Bangladesh Oath Ceremony 2026 | భారత్‌కి రండి.. బంగ్లాదేశ్ నూతన ప్రధాని రెహమాన్‌కి స్పీకర్ ఓంబిర్లా ఆహ్వానం

Bangladesh Oath Ceremony 2026 | బంగ్లాదేశ్ నూతన ప్రధానిగా బీఎన్‌పీ పార్టీ అధినేత తారీఖ్ రెహమాన్ మంగళవారం ప్రమాణ స్వీకారం చేశారు. తారీఖ్ రెహమాన్‌తో బంగ్లాదేశ్ అధ్యక్షుడు మహమ్మద్ షాహబుద్దీన్ ప్రమాణ స్వీకారం చేయించారు. దాదాపు 17 ఏళ్ల ప్రవాస జీవితం తర్వాత సొంత దేశానికి తిరిగి వచ్చిన రెహమాన్ దాదాపు 35 ఏళ్ల తర్వాత బంగ్లాదేశ్‌కి తొలి పురుష ప్రధానిగా ఎన్నికయ్యారు. గత 35 ఏళ్ల నుంచి బంగ్లాను ఇద్దరు మహిళా నేతలే ఏలారు. ఈ ప్రమాణ స్వీకారాన్ని జమాత్ ఈ ఇస్లామీ, ఎన్‌సీపీ పార్టీలు బహిష్కరించాయి.

రెహమాన్ ప్రమాణ స్వీకారానికి భారత్ తరుపున లోక్ సభ స్పీకర్ ఓం బిర్లా హాజరయ్యారు. ఢాకాలో జరిగిన ఈ ప్రమాణ స్వీకారానికి పలువురు ఇతర అంతర్జాతీయ నేతలు హాజరయ్యారు. పాకిస్థాన్ మంత్రి అహ్సన్ ఇక్బాల్ బంగ్లాకు వచ్చారు. ఇక 13వ బంగ్లాదేశ్ పార్లమెంట్‌కి ప్రతిపక్ష నేతగా జమాత్ ఈ ఇస్లామీ పార్టీ చీఫ్ శఫిక్వుర్ రెహమాన్‌ను ఎన్నుకున్నారు. ప్రతిపక్ష చీఫ్ విప్‌గా నేషనల్ సిటిజన్ పార్టీ కన్వెనర్ నాహిద్ ఇస్లామ్ పేరును నామినేట్ చేశారు.

ప్రమాణ స్వీకారం అనంతరం రెహమాన్‌తో ఓం బిర్లా భేటీ అయ్యారు. ఈసందర్భంగా భారత్‌ను సందర్శించాలని రెహమాన్‌ని ఆహ్వానించారు. తారీఖ్ రెహమాన్ నేతృత్వంలో నూతనంగా ఏర్పడిన  ప్రభుత్వం ప్రజాస్వామ్యయుతమైన, ప్రగతిశీల, అందరినీ కలుపుకుపోయే బంగ్లాదేశ్ నిర్మాణానికి భారత్ సహకారం ఎప్పటికీ ఉంటుందని ఎక్స్ వేదికగా ఓం బిర్లా ట్వీట్ చేశారు.