Centre Tax Devolution to States | తెలంగాణకు కేంద్రం దీపావళి గిఫ్ట్.. భారీగా నిధులు విడుదల

Centre Tax Devolution to States | త్రినేత్ర న్యూస్ : పండుగల వేళ వివిధ రాష్ట్రాల అభివృద్ధి, సంక్షేమ పనులకు ఊతమిచ్చేలా కేంద్ర ప్రభుత్వం కీలక నిర్ణయం తీసుకుంది. పన్నుల పంపకం (Tax Devolution) కింద రాష్ట్రాలకు చేరాల్సిన నిధుల్లో ఒక అడ్వాన్స్ ఇన్‌స్టాల్‌మెంట్‌ను కేంద్ర ఆర్థిక శాఖ విడుదల చేసింది. ఈ ప్యాకేజీలో భాగంగా తెలుగు రాష్ట్రాలైన తెలంగాణ, ఆంధ్రప్రదేశ్‌లకు గణనీయమైన వాటా లభించింది.

తెలంగాణ, ఆంధ్రప్రదేశ్‌లకు దక్కిందిదే..

తాజా కేటాయింపుల్లో తెలంగాణ రాష్ట్రానికి పన్నుల వాటా రూపంలో రూ.2,370 కోట్లు అందనున్నాయి. మరోవైపు ఆంధ్రప్రదేశ్‌కు రూ.4,597 కోట్లు విడుదలయ్యాయి. పండుగ సీజన్‌లో రాష్ట్రాల ఖజానాపై ఆర్థిక భారం పడకుండా.. క్యాపిటల్ వ్యయం, వివిధ సంక్షేమ పథకాలను వేగవంతం చేసేందుకు ఈ అడ్వాన్స్ ఫండ్స్ ఎంతో సహాయపడనున్నాయి.

అగ్రస్థానంలో ఉత్తరప్రదేశ్.. మహారాష్ట్రకు భారీ ఊరట

దేశవ్యాప్తంగా వివిధ రాష్ట్రాలకు నిధులు కేటాయించగా.. అత్యధికంగా ఉత్తరప్రదేశ్‌కు ఏకంగా రూ. 19,208 కోట్లు విడుదలయ్యాయి. ఆ తర్వాత బిహార్‌కు రూ.10,845 కోట్లు, మధ్యప్రదేశ్‌కు రూ.8,010 కోట్లు, పశ్చిమ బెంగాల్‌కు రూ.7,866 కోట్లు దక్కాయి.

ఇక పశ్చిమ భారతంలో కీలకమైన మహారాష్ట్రకు రూ.7,022 కోట్లు లభించాయి. కేంద్రం విడుదల చేసిన ఈ నిధులపై మహారాష్ట్ర ఉపముఖ్యమంత్రి దేవేంద్ర ఫడ్నవీస్ సోషల్ మీడియా వేదికగా స్పందించారు.

ప్రధాని మోదీ, నిర్మలా సీతారామన్‌లకు ఫడ్నవీస్ ధన్యవాదాలు

"దీపావళి పండుగకు ముందే పన్నుల వాటా అడ్వాన్స్ ఇన్‌స్టాల్‌మెంట్ విడుదల చేసి కేంద్ర ప్రభుత్వం రాష్ట్రాలకు తీపి కబురు అందించింది" అని దేవేంద్ర ఫడ్నవీస్ పేర్కొన్నారు. రాష్ట్రాల ఆర్థిక ప్రగతికి ఊతమిస్తున్న ప్రధాని నరేంద్ర మోదీ, కేంద్ర ఆర్థిక మంత్రి నిర్మలా సీతారామన్‌లకు ఆయన కృతజ్ఞతలు తెలిపారు. ఈ నిర్ణయం ద్వారా తమ రాష్ట్రంలో అభివృద్ధి పనులకు మరింత వేగం అందుతుందని, ప్రజలకు ఎంతో మేలు జరుగుతుందని ఫడ్నవీస్ వివరించారు.

దక్షిణాది రాష్ట్రాల విడుదలైన నిధులు ఇవే

ఆంధ్రప్రదేశ్: రూ.4,597 కోట్లు

కర్ణాటక: రూ.4,504 కోట్లు

తమిళనాడు: రూ.4,466 కోట్లు

కేరళ: రూ.2,597 కోట్లు

తెలంగాణ: రూ.2,370 కోట్లు

రాష్ట్ర ప్రభుత్వాలు పండుగ సీజన్ సందర్భంగా స్థానిక ప్రాజెక్టులకు నిధుల కొరత లేకుండా చూసేందుకు ఈ ముందస్తు పంపిణీ ఎంతగానో తోడ్పడనుంది.