఎంసీ చేప‌ట్టిన చ‌ర్య‌ల‌ను స‌మ‌ర్థించిన ధ‌ర్మాస‌నం.. ఇంత‌టి బృహ‌త్త‌ర‌మైన కార్య‌క్ర‌మం చేప‌ట్టిన‌ప్పుడు అక్క‌డ వ‌ర్గ‌పోర‌కు తావులేద‌ని స్ప‌ష్టం చేసింది. వీడియోను మ‌ళ్లీ పునరుద్ధరించడం స‌రైన చ‌ర్య అని అభిప్రాయ‌ప‌డింది. అయితే, దీనిపై తుది నిర్ణ‌యాన్ని మాత్రం బీఎంసీ విచ‌క్ష‌ణ‌కే వ‌దిలేస్తున్న‌ట్లు ధ‌ర్మాస‌నం స్ప‌ష్టం చేసింది.

Also Read..

దేశీయ స్టాక్ మార్కెట్ల‌లో భారీ కొనుగోళ్లు.. పెట్టుబ‌డిదారుల‌కు పండ‌గే..

పతంజలి ఆవు నెయ్యిని వాడుతున్నారా? వెంటనే ఇది చదవండి

27 ఏళ్ల యువ ఇంజనీర్‌కు సిస్కో భారీ బాధ్యత.. రెండేళ్లలో 98 శాతం కోడ్ మార్పు..