Cisco | 27 ఏళ్ల యువ ఇంజనీర్‌కు సిస్కో భారీ బాధ్యత.. రెండేళ్లలో 98 శాతం కోడ్ మార్పు..

Cisco | ఆర్టిఫిషియల్ ఇంటెలిజెన్స్ (ఏఐ) సాఫ్ట్‌వేర్ అభివృద్ధి రంగంలో ఎలాంటి మార్పులు తీసుకురాగలదో చెప్పడానికి సిస్కో సంస్థ తీసుకున్న నిర్ణయం ఒక ఉదాహరణగా నిలుస్తోంది. కేవలం 27 ఏళ్ల ఇంజనీర్ పద్మనాభన్ కృష్ణమూర్తికి రెండేళ్లలో సంస్థలోని 98 శాతం పాత సాఫ్ట్‌వేర్ కోడ్‌ను ఆధునీకరించే బాధ్యతను అప్పగించింది. ఈ ప్రాజెక్టు కోసం అపరిమిత ఏఐ టోకెన్లను ఉపయోగించుకునే అవకాశం కల్పించింది.

98 శాతం పాత కోడ్‌ను మార్చే దిశ‌గా..

పద్మనాభన్ కృష్ణమూర్తిని ముద్దుగా ప్యాడీ అని పిలుచుకునే సిస్కో ప్రెసిడెంట్, చీఫ్ ప్రొడక్ట్ ఆఫీసర్ జీతూ పటేల్.. యువ ఉద్యోగుల ఆలోచనలకు ప్రాధాన్యత ఇవ్వాలనే ఉద్దేశంతో ఈ నిర్ణయం తీసుకున్నారు. 2023లో ఎజ్‌డబ్స్ అనే రియల్‌టైమ్ అనువాద స్టార్టప్‌ను సహ వ్యవస్థాపకుడిగా ప్రారంభించిన కృష్ణమూర్తి, 2025లో ఆ సంస్థను సిస్కో కొనుగోలు చేయడంతో కంపెనీలో చేరారు. గతంలో సంస్థలో ఐదు స్థాయిల కింద పనిచేస్తూ, వ్యూహాత్మకం కాని పనుల్లో నిమగ్నమై ఉన్న ఆయనకు ఈ అవకాశం లభించింది. శాన్‌ఫ్రాన్సిస్కో కార్యాలయంలో జీతూ పటేల్‌తో జరిగిన సంభాషణలో కేవలం ఇద్దరు సభ్యులతో కూడిన బృందం సిస్కో పాత కోడ్‌ను పూర్తిగా తిరిగి రాయగలదని కృష్ణమూర్తి ప్రతిపాదించారు. దీనిపై ఆసక్తి చూపిన పటేల్ మొదట నాలుగు వారాల్లో ఈ విధానం పనిచేస్తుందో నిరూపించాలని, అనంతరం రెండేళ్లలో 98 శాతం పాత కోడ్‌ను ఆధునీకరించాలని లక్ష్యంగా నిర్ణయించారు. ఈ పనికి అపరిమిత ఏఐ టోకెన్లను అందించినట్లు పటేల్ వెల్లడించారు. ఏఐ టోకెన్లు అంటే ఏఐ మోడళ్లు సమాచారాన్ని ప్రాసెస్ చేయడానికి, సమాధానాలను రూపొందించడానికి ఉపయోగించే డేటా యూనిట్లు.

యువ ఉద్యోగులు అవ‌స‌రం: జీతూ ప‌టేల్‌..

సంస్థలో కొత్త ఆలోచనలు రావాలంటే ప్రారంభ దశలో ఉన్న యువ ఉద్యోగులను నియమించుకోవడం అవసరమని జీతూ పటేల్ అభిప్రాయపడ్డారు. దశాబ్దాల అనుభవం ఉన్న ఉద్యోగులతోపాటు యువత పనిచేయడం వల్ల అభిప్రాయ భేదాలు ఏర్పడినా, అవి వ్యక్తిగత విభేదాలుగా మారకుండా ఆలోచనలపై ఆరోగ్యకరమైన చర్చలకు దారితీయాలని పేర్కొన్నారు. బృందాల్లో ఆలోచనల మధ్య సంఘర్షణ ఉండడం మంచిదని, వ్యక్తుల మధ్య విభేదాలు మాత్రం ఉండకూడదని స్పష్టం చేశారు. ఉద్యోగులు తమకు తామే అసాధారణమైన లక్ష్యాలను నిర్దేశించుకుని, వాటిని సాధించేందుకు సృజనాత్మకంగా ఆలోచించేలా సంస్థలో నమ్మకమైన వాతావరణం కల్పించాలని ఆయన తెలిపారు.

యువ ప్రతిభకు ప్రాధాన్యత ఇవ్వడంలో భాగంగా ఇంటర్న్‌లను కూడా అనుభవజ్ఞులైన ఉద్యోగులకు మార్గదర్శకులుగా చూడాలని పటేల్ అభిప్రాయపడ్డారు. స్టాన్‌ఫోర్డ్ విద్యార్థిని బాయాను కలిసినప్పుడు.. ఏఐ రంగంలో తాను నేర్చుకుంటున్న విషయాలను ప్రతి నెలా ఈ-మెయిల్ ద్వారా తెలియజేయాలని కోరారు. ఆమె క్రమం తప్పకుండా సమాచారాన్ని పంపడంతో సిస్కోలో ఇంటర్న్‌షిప్ అవకాశం కల్పించారు. ఇంటర్న్‌గా చేరిన తర్వాత అనుభవజ్ఞులైన ఉద్యోగులు మెరుగుపరచలేకపోయిన ఒక అంశాన్ని బాయా కొత్త కోణంలో పునఃరూపకల్పన చేశారు. ఆమెను సాధారణ డేటా ఎంట్రీ పనుల కోసం కాకుండా, ఉద్యోగులకు భిన్నంగా ఆలోచించడం నేర్పించేందుకు తీసుకున్నామని పటేల్ వివరించారు. యువతకు అవకాశాలు కల్పిస్తే సంస్థల్లో కొత్త ఆవిష్కరణలకు మార్గం సుగమమవుతుందని ఆయన అభిప్రాయపడ్డారు.