Harish Rao Father in Law | హరీష్‌రావు మామకు హైకోర్టులో ఊరట: బలవంతంగా ఖాళీ చేయించొద్దు

• భూ వివాదంలో న్యాయస్థానం కీలక ఆదేశాలు

Harish Rao Father in Law | త్రినేత్ర న్యూస్ : బీఆర్‌ఎస్ సీనియర్ నేత, మాజీ మంత్రి తన్నీరు హరీష్‌రావు మామ మాధవరావు హన్మంతరావుకు తెలంగాణ హైకోర్టులో ఊరట లభించింది. సిద్దిపేట జిల్లా పరిధిలోని 3.22 ఎకరాల భూమి విషయంలో ప్రభుత్వం ఆయనపై ఎలాంటి బలవంతపు లేదా తొందరపాటు చర్యలు తీసుకోవద్దని న్యాయస్థానం స్పష్టమైన మధ్యంతర ఆదేశాలు జారీ చేసింది.

సిద్దిపేట జిల్లా కొండపాక మండలం వెలికట్ట రెవెన్యూ పరిధిలోని అసైన్డ్ భూముల కేటాయింపు, యాజమాన్య హక్కులపై ఇటీవల స్థానిక రెవెన్యూ అధికారులు హన్మంతరావుకు షోకాజ్ నోటీసులు జారీ చేశారు. ఆ భూమిని ఖాళీ చేయించేందుకు అధికారులు ప్రయత్నిస్తున్నారన్న ఆందోళనతో ఆయన హైకోర్టును ఆశ్రయించారు.

బలవంతపు చర్యలు వద్దు.. నోటీసుకు సమాధానమివ్వండి

ఈ పిటిషన్‌పై విచారణ చేపట్టిన హైకోర్టు ధర్మాసనం ఇరుపక్షాల వాదనలను పరిశీలించింది. సదరు 3.22 ఎకరాల భూమి నుంచి హన్మంతరావును అక్రమంగా ఖాళీ చేయించవద్దని (ఎవిక్ట్ చేయరాదని) అధికారులకు తేల్చిచెప్పింది.

అదే సమయంలో, రెవెన్యూ విభాగం జారీ చేసిన షోకాజ్ నోటీసులకు నిర్ణీత గడువులోగా లిఖితపూర్వకంగా వివరణ (రిప్లై) సమర్పించాలని పిటిషనర్ హన్మంతరావును ఆదేశించింది. ఆయన సమర్పించే వివరణపై చట్టబద్ధంగా ప్రక్రియ కొనసాగే వరకు అధికారులు ఎలాంటి తొందరపాటు చర్యలకు పాల్పడరాదని స్పష్టం చేస్తూ తదుపరి విచారణను వాయిదా వేసింది. హైకోర్టు తాజా ఆదేశాలతో ఈ భూ వివాదంలో హరీష్ రావు కుటుంబానికి తాత్కాలికంగా ఊరట లభించినట్లయింది.