Election Commission of India | ‘సర్’ నోటీసులొచ్చాయా? మీ ఇంటికే రానున్న BLOలు.. ఇక ఆఫీసుల చుట్టూ తిరగక్కర్లేదు

• ఓటర్ల జాబితా పరిశీలనపై ఈసీ కీలక నిర్ణయాలు

Election Commission of India | త్రినేత్ర న్యూస్ : దేశవ్యాప్తంగా కొనసాగుతున్న ప్రత్యేక ఓటర్ల జాబితా సవరణ (SIR) ప్రక్రియలో సామాన్య పౌరులకు ఎటువంటి ఇబ్బందులు కలగకుండా కేంద్ర ఎన్నికల సంఘం (ECI) అత్యంత కీలకమైన నిర్ణయాలు తీసుకుంది. శనివారం (సెప్టెంబర్ 26, 2026) జరిగిన పూర్తిస్థాయి కమిషన్ సమావేశంలో ఓటర్ల సౌలభ్యం, అధికారుల బాధ్యతలతో పాటు సాంకేతిక వ్యవస్థల పారదర్శకతపై సమగ్ర మార్గదర్శకాలను విడుదల చేసింది.

నోటీసులు వస్తే కంగారు వద్దు.. ఇంటికే BLOలు

ఓటర్ల వివరాల్లో తప్పులు, అన్‌మ్యాపింగ్ లేదా ఇతర వ్యత్యాసాల కారణంగా ఇప్పటికే నోటీసులు అందుకున్న వారు ఎన్నికల రిజిస్ట్రేషన్ అధికారుల (ERO/AERO) కార్యాలయాలకు స్వయంగా రావాల్సిన పనిలేదని ఈసీ స్పష్టం చేసింది.

సంబంధిత బూత్ స్థాయి అధికారులు (BLO) నేరుగా ఓటరు ఇంటికే వెళ్లి అవసరమైన డాక్యుమెంట్లను సేకరిస్తారు. అనంతరం వాటిని ‘ఈసీఐనెట్’ (ECINet) పోర్టల్‌లో అప్‌లోడ్ చేస్తారు. అత్యంత అరుదైన సందర్భాల్లో మాత్రమే ఈఆర్వో నిర్ణయం మేరకు ఆన్‌లైన్ ద్వారా హియరింగ్ జరుగుతుంది. ఒకవేళ ఓటరు హాజరు కాలేకపోతే, కుటుంబంలోని ఏ వయోజన సభ్యుడైనా వారి తరఫున వాదనలు వినిపించేందుకు అనుమతించారు.

నిరాశ్రయులు, కూలీల కోసం ప్రత్యేక క్యాంపులు

రైతులు, దినసరి కూలీలు, నిరాశ్రయులు, రాత్రిపూట ఆశ్రయాల్లో ఉండే నిరుపేదలు ఓటర్ల జాబితా నుంచి గల్లంతు కాకుండా జిల్లా ఎన్నికల అధికారులు (DEOs) ప్రత్యేక హెల్ప్ డెస్కులు, ప్రత్యేక క్యాంపులు ఏర్పాటు చేయాలని ఆదేశాలు జారీ అయ్యాయి. గోవాలో ఇప్పటికే మిగిలిపోయిన ఓటర్ల కోసం ఇంటింటికీ వెళ్లి దరఖాస్తులు సేకరిస్తున్నారని, 97 మందిలో 81 మంది ఫారమ్-6 ద్వారా దరఖాస్తు చేసుకున్నారని కమిషన్ వివరించింది.

సుప్రీంకోర్టు తీర్పు సమర్థన.. ఐఐటీ నిపుణులతో ECINet సమీక్ష

ఫారమ్ 6కు జతచేసిన డిక్లరేషన్‌ను సుప్రీంకోర్టు సమర్థించిందని ఎన్నికల సంఘం వెల్లడించింది. మరోవైపు క్షేత్రస్థాయి అధికారులు ఉపయోగిస్తున్న ‘ఈసీఐనెట్’ (ECINet) సాఫ్ట్‌వేర్ పారదర్శకతను పునఃపరిశీలించేందుకు సీనియర్ డిప్యూటీ ఎలక్షన్ కమిషనర్ (DEC) నేతృత్వంలో, ప్రతిష్టాత్మక ఐఐటీ/ట్రిపుల్ ఐటీ (IIT/IIIT) స్వతంత్ర నిపుణులతో ఒక ఉన్నత స్థాయి కమిటీని ఏర్పాటు చేశారు. ఈ కమిటీ సిస్టమ్‌ను క్షుణ్ణంగా సమీక్షించి ఈసీకి నివేదిక ఇస్తుంది.

ఢిల్లీ, మహారాష్ట్రల్లో గడువు పెంపు

రాష్ట్రాల ప్రధాన ఎన్నికల అధికారుల (CEO) అభ్యర్థన మేరకు ఈసీ కీలక నిర్ణయం తీసుకుంది.

ఢిల్లీ: క్లెయిమ్‌లు, అభ్యంతరాల స్వీకరణ గడువును అక్టోబర్ 30, 2026 వరకు పొడిగించారు. వీటి పరిష్కార గడువును నవంబర్ 30 వరకు పెంచారు.

మహారాష్ట్ర: క్లెయిమ్‌లు, అభ్యంతరాల దాఖలుకు అక్టోబర్ 12, 2026 వరకు, వాటి పరిష్కారానికి నవంబర్ 10 వరకు సమయం ఇచ్చారు.

ఇప్పటికే 20 రాష్ట్రాల్లో పూర్తయిన ప్రక్రియ

బీహార్, పశ్చిమ బెంగాల్ సహా ఇప్పటికే 20 రాష్ట్రాలు/కేంద్రపాలిత ప్రాంతాల్లో SIR ప్రక్రియ పూర్తయ్యిందని ఈసీ స్పష్టం చేసింది. ఒకవేళ ఎవరి పేరైనా ఇప్పటికీ ఓటర్ల జాబితాలో లేకపోయినా, యువత, మొదటిసారి ఓటు హక్కు పొందే వారు నిరంతర అప్‌డేట్ ప్రక్రియ కింద సంబంధిత ERO కార్యాలయాల్లో దరఖాస్తు చేసుకోవచ్చని, వీరి కోసం ప్రత్యేక డ్రైవ్ చేపట్టాలని ఆదేశించింది.

కేబినెట్ సెక్రటరీ లేఖపై క్లారిటీ

ఇటీవల కేబినెట్ సెక్రటరీకి వెళ్లిన లేఖపై కూడా ఈసీ స్పష్టతనిచ్చింది. ఆ లేఖ కేవలం డెప్యుటేషన్‌పై వచ్చిన ఒక అధికారి పనితీరుకు సంబంధించిందే తప్ప, కమిషన్ విధానపరమైన నిర్ణయాలతో గానీ, ఐటీ విభాగానికి సంబంధించిన అంశాలతో గానీ దానికి ఎలాంటి సంబంధం లేదని తేల్చిచెప్పింది. అలాగే కమిషన్ ఆదేశాలను అధికారులు అత్యంత కచ్చితత్వంతో పాటించాలని పునరుద్ఘాటించింది.

A meeting of the Election Commission of India was held today, 26 September 2026, at 3:00 PM at Nirvachan Sadan, New Delhi.

Chief Election Commissioner Shri Gyanesh Kumar and Election Commissioners Dr. Sukhbir Singh Sandhu and Dr. Vivek Joshi were present in today’s meeting.… pic.twitter.com/WZoqEIXVJq

— Election Commission of India (@ECISVEEP) September 26, 2026