Iran US conflict | శాంతి ప్రతిపాదనను తిరస్కరించిన ట్రంప్: అమెరికాకు తీవ్ర నష్టం తప్పదంటూ ఇరాన్ ఆర్మీ వార్నింగ్

Iran US conflict | త్రినేత్ర న్యూస్ : పశ్చిమాసియాలో అమెరికా-ఇరాన్ మధ్య యుద్ధ మేఘాలు మళ్లీ కమ్ముకుంటున్నాయి. అంతర్జాతీయ వాణిజ్యానికి అత్యంత కీలకమైన హార్ముజ్ జలసంధిని (Strait of Hormuz) తిరిగి తెరిచేందుకు వచ్చిన వారం రోజుల ప్రతిపాదనను అమెరికా అధ్యక్షుడు డొనాల్డ్ ట్రంప్ తిరస్కరించినట్లు వార్తలు వెలువడటంతో ఒక్కసారిగా ఉద్రిక్తతలు రాజుకున్నాయి. దీనిపై తీవ్రస్థాయిలో స్పందించిన టెహ్రాన్.. తాము పూర్తిస్థాయి ఘర్షణకు సిద్ధంగా ఉన్నామని, అమెరికాపై ఈసారి తీవ్రమైన స్థాయిలో ఎదురుదాడి చేస్తామని గట్టి హెచ్చరికలు జారీ చేసింది.

ముందుకు రాని ఒప్పందం.. ట్రంప్ దూకుడు

ప్రపంచ చమురు రవాణాలో కీలక పాత్ర పోషించే హార్ముజ్ జలసంధిపై నెలకొన్న ప్రతిష్టంభనను తొలగించేందుకు ఇరు దేశాల ప్రతినిధులు ఒక పరిష్కారాన్ని పరిశీలించారు. ఇరాన్ జలసంధిని తెరవడం, దానికి బదులుగా ఇరాన్ నౌకాశ్రయాలపై విధించిన దిగ్బంధాన్ని అమెరికా ఎత్తివేయడం ఈ డీల్ ముఖ్య ఉద్దేశం. అయితే,  ట్రంప్ మాట్లాడుతూ.. "వారు ఒక ప్రపోజల్ తెచ్చారు, కానీ నేను దాన్ని రిజెక్ట్ చేశాను. యుద్ధంలో తీవ్రంగా నష్టపోతుండటం వల్లే వారు వెంటనే సంధిని తెరవాలనుకుంటున్నారు" అని పేర్కొన్నారు.

అమెరికాకు ఊహించని నష్టం తప్పదు: ఇరాన్ సైన్యం

ట్రంప్ వ్యాఖ్యల నేపథ్యంలో ఇరాన్ సైనిక అధికార ప్రతినిధి మహమ్మద్ అక్రమినియా ఆదివారం మీడియాతో మాట్లాడుతూ.. తమ దేశం ఏ రకమైన దాడినైనా ఎదుర్కొనేందుకు సిద్ధంగా ఉందని స్పష్టం చేశారు. అమెరికా తమపై కొత్త దాడులకు దిగితే, వాషింగ్టన్ ఊహించని రీతిలో భారీ నష్టాన్ని చవిచూడాల్సి వస్తుందని వార్నింగ్ ఇచ్చారు.

మరోవైపు ఇరాన్ విదేశాంగ మంత్రి అబ్బాస్ అరాఘ్చి మాట్లాడుతూ.. ట్రంప్ వ్యాఖ్యల్లో ఎన్నో పరస్పర విరుద్ధ అంశాలు ఉన్నాయని విమర్శించారు. మధ్యవర్తులుగా వ్యవహరిస్తున్న ఖతార్, పాకిస్తాన్ ద్వారా అమెరికా నుంచి ఖచ్చితమైన అధికారిక సమాధానం కోసం తాము ఇంకా వేచి చూస్తున్నామని, చర్చల ద్వారా మాత్రమే జలసంధి ప్రతిష్టంభనకు పరిష్కారం దొరుకుతుందని ఆయన పునరుద్ఘాటించారు.

మళ్లీ పెరుగుతున్న దాడుల తీవ్రత

రాయబారాలు నడుస్తున్న సమయంలోనే శనివారం సౌదీ అరేబియా రాజధాని రియాద్‌పై ఇరాన్ మద్దతు ఉన్న యెమెన్ హౌతీ తిరుగుబాటుదారులు దాడికి పాల్పడటం గల్ఫ్ ప్రాంతంలో టెన్షన్‌ను రెట్టింపు చేసింది. నవంబర్ మొదటి వారంలో అమెరికాలో జరగనున్న మధ్యంతర ఎన్నికల (Midterms) తర్వాత ఇరాన్‌పై బాంబు దాడులను పునరుద్ధరించే యోచనలో ట్రంప్ ఉన్నట్లు వాల్ స్ట్రీట్ జర్నల్ నివేదికలు సూచిస్తున్నాయి. దీనిపై అడిగిన ప్రశ్నకు ట్రంప్ నేరుగా సమాధానం దాటవేశారు.

ఇటీవల ఐక్యరాజ్యసమితి సాధారణ సభలో (UNGA) మాట్లాడిన ఇరాన్ అధ్యక్షుడు మసౌద్ పెజెష్కియాన్.. తమపై విధించిన ఆంక్షలు, నావికా దిగ్బంధాన్ని పూర్తిగా ఎత్తివేసేవరకు హార్ముజ్ జలసంధి గుండా సాధారణ రాకపోకలను అనుమతించే ప్రసక్తే లేదని తేల్చి చెప్పారు. తాజా పరిణామాలతో పశ్చిమాసియాలో చమురు రవాణా, అంతర్జాతీయ భద్రతపై మళ్లీ అనిశ్చితి నెలకొంది.