Cockroach Janta Party | అస్సాంలో తీవ్ర ఉద్రిక్తత: మీటింగ్‌కు ముందే సీజేపీ నేతల అరెస్ట్.. సీఎం హిమంతపై తీవ్ర ఆరోపణలు

Cockroach Janta Party | త్రినేత్ర న్యూస్ : అస్సాంలో అధికార బీజేపీ వర్సెస్ కాక్రోచ్ జనతా పార్టీ (CJP) మధ్య తీవ్ర రాజకీయ వివాదం చెలరేగింది. గౌహతిలో పార్టీ తొలి ప్రాంతీయ వాలంటీర్ల మీటింగ్‌ జరగడానికి కొద్ది గంటల ముందే పార్టీ కో-కన్వీనర్ అశుతోష్ రాంకాతో పాటు పలువురు కీలక నేతలు, వాలంటీర్లను అస్సాం పోలీసులు అదుపులోకి తీసుకున్నారు. ప్రైవేట్ స్థలంలో శాంతియుతంగా సమావేశం నిర్వహించేందుకు సిద్ధమవుతుండగా ఈ నిర్బంధం చోటుచేసుకోవడం రాష్ట్ర రాజకీయాల్లో వేడి పుట్టించింది.

"సీఎం హిమంత భయపడుతున్నారు": అశుతోష్ రాంకా

పోలీసుల అదుపులో ఉన్న సమయంలో అశుతోష్ రాంకా విడుదల చేసిన వీడియో స్థానికంగా వైరల్ అవుతోంది. అస్సాం సీఎం హిమంత బిశ్వ శర్మ తమ పార్టీ ఎదుగుదలను చూసి భయపడుతున్నారని ఆయన ఆరోపించారు.

"రాష్ట్రంలోని ప్రభుత్వ పాఠశాలల దుస్థితి, మానవ తప్పిదాల వల్ల వస్తున్న వరదలు, కజిరంగా రియాలిటీని మేము ప్రజల ముందు ఎండగడతామనే భయంతోనే ప్రభుత్వం మమ్మల్ని అడ్డుకుంది. మా వాలంటీర్లను బెదిరించారు. కానీ ఈ నేల ప్రజలను ఎవరూ భయపెట్టలేరు" అని అశుతోష్ తీవ్రస్థాయిలో మండిపడ్డారు.

రహదారుల దిగ్బంధం.. పోలీసుల మోహరింపు

కార్యక్రమానికి సంబంధించిన ఏర్పాట్లను పర్యవేక్షించేందుకు గౌహతి వచ్చిన అశుతోష్, శనివారం ఉదయం నుంచే పోలీసులు వేదిక వైపు వెళ్లే మార్గాలను దిగ్బంధించారని సోషల్ మీడియా ప్లాట్‌ఫామ్ ఎక్స్ ద్వారా వెల్లడించారు. రోడ్లకు ఇరువైపులా బారికేడ్లు ఏర్పాటు చేయడమే కాకుండా, టియర్ గ్యాస్ బలగాలను సైతం రంగంలోకి దించారని ఆయన పేర్కొన్నారు. వాలంటీర్లు ఎవరూ మీటప్ స్పాట్‌కు చేరుకోకుండా అడ్డుకున్నారని తెలిపారు.

గుర్తుతెలియని ప్రాంతానికి తరలింపు: వ్యవస్థాపకుడు అభిజీత్ దిప్కే

ఈ పరిణామాలపై సీజేపీ వ్యవస్థాపకుడు అభిజీత్ దిప్కే తీవ్ర ఆగ్రహం వ్యక్తం చేశారు. శాంతియుతంగా చిన్న వాలంటీర్ల సమావేశానికి వెళ్తున్న అశుతోష్ రాంకాతో పాటు బృందాన్ని అస్సాం పోలీసులు అదుపులోకి తీసుకుని, ఎవరికీ సమాచారం ఇవ్వకుండా గుర్తుతెలియని ప్రదేశానికి తరలించారని ఎక్స్ వేదికగా ఆరోపించారు. ఈ వ్యవహారంపై అస్సాం ప్రభుత్వం, పోలీసులు ఇంకా స్పందించాల్సి ఉంది.

🚨URGENT🚨

The entire road leading to the meet-up site has been barricaded from both sides. Assam police is ready with tear gas.

Our volunteers are being detained. No one is being allowed to reach the meet-up site.

Why is Assam govt so scared of @Cockroachisback? https://t.co/DuR0tvBB56

— Ashutosh Ranka (@AshutoshRanka) September 27, 2026