CJP Protests | సీజేపీ నిర‌స‌న‌ల‌తో ఢిల్లీలో హై అల‌ర్ట్‌.. రైళ్లు ర‌ద్దు, మెట్రో స్టేష‌న్లు మూసివేత‌..!

CJP Protests | త్రినేత్ర న్యూస్ : ఓట్ల చోరీ ఆరోప‌ణ‌ల నేప‌థ్యంలో ప్ర‌ధాన ఎన్నిక‌ల క‌మిష‌న‌ర్ జ్ఞానేశ్ కుమార్ రాజీనామాకు డిమాండ్ చేస్తూ రేపు దేశ రాజ‌ధాని ఢిల్లీలో కాక్రోచ్ జ‌న‌తా పార్టీ భారీ నిర‌స‌న‌కు (CJP Protests) పిలుపునిచ్చిన విష‌యం తెలిసిందే. ఈ నేప‌థ్యంలో రేపు ఢిల్లీలో హై అలర్ట్ ప్రకటించారు. కేంద్రంతోపాటు పోలీసులు బలగాలు అప్రమత్తమయ్యాయి. శాంతిభద్రతల పరిరక్షణ కోసం భారీగా భద్రతా బలగాలను మోహరిస్తున్నారు. ముఖ్యంగా నిర‌స‌న‌కు ప్ర‌ధాన కేంద్ర‌మైన జంత‌ర్ మంత‌ర్ ప్రాంతంలో దాదాపు 40 వేల మంది పోలీసులను, పారామిలటరీ బలగాలను రంగంలోకి దింపారు.

57 మెట్రో స్టేష‌న్లు క్లోజ్‌

సీజేపీ నిర‌స‌న‌ల నేప‌థ్యంలో భ‌ద్ర‌తా కార‌ణాల‌ దృష్ట్యా న‌గ‌రంలోని 57 మెట్రో స్టేష‌న్ల‌ను క్లోజ్ చేయాల‌ని ఢిల్లీ మెట్రో రైల్ కార్పొరేషన్ (DMRC)ను పోలీసులు కోరారు. ఈరోజు రాత్రి 9 గంటల నుంచే ఆయా మెట్రో స్టేష‌న్ల ఎంట్రీ, ఎగ్జిట్ గేట్ల‌ను క్లోజ్ చేయాల్సిందిగా కోరుతూ లేఖ రాశారు. రాజీవ్ చౌక్, సెంట్రల్ సెక్రటేరియట్, న్యూఢిల్లీ, పటేల్ చౌక్, మండి హౌస్ వంటి ప్రధాన స్టేషన్లు ఇందులో ఉన్నాయి. పరిస్థితి సాధారణ స్థితికి వచ్చే వరకు ఈ ఆంక్షలు కొనసాగించాల‌ని లేఖ‌లో స్ప‌ష్టం చేశారు.

ప‌లు రైళ్లు ర‌ద్దు

మ‌రోవైపు నిర‌స‌న‌ల నేప‌థ్యంలో రైల్వే శాఖ కీల‌క నిర్ణ‌యం తీసుకుంది. శనివారం ఉదయం 4 గంటల నుంచి మధ్యాహ్నం 2 గంటల మధ్య న్యూఢిల్లీ, హజ్రత్ నిజాముద్దీన్ రైల్వే స్టేషన్లకు చేరుకోవాల్సిన పలు మెయిల్, ఎక్స్‌ప్రెస్ రైళ్లను ఇండియన్ రైల్వేస్ రద్దు (Railways cancel trains) చేసింది. ఈ నిర్ణ‌యంతో గోరఖ్‌ధామ్ ఎక్స్‌ప్రెస్, లక్నో మెయిల్, ప్రయాగ్‌రాజ్ ఎక్స్‌ప్రెస్ వంటి కీలక రైళ్లు ర‌ద్ద‌య్యాయి.

క‌ట్టుదిట్ట‌మైన భ‌ద్ర‌త‌

నిర‌సన‌ల నేప‌థ్యంలో శాంతిభద్రతలకు విఘాతం కలగకుండా, సంఘ విద్రోహ శ‌క్తులు చొర‌బ‌డే అవ‌కాశం ఉన్న నేప‌థ్యంలో న‌గ‌రంలో పోలీసులు భ‌ద్ర‌త‌ను క‌ట్టుదిట్టం చేస్తున్నారు. ర‌హ‌దారుల‌ను ఎక్క‌డిక‌క్క‌డ దిగ్బంధించారు. ముఖ్యంగా ఢిల్లీ సరిహద్దుల్లో నిఘా పెంచారు. హోట‌ళ్లు, రెస్టారెంట్ల‌లో త‌నిఖీలు చేప‌డుతున్నారు. ఢిల్లీలోకి ప్ర‌వేశించే ప్ర‌తి వాహ‌నాన్ని క్షుణ్ణంగా త‌నిఖీ చేసిన త‌ర్వాతే అనుమ‌తిస్తున్నారు. మ‌రోవైపు నిరసనకారుల‌ను, పాత్రికేయుల‌ను గృహ నిర్బంధించే అవ‌కాశం ఉంది. రేపు న‌గ‌రంలో మ‌ద్యం దుకాణాల‌ను సైతం క్లోజ్ చేయ‌నున్నారు. ఇంట‌ర్నెట్‌పై ఆంక్ష‌లు విధించ‌నున్నారు. అటు సీఈసీ జ్ఞానేశ్ కుమార్ నివాసంతోపాటూ ఎన్నిక‌ల సంఘం ప్ర‌ధాన కార్యాల‌యం వ‌ద్ద భ‌ద్ర‌త‌ను పెంచారు.

రంగంలోకి అమిత్ షా

గ‌త నిర‌స‌న‌ల్లో చెల‌రేగిన హింస కార‌ణంగా కేంద్రం అప్ర‌మ‌త్త‌మైంది. కేంద్ర హోం మంత్రి అమిత్ షా స్వ‌యంగా రంగంలోకి దిగారు. ఢిల్లీలో భ‌ద్ర‌తా ప‌రిస్థితిని స్వ‌యంగా ప‌ర్య‌వేక్షిస్తున్నారు. వివిధ రాష్ట్రాల ప‌ర్య‌ట‌న‌ను కూడా ఆయ‌న ర‌ద్దు చేసుకుని ఢిల్లీలో మ‌కాం వేశారు. అత్యున్న‌త స్థాయి అధికారుల‌తో ఎప్ప‌టిక‌ప్పుడు స‌మీక్ష‌లు నిర్వ‌హిస్తున్నారు. తాజా ప‌రిస్థితిని అడిగి తెలుసుకుంటున్నారు. మ‌రోవైపు జంత‌ర్ మంత‌ర్ వ‌ద్ద సీజేపీ నిర‌స‌న‌ల‌కు పోలీసులు అనుమ‌తిని నిరాక‌రించారు. ఆందోళనకు అనుమతి లేదని సీజేపీకి ఢిల్లీ పోలీసులు స్పష్టం చేశారు. జంతర్ మంతర్ పరిసర ప్రాంతాల్లో బీఎన్ఎస్ఎస్ సెక్షన్ 163 అమలులో ఉందని తెలిపారు. గ‌తంలో ఇచ్చిన చ‌ట్ట‌ప‌ర‌మైన ఆదేశాల‌ను ఆ పార్టీ పాటించ‌లేద‌ని ఢిల్లీ పోలీసులు తెలిపారు.

సీజేపీ నిర‌స‌న‌ల‌పై ఉత్కంఠ

ఇప్ప‌టికే సీఈసీ రాజీనామాకు డిమాండ్ చేస్తూ ప్ర‌తిప‌క్ష ఇండీ కూట‌మి ఎంపీలు గ‌త మూడు రోజులుగా ఢిల్లీలో త‌మ నిర‌స‌న‌ను కొన‌సాగిస్తున్న విష‌యం తెలిసిందే. ఈ నేప‌థ్యంలో రేపు సీజేపీ చేప‌ట్ట‌బోయే ఆందోళ‌న‌ల‌పై దేశ వ్యాప్తంగా ఉత్కంఠ‌ నెల‌కొంది. గ‌తంలో నీట్ పేప‌ర్ లీక్‌పై సీజేపీ చేప‌ట్టిన ఉద్య‌మానికి కేంద్రం దిగిరాక త‌ప్ప‌లేదు. విద్యా శాఖ మంత్రిగా ఉన్న ధ‌ర్మేంద్ర ప్ర‌ధాన్ చివ‌రికి రాజీనామా చేయాల్సి వ‌చ్చింది. ఇప్పుడు జంత‌ర్ మంత‌ర్ 2 ఏ స్థాయిలో ఉండ‌బోతోంద‌న్నది ఆస‌క్తిక‌రంగా మారింది. జ్ఞానేశ్ రాజీనామా చేయాల్సిందేన‌ని సీజేపీ డిమాండ్ చేస్తోంది. దీంతో సీఈసీ ప‌ద‌వి దిగిపోతారా..? లేదా అన్న‌ది ఆస‌క్తిక‌రంగా మారింది. ఈ విష‌యంలో కేంద్రం ఎలా ముందుకెళ్తుందో చూడాలి మ‌రి.

Also Read..

నానా ప‌టేక‌ర్ మృతి.. అస‌హ‌జ మ‌ర‌ణంగా కేసు న‌మోదు చేసిన పోలీసులు

న‌వ‌రాత్రి వేళ జెన్ జీ యువ‌త కొత్త ట్రెండ్‌.. గ‌ర్భా వేడుక‌ల్లో అల‌సిపోకుండా ఉండేందుకు ఐవీ డ్రిప్ థెరపీ

టీసీఎస్ షేర్‌హోల్డర్లకు గుడ్‌న్యూస్.. రూ.12 డివిడెండ్