CM Revanth Reddy Delhi Tour | రావణుడు లాంటి మోదీని గద్దె దించేందుకు ఢిల్లీకి వచ్చిన తెలంగాణ వానర సైన్యం

• ఢిల్లీలో రేవంత్ గర్జన
• మోదీపై యుద్ధానికి వానర సైన్యం
• ఢిల్లీలో రేవంత్ సంచలన కామెంట్స్

CM Revanth Reddy Delhi Tour | త్రినేత్ర న్యూస్ : కేంద్రంలో అధికారంలో ఉన్న బీజేపీ సర్కార్‌పై కాంగ్రెస్ పార్టీ, ఇండియా (INDIA) కూటమి పోరుబాట పట్టాయి. ‘ఛలో ఢిల్లీ’ కార్యక్రమంలో భాగంగా ఆదివారం దేశ రాజధాని ఢిల్లీకి చేరుకున్న తెలంగాణ ముఖ్యమంత్రి ఎనుముల రేవంత్ రెడ్డికి తెలంగాణ భవన్‌లో మంత్రులు, ఎంపీలు, ఎమ్మెల్యేలు, ఎమ్మెల్సీలు, కాంగ్రెస్ శ్రేణులు భారీ ఎత్తున ఘన స్వాగతం పలికారు. అనంతరం తెలంగాణ పీసీసీ చీఫ్ బొమ్మ మహేష్ కుమార్ గౌడ్, ఇతర ప్రజాప్రతినిధులతో కలిసి రేవంత్ కీలక సమావేశం నిర్వహించి పార్టీ శ్రేణులకు దిశానిర్దేశం చేశారు.

రావణుడిని ఓడించేందుకు మా వానర సైన్యం వచ్చింది: సీఎం రేవంత్

తెలంగాణ భవన్‌లో పార్టీ శ్రేణులను ఉద్దేశించి సీఎం రేవంత్ రెడ్డి మాట్లాడుతూ కేంద్ర ప్రభుత్వంపై తీవ్రస్థాయిలో ధ్వజమెత్తారు. "ఈ దేశంలో రావణ పాలన సాగిస్తున్న ప్రధాని మోదీని గద్దె దించేందుకే తెలంగాణ నుంచి కాంగ్రెస్ వానర సైన్యం ఢిల్లీకి తరలివచ్చింది. ఎన్ని రైళ్లు ఆపినా, అడ్డంకులు సృష్టించినా జనం ఆగలేదు.. వేలాదిగా తరలివచ్చారు" అని స్పష్టం చేశారు.

దేశంలో రాంలీలా మైదాన్ వేదికగా కేంద్ర ప్రభుత్వ 'ఓటు చోరీ' కుట్రలను ప్రజల ముందు ఎండగడతామని ఆయన హెచ్చరించారు. "మోదీని మళ్లీ గద్దెనెక్కించేందుకే కేంద్రం కుట్రలు చేస్తోంది. ఇప్పటికే దేశవ్యాప్తంగా 13.5 కోట్ల మంది పేదల ఓట్లు తొలగించారు. రాబోయే రోజుల్లో మరో 20 కోట్ల ఓట్లను తొలగించేందుకు ప్లాన్ చేస్తున్నారు" అంటూ సంచలన ఆరోపణలు గుప్పించారు.

ఒకే వేదికపై ఇండియా కూటమి అగ్రనేతలు.. ఓపెన్ టాప్ జీపుల్లో భారీ ర్యాలీ

తెలంగాణ భవన్ సమావేశం అనంతరం సీఎం రేవంత్ రెడ్డి ఏఐసీసీ అధ్యక్షుడు మల్లికార్జున్ ఖర్గే నివాసానికి చేరుకున్నారు. అక్కడ ఇండియా కూటమి ముఖ్య నేతలతో భేటీ అయ్యారు.

అనంతరం ఖర్గే నివాసం నుంచి చారిత్రక రాంలీలా మైదాన్ వరకు ఇండియా కూటమి అగ్రనేతలు భారీ ర్యాలీగా బయలుదేరారు. కాంగ్రెస్ పార్లమెంటరీ పార్టీ చైర్‌పర్సన్ సోనియా గాంధీ, అగ్రనేత రాహుల్ గాంధీ, పశ్చిమ బెంగాల్ సీఎం మమతా బెనర్జీ, ఎస్పీ చీఫ్ అఖిలేష్ యాదవ్‌లతో పాటు సీఎం రేవంత్ రెడ్డి ఓపెన్ టాప్ జీపుల్లో ప్రయాణిస్తూ కార్యకర్తలకు అభివాదం చేశారు. కేంద్ర ప్రభుత్వ ప్రజా వ్యతిరేక విధానాలపై గళమెత్తేందుకు రాంలీలా మైదాన్ వైపు వేలాదిగా కార్యకర్తలు కదలిరావడంతో ఢిల్లీ పురవీధులు కాంగ్రెస్, ఇండియా కూటమి నినాదాలతో హోరెత్తాయి.