Web Series | ఓటీటీలోకి తెలుగు క్రైమ్ థ్రిల్ల‌ర్ వెబ్‌సిరీస్ – త‌ల లేని డెడ్‌బాడీ మిస్ట‌రీతో…

Web Series |  ఓ వైపు కాన్సెప్ట్ ఓరియెంటెడ్ క‌థాంశాల‌తో కూడిన చిన్న సినిమాలు చేస్తూనే మ‌రోవైపు వెబ్‌సిరీస్‌ల‌లో న‌టిస్తున్నాడు టాలీవుడ్‌ యంగ్ హీరో న‌రేష్ అగ‌స్త్య‌. తాజాగా అత‌డు ప్ర‌ధాన పాత్ర‌లో న‌టించిన తెలుగు క్రైమ్ థ్రిల్ల‌ర్ వెబ్‌సిరీస్ వ‌చ్చే వారం ఓటీటీలో సంద‌డి చేయ‌బోతుంది. రుద్ర‌వ‌నం పీఎస్ పేరుతో రూపొందిన వెబ్‌సిరీస్‌కు శ‌శిధ‌ర్ మున్నంగి ద‌ర్శ‌క‌త్వం వ‌హించారు. ఈ వెబ్‌సిరీస్‌లో బెనర్జీ, శివ అలపాటి, సుగాలి సిలోని, శ్రావణి రెడ్డి కీల‌క పాత్ర‌ల్లో క‌నిపించ‌బోతున్నారు. అక్టోబ‌ర్ 30 నుంచి జీ5 ఓటీటీలో ఈ వెబ్‌సిరీస్ స్ట్రీమింగ్ కాబోతుంది.

రుద్ర‌వ‌నం మిస్ట‌రీ...

రుద్రవనం ఊరిలో ఓ తల లేని మృతదేహం దొరుకుతుంది. త‌ర్వాత మ‌రో వ్య‌క్తి అదృశ్య‌మ‌వుతాడు . ఈ కేసుని డీల్ చేసే బాధ్య‌త‌ను ఎస్ఐ శివ‌కుమార్ చేప‌డ‌తాడు. ఒక్కో ఆధారం బయటపడుతున్న కొద్దీ అవినీతి, స్థానిక రాజకీయాలు, ఎన్నో ఏళ్లుగా బయటకు రాని రహస్యాలు వెలుగులోకి వస్తాయి. పైకి కనిపించేంత చిన్న కేసు కాద‌ని తెలుసుకున్న శివ‌కుమార్ ఏం చేశాడు? శివ‌కుమార్ ఇన్వేస్టిగేష‌న్ కార‌ణంగా ఓ ఊరిలో ఎలాంటి గొడ‌వ‌లు జ‌రిగాయి? అస‌లు కిల్ల‌ర్ ఎవ‌రు అనే అంశాల‌తో ఈ వెబ్‌సిరీస్ తెర‌కెక్కుతోంది.

ఆర్ఎక్స్ 100 ఫేమ్‌...

ఆర్ఎక్స్ 100, జాంబీరెడ్డి, మంగ‌ళ‌వారం సినిమాల‌కు డైలాగ్స్ అందించిన తాజ్ స‌య్య‌ద్ ఈ వెబ్‌సిరీస్‌కు రైట‌ర్‌గా వ‌ర్క్ చేశారు. ఇందులో సిన్సియ‌ర్ పోలీస్ ఆఫీస‌ర్‌గా న‌రేష్ అగ‌స్త్య న‌ట‌న ఈ సిరీస్‌కు హైలైట్‌గా ఉండ‌బోతున్న‌ట్లు మేక‌ర్స్ పేర్కొన్నారు. ఏడు ఎపిసోడ్స్‌తో ఈ వెబ్‌సిరీస్ తెర‌కెక్కుతోంది.