Stock Markets | వరుసగా మూడో రోజూ నష్టాల్లో స్టాక్ మార్కెట్లు.. సెన్సెక్స్ 460 పాయింట్లు డౌన్..

Stock Markets | భారత స్టాక్ మార్కెట్లు గురువారం వరుసగా మూడో రోజు నష్టాల్లో ముగిశాయి. అంతర్జాతీయ మార్కెట్లో ముడి చమురు ధరలు భారీగా పెరగడం, భౌగోళిక రాజకీయ అనిశ్చితులు, అన్ని రంగాల్లోనూ అమ్మకాల ఒత్తిడి కారణంగా బెంచ్‌మార్క్ సూచీలు క్షీణించాయి. బీఎస్‌ఈ సెన్సెక్స్ 460.30 పాయింట్లు నష్టపోగా, ఎన్‌ఎస్‌ఈ నిఫ్టీ 123.70 పాయింట్లు పడిపోయింది. గురువారం ట్రేడింగ్ ముగిసే సమయానికి బీఎస్‌ఈ సెన్సెక్స్ 73,249.39 పాయింట్ల వద్ద స్థిరపడింది. ఎన్‌ఎస్‌ఈ నిఫ్టీ 50 సూచీ 22,687.65 పాయింట్ల వద్ద ముగిసింది. అంతకుముందు ట్రేడింగ్ సెషన్‌లో సెన్సెక్స్ 73,709.69 పాయింట్ల వద్ద, నిఫ్టీ 22,811.35 పాయింట్ల వద్ద ముగిశాయి. దీంతో వరుసగా మూడో సెషన్‌లోనూ మార్కెట్లు నష్టాలను నమోదు చేశాయి.

అన్ని రంగాల సూచీలు న‌ష్టాల్లోనే..

నిఫ్టీలో ప్రధానంగా నెస్లే ఇండియా, టాటా మోటార్స్ ప్యాసింజర్ వెహికల్స్, హెచ్‌డీఎఫ్‌సీ లైఫ్, కోల్ ఇండియా, హెచ్‌డీఎఫ్‌సీ బ్యాంక్ షేర్లు నష్టపోయిన వాటిలో ముందున్నాయి. మరోవైపు బజాజ్ ఫైనాన్స్, సిప్లా, భారతీ ఎయిర్‌టెల్, బజాజ్ ఆటో, ఐసీఐసీఐ బ్యాంక్ షేర్లు లాభాలను నమోదు చేశాయి. రంగాల వారీగా చూస్తే దాదాపు అన్ని రంగాల సూచీలు నష్టాల్లో ముగిశాయి. ఆటోమొబైల్, ఇన్ఫర్మేషన్ టెక్నాలజీ, ఇంధన, ఎఫ్‌ఎంసీజీ రంగాల సూచీలు ఒక్కొక్కటి సుమారు ఒక శాతం చొప్పున పడిపోయాయి. మీడియా రంగ సూచీ రెండు శాతం నష్టపోయింది. మరోవైపు ఐటీ సూచీ 2.5 శాతం పెరిగినట్లు గణాంకాలు వెల్లడించాయి. కన్జ్యూమర్ డ్యూరబుల్స్, ఇంధన, మీడియా, మెటల్, ఫార్మా, ఆటోమొబైల్, ప్రైవేట్ బ్యాంకింగ్ రంగాల సూచీలు ఒకటి నుంచి రెండు శాతం మేర క్షీణించాయి.

విస్తృత మార్కెట్ల‌లోనూ అమ్మ‌కాల ఒత్తిడి..

మిడ్‌క్యాప్, స్మాల్‌క్యాప్ విభాగాల్లోనూ అమ్మకాల ఒత్తిడి కనిపించింది. నిఫ్టీ మిడ్‌క్యాప్ సూచీ, స్మాల్‌క్యాప్ సూచీ చెరో ఒక శాతం చొప్పున నష్టపోయాయి. దీంతో పెద్ద కంపెనీల షేర్లతో పాటు మధ్యస్థ, చిన్న కంపెనీల షేర్లలోనూ ఇన్వెస్టర్లు అమ్మకాలకు మొగ్గుచూపినట్లు స్పష్టమైంది. మార్కెట్‌లో ఒడిదుడుకులను సూచించే ఇండియా విక్స్ 0.14 శాతం పెరిగి 15.82 స్థాయికి చేరుకుంది. ఇది మార్కెట్‌లో అస్థిరత స్వల్పంగా పెరిగినట్లు సూచిస్తోంది. మరోవైపు, డాలర్‌తో పోలిస్తే భారత రూపాయి విలువ కూడా బలహీనపడింది. గురువారం రూపాయి 36 పైసలు క్షీణించి డాలర్‌కు రూ.94.82 వద్ద ముగిసింది. అంతకుముందు సెషన్‌లో ఇది రూ.94.46 వద్ద ఉంది. పెరుగుతున్న ముడి చమురు ధరలు, భౌగోళిక రాజకీయ పరిణామాలు మార్కెట్‌ల‌పై ఒత్తిడిని కొనసాగిస్తున్నాయి.