US-Israel-Iran War Ceasefire | శాంతి ఒప్పందం కుదిరిన కొన్ని గంట్లోనే ఇరాన్ ఆయిల్ రిఫైనరీపై ఇజ్రాయెల్ దాడి

• యూఎస్, ఇరాన్ వార్‌కి రెండు వారాల బ్రేక్
• అయినా ఆగని దాడులు 
• లెబనాన్‌పై ఇజ్రాయెల్ దాడి
• యూఎస్‌పై తమకు నమ్మకం లేదన్న ఇరాన్ గార్డ్స్
• యూఏఈ, కువైట్‌పై ఇరాన్ మిస్సైల్స్

US-Israel-Iran War Ceasefire |  త్రినేత్ర.న్యూస్ : పశ్చిమాసియా లో భీకర దాడులతో దద్దరిల్లుతున్న వేళ అనూహ్య పరిణామం చోటుచేసుకుంది. అమెరికా, ఇరాన్ మధ్య రెండు వారాల పాటు తాత్కాలిక కాల్పుల విరమణ ఒప్పందం కుదిరింది. పాకిస్థాన్ ప్రధాని షెహబాజ్ షరీఫ్, ఆర్మీ చీఫ్ అసిమ్ మునీర్ చేసిన దౌత్యపరమైన విజ్ఞప్తులతో.. ఇరాన్‌పై సైనిక చర్యను నిలిపివేస్తున్నట్లు అమెరికా అధ్యక్షుడు డొనాల్డ్ ట్రంప్ ప్రకటించారు. అయితే, ఈ శాంతి ఒప్పందం కుదిరిన కొన్ని గంటల్లోనే ఇరాన్‌లోని ఆయిల్ రిఫైనరీపై దాడి జరగడం, ఇజ్రాయెల్ లెబనాన్‌పై దాడులు ముమ్మరం చేయడంతో ఈ ఒప్పందం మనుగడ ప్రశ్నార్థకంగా మారింది.

ట్రంప్ హెచ్చరిక.. పాక్ దౌత్యం

"మరో కొద్ది గంటల్లో ఇరాన్ లొంగిపోకపోతే, ఒక నాగరికత మొత్తం అంతరించిపోతుంది" అని హెచ్చరించిన డొనాల్డ్ ట్రంప్.. ఆ తర్వాత కొద్దిసేపటికే తన నిర్ణయాన్ని మార్చుకున్నారు. పాక్ నేతలతో చర్చల అనంతరం, రెండు వారాల పాటు ఇరాన్‌పై దాడులు నిలిపివేస్తున్నట్లు 'ట్రూత్ సోషల్' వేదికగా ప్రకటించారు. ఇరాన్ కూడా పాకిస్థాన్ ప్రతిపాదించిన రెండు వారాల కాల్పుల విరమణకు అంగీకరించింది. ఇరాన్ కొత్త సుప్రీం లీడర్ ఈ ఒప్పందానికి ఆమోదం తెలిపారు. అయితే, ఇది యుద్ధ ముగింపు కాదని, తమ 10-అంశాల ప్రతిపాదన (ఆంక్షల ఎత్తివేత, పరిహారం, స్తంభింపచేసిన ఆస్తుల విడుదల తదితరాలు) నెరవేరితేనే శాంతి కుదురుతుందని ఇరాన్ స్పష్టం చేసింది. తదుపరి చర్చలు ఏప్రిల్ 10న (శుక్రవారం) ఇస్లామాబాద్‌లో జరగనున్నాయి.

అగ్రరాజ్యంపై ఇరాన్ గార్డ్స్ అవిశ్వాసం

కాల్పుల విరమణ ప్రకటించినప్పటికీ.. అమెరికా హామీలపై తమకు 'నమ్మకం లేదు' అని ఇరాన్ రివల్యూషనరీ గార్డ్స్ తేల్చిచెప్పింది. శత్రువు ఏ చిన్న తప్పు చేసినా, తమ వేలు ఇంకా ట్రిగ్గర్‌పైనే ఉందని తీవ్రంగా హెచ్చరించింది. మరోవైపు అమెరికా ఉపాధ్యక్షుడు జేడీ వాన్స్ స్పందిస్తూ.. ఇది అత్యంత సున్నితమైన ఒప్పందమని, ఇరాన్ చిత్తశుద్ధితో వ్యవహరించకపోతే ట్రంప్ సహనం కోల్పోయే ప్రమాదం ఉందని హెచ్చరించారు.

ఒప్పందం తర్వాతా దాడుల పరంపర

కాల్పుల విరమణ అమలులోకి వచ్చిన గంటల వ్యవధిలోనే పశ్చిమాసియాలో దాడులు కొనసాగాయి. ఇరాన్‌లోని లావన్ ద్వీపంలో ఉన్న చమురు శుద్ధి కర్మాగారంపై బుధవారం ఉదయం గుర్తుతెలియని శత్రు దాడులు జరిగాయి. ఎలాంటి ప్రాణనష్టం జరగనప్పటికీ, మంటలను ఆర్పేందుకు అగ్నిమాపక సిబ్బంది రంగంలోకి దిగారు.

యూఏఈ, కువైట్‌పై మిస్సైల్స్: ఇరాన్ వైపు నుంచి దూసుకొచ్చిన బాలిస్టిక్, క్రూయిజ్ క్షిపణులు, డ్రోన్‌లను యునైటెడ్ అరబ్ ఎమిరేట్స్ ఎయిర్ డిఫెన్స్ సిస్టమ్స్ గగనతలంలోనే అడ్డుకున్నాయి. కువైట్ వైపు కూడా దాడులు జరిగినట్లు సమాచారం.

లెబనాన్‌లో ఇజ్రాయెల్ దాడులు: కాల్పుల విరమణ తమకు వర్తించదన్నట్లుగా ఇజ్రాయెల్ ప్రవర్తిస్తోంది. లెబనాన్ రాజధాని బీరుట్‌లోని హిజ్బుల్లా స్థావరాలపై ఇజ్రాయెల్ సైన్యం బాంబుల వర్షం కురిపించింది. దాడుల నేపథ్యంలో పలు ప్రాంతాల ప్రజలు ఇళ్లు ఖాళీ చేసి వెళ్లాలని వార్నింగ్ ఇచ్చింది.

షెహబాజ్ షరీఫ్ 'డ్రాఫ్ట్' గందరగోళం

మధ్యవర్తిగా వ్యవహరించిన పాక్ ప్రధాని షెహబాజ్ షరీఫ్‌కు సోషల్ మీడియాలో వింత అనుభవం ఎదురైంది. కాల్పుల విరమణ గురించి ఎక్స్ లో పోస్ట్ చేస్తూ.. పైభాగంలో "Draft - Pakistan's PM Message on X" అని ఉన్న వాక్యాన్ని డిలీట్ చేయకుండానే పోస్ట్ చేశారు. వెంటనే దాన్ని ఎడిట్ చేసినప్పటికీ, ఈ సందేశాన్ని అమెరికా లేదా ఇజ్రాయెల్ పంపి ఉంటే, షరీఫ్ దాన్ని గుడ్డిగా కాపీ-పేస్ట్ చేశారని నెటిజన్లు తీవ్ర స్థాయిలో ట్రోల్ చేస్తున్నారు.

ప్రపంచ దేశాల స్పందన

భారత్ స్వాగతం: పశ్చిమాసియాలో శాంతిని నెలకొల్పేందుకు ఈ ఒప్పందం దోహదపడుతుందని భారత విదేశాంగ శాఖ ఆశాభావం వ్యక్తం చేసింది. హార్ముజ్ జలసంధి గుండా వాణిజ్యం నిరంతరాయంగా కొనసాగాలని ఆకాంక్షించింది.

హార్ముజ్ జలసంధి ఓపెన్: ఒప్పందంలో భాగంగా ఇరాన్ హార్ముజ్ జలసంధిని తెరిచింది. ఇప్పటికే రెండు వాణిజ్య నౌకలు అక్కడి నుంచి సురక్షితంగా ప్రయాణించాయి. అయితే నార్వే షిప్పింగ్ కంపెనీలు, మెర్స్క్ వంటి దిగ్గజాలు మాత్రం పరిస్థితులు ఇంకా క్లియర్‌గా లేవని ప్రయాణాలను వాయిదా వేసుకున్నాయి.

హమాస్ హర్షం: ఈ ఒప్పందాన్ని "అమెరికా ఆధిపత్యాన్ని తగ్గించే ముఖ్యమైన అడుగు" అని హమాస్ అభివర్ణించింది.

ఖతార్, టర్కీ మద్దతు: ఈ ఒప్పందాన్ని స్వాగతించిన ఖతార్, టర్కీ దేశాలు.. ప్రాంతీయ స్థిరత్వం కోసం ఇరాన్ శత్రుత్వ చర్యలను తక్షణమే విరమించుకోవాలని కోరాయి.

యూఏఈలో అరెస్టులు: సోషల్ మీడియాలో తప్పుడు సమాచారం వ్యాప్తి చేస్తున్నారన్న ఆరోపణలతో అబుదాబిలో 375 మందిని అధికారులు అదుపులోకి తీసుకున్నారు.

ఈ పరిణామాల నేపథ్యంలో, పేరుకు కాల్పుల విరమణ ఉన్నప్పటికీ క్షేత్రస్థాయిలో దాడులు కొనసాగుతుండటంతో పశ్చిమాసియాలో ఏ క్షణంలో ఏం జరుగుతుందోనన్న ఆందోళన ప్రపంచ దేశాలను కలవరపెడుతోంది.