BSNL JTO Recruitment | బీఎస్ఎన్ఎల్‌లో జూనియ‌ర్ టెలికాం ఆఫీస‌ర్ పోస్టులు.. తెలంగాణ‌లోనూ ఖాళీలు

BSNL JTO Recruitment | త్రినేత్ర‌.న్యూస్‌: ప్రభుత్వ రంగ టెలికాం సంస్థ‌ భారత్‌ సంచార్‌ నిగమ్‌ లిమిటెడ్‌(BSNL) జూనియర్ టెలికాం ఆఫీసర్ కేడర్‌లో ఉద్యోగాల భర్తీకి నోటిఫికేషన్ విడుదల చేసింది. ఈ నోటిఫికేష‌న్ ద్వారా 100 జేటీవో (BSNL JTO Recruitment) ఉద్యోగాల‌ను భ‌ర్తీ చేస్తున్న‌ది. ఇందులో తెలంగాణ సర్కిల్‌లో 2 పోస్టులు, ఆంధ్రప్రదేశ్ సర్కిల్‌లో 1 పోస్టు ఉన్నాయి. అత్య‌ధికంగా క‌ర్ణాట‌క స‌ర్కిల్‌లో 26 పోస్టులు ఉన్నాయి. బీఈ, బీటెక్‌, ఎమ్ఎస్సీ చేసిన‌వారు ఆన్‌లైన్ విధానంలో జూన్ 4 నుంచి దరఖాస్తు చేసుకోవచ్చు. ఎంపికైన వారికి ప్ర‌తినెల రూ.16,400 నుంచి రూ.40,500 వ‌ర‌కు వేత‌నం ల‌భిస్తుంది. రాత‌ప‌రీక్ష ద్వారా అభ్య‌ర్థుల‌ను ఎంపిక చేస్తున్న‌ది. అయితే ఎంపికైన అభ్యర్థులు కనీసం 5 సంవత్సరాల పాటు సంస్థలో సేవలు అందిస్తామని రూ. 6 లక్షల బాండ్ రాసి ఇవ్వాలి. రెండేండ్లు ప్రొబేషనరీ పీరియడ్​ ఉంటుంది.

మొత్తం ఖాళీలు: 100

అర్హత: గుర్తింపు పొందిన యూనివర్సిటీ నుంచి టెలీకమ్యూనికేషన్స్​, ఎలక్ట్రానిక్స్​, రేడియో, కంప్యూటర్, ఎలక్ట్రికల్​, ఐటీ విభాగాల్లో ఇంజినీరింగ్​ పూర్తి చేసి ఉండాలి. లేదంటే ఎంఎస్సీ, ఎంటెక్‌లో ఉత్తీర్ణులై ఉండాలి. అభ్య‌ర్థులు 2026 జూలై 3 నాటికి 20 ఏండ్ల‌ నుంచి 30 ఏండ్ల‌ మధ్యలో ఉండాలి.

ఎంపిక ప్ర‌క్రియ‌

కంప్యూటర్‌ బేస్డ్ టెస్ట్‌ (సీబీటీ), డాక్యుమెంట్‌ వెరిఫికేషన్‌, మెడికల్ ఎగ్జామినేషన్‌ ఆధారంగా భర్తీ చేస్తారు. సీబీటీ పరీక్ష మూడు విభాగాలుగా ఉంటుంది. అందులో ఇంజినీరింగ్ స్ట్రీమ్-1, ఇంజినీరింగ్ స్ట్రీమ్-2, జనరల్ ఎబిలిటీ టెస్ట్ ఉంటాయి. మొత్తం 480 మార్కులకు పరీక్ష ఉంటుంది.

సెక్ష‌న్‌-1: 50 ప్రశ్నలు అడుగుతారు. 200 మార్కులకు ప‌రీక్ష ఉంటుంది. ప్రతీ స‌రైన సమాధానికి 4 మార్కులు, తప్పు ఆన్సర్​కు 1 నెగిటివ్​ మార్క్​ ఉంటుంది. ఇందులో మెటీరియల్​ కాంపోనెంట్స్​, ఫిజికల్​ ఎలక్ట్రానిక్స్​, ఎలక్ట్రాన్​ డివైస్​, నెట్​వర్క్​ థియరీ, పవర్​ ఎలక్ట్రానిక్స్​కు సంబంధించిన ప్రశ్నలు ఉంటాయి.

సెక్షన్​-2: ఇది 50 ప్రశ్నలు 200 మార్కులకు ఉంటుంది. ఇందులో అనలాగ్​ ఎలక్ట్రానిక్​ సర్క్యూట్​, డిజిటల్​ ఎలక్ర్టానిక్​ సర్క్యూట్​, కంట్రోల్​ సిస్టమ్​, కమ్యూనికేషన్​ సిస్టమ్​, మెక్రోవేవ్​ ఇంజినీరింగ్ నుంచి ప్రశ్నలు అడుగుతారు.

సెక్షన్-3: ఇందులో 20 ప్రశ్నలకు 80 మార్కులకు ఉంటాయి. ప్ర‌తి తప్పు స‌మాధానానికి 1 మార్కు కోత విధిస్తారు. జనరల్​ ఇంగ్లీష్​, భారతదేశ చరిత్ర, జాగ్రఫీ, జనరల్​ నాల్జెడ్​ నుంచి ప్రశ్నలు అడుగుతారు.

• దేశవ్యాప్తంగా 27 సెంటర్లలో పరీక్ష నిర్వహించనున్నారు. హైద‌రాబాద్‌, విజయవాడలో కూడా ప‌రీక్ష కేంద్రాలు ఉంటాయి.

దరఖాస్తు విధానం: ఆన్‌లైన్‌లో
ఆన్‌లైన్ అప్లికేషన్స్​: జూన్ 4 నుంచి
ద‌ర‌ఖాస్తుల‌కు చివరి తేదీ: జూలై 3
పరీక్ష తేదీ: ఆగస్టు నెల‌లో
వెబ్‌సైట్‌: bsnl.co.in.