Suryaa Ant Se Aarambh Tak | ‘సూర్య’ సినిమాపై నిషేధం విధించండి.. కేంద్రమంత్రికి ఐఎంఏ లేఖ! అసలు వివాదం ఏంటి?

Suryaa Ant Se Aarambh Tak | త్రినేత్ర న్యూస్ : వైద్య వృత్తిని తప్పుగా చూపిస్తూ, వైద్యులపై హింసను ప్రోత్సహించేలా ఉందంటూ 'సూర్య - అంత్ సే ఆరంభ్ తక్' (SURYAA – Ant Se Aarambh Tak) సినిమాపై తీవ్ర వ్యతిరేకత వ్యక్తమవుతోంది. ఈ చిత్ర ప్రచార కంటెంట్.. వైద్య రంగంపై తప్పుడు సంకేతాలు ఇస్తోందని ఆరోపిస్తూ ఇండియన్ మెడికల్ అసోసియేషన్ (IMA) రంగంలోకి దిగింది. ఈ సినిమాపై అత్యవసరంగా సమీక్ష జరిపి, తగిన చర్యలు తీసుకోవాలని కోరుతూ కేంద్ర సమాచార, ప్రసార శాఖ మంత్రి అశ్విని వైష్ణవ్‌కు ఐఎంఏ జాతీయ అధ్యక్షుడు డాక్టర్ అనిల్ కుమార్ జె.నాయక్ గురువారం అధికారికంగా లేఖ రాశారు.

సినిమాపై ఐఎంఏ లేవనెత్తిన ప్రధాన ఆందోళనలు ఇవే

వైద్య వృత్తికి చెడ్డపేరు: వైద్య రంగంలో అవినీతి, అనైతిక పద్ధతులు అందరిలో ఉన్నట్లు చూపించడం వల్ల సమాజంలో డాక్టర్ల పట్ల తప్పుడు అభిప్రాయం ఏర్పడుతుందని, కొద్దిమంది తప్పులకు కోట్లాది మంది నిజాయితీగల డాక్టర్ల పరువు తీయకూడదని ఐఎంఏ పేర్కొంది.

హింసను సాధారణీకరించడం: డాక్టర్లు, నర్సింగ్ సిబ్బందిపై భౌతిక దాడి దృశ్యాలను వీరోచితంగా లేదా సమర్థనీయమైనవిగా చూపించడం వల్ల ప్రజల్లో వైద్యులపై హింస సాధారణమైపోయే ప్రమాదం ఉందని హెచ్చరించింది.

భద్రతా ముప్పు: ఆసుపత్రులలో వైద్యులు ఇప్పటికే తీవ్రమైన భద్రతా సవాళ్లను ఎదుర్కొంటున్న తరుణంలో, ఇలాంటి దాడులను గ్లోరిఫై చేసే కంటెంట్ వారి ప్రాణాలకు మరింత ముప్పు తెస్తుందని ఆందోళన వ్యక్తం చేసింది.

డాక్టర్-పేషెంట్ బంధానికి ముప్పు: ఇలాంటి చిత్రాల వల్ల డాక్టర్లు, రోగుల మధ్య పరస్పర నమ్మకం సడలిపోయి, అత్యవసర వైద్య సేవలకు కూడా విఘాతం కలుగుతుందని తెలిపింది.

చట్టపరమైన చర్యలు లేదా నిషేధం కోరిన ఐఎంఏ

వైద్యులు ఎప్పుడూ కూడా తప్పులను వెనుకేసుకురాబోరని, ఎక్కడైనా అవినీతి జరిగితే చట్టపరమైన చర్యలు తీసుకోవచ్చని ఐఎంఏ స్పష్టం చేసింది. కానీ, కొద్దిమంది తప్పులను మొత్తం వృత్తికి ఆపాదించడం సరికాదని పేర్కొంది. దేశంలో పెరుగుతున్న జనాభా అవసరాలకు తగినట్లుగా ఎంతోమంది అంకితభావం గల వైద్యులు అవసరమని, ఇలాంటి నెగెటివ్ చిత్రాల వల్ల భవిష్యత్తు వైద్యులు నిరుత్సాహపడే అవకాశం ఉందని ఆందోళన వ్యక్తం చేసింది.

సృజనాత్మక స్వేచ్ఛను గౌరవిస్తామని.. అయితే వైద్యుల భద్రత, ప్రజా సేవల పట్ల నమ్మకం ప్రమాదంలో పడినప్పుడు అది బాధ్యతాయుతంగా ఉండాలని ఐఎంఏ హితవు పలికింది. ఈ నేపథ్యంలో సినిమాలోని అంశాలపై నిష్పక్షపాతంగా సమీక్ష జరపాలని, తప్పులను సరిదిద్దేలా చర్యలు తీసుకోవాలని, అవసరమైతే చట్టప్రకారం సినిమాపై నిషేధం విధించాలని కేంద్ర ప్రభుత్వాన్ని కోరింది. ఈ లేఖ ప్రతిని కేంద్ర ఆరోగ్య శాఖ మంత్రిత్వ శాఖ, హోం మంత్రిత్వ శాఖ, నేషనల్ మెడికల్ కమిషన్‌కు కూడా పంపినట్లు ఐఎంఏ వెల్లడించింది.

The Indian Medical Association (IMA) has written to Ashwini Vaishnaw, Minister for Information and Broadcasting, seeking an urgent review of the film “Suryaa– Ant Se Aarambh Tak” over its portrayal of the medical profession and violence against healthcare workers. https://t.co/07UVzHE3Cf

— ANI (@ANI) October 22, 2026