Alice Huang Megaspeed | ఎన్విడియా వివాదంలో బిగ్ ట్విస్ట్: “అలిస్ హువాంగ్ ఎప్పుడో రిజైన్ చేసింది”

•  చైనా చిప్స్ ఆరోపణలపై 'మెగాస్పీడ్' క్లారిటీ

Alice Huang Megaspeed | త్రినేత్ర న్యూస్ : గ్లోబల్ టెక్ దిగ్గజం ఎన్విడియా (Nvidia) మాజీ సీఈవో జెన్సన్ హువాంగ్ రాజీనామా, చైనా గూఢచర్య ఆరోపణల వ్యవహారం ఇప్పుడు అంతర్జాతీయ టెక్ వర్గాల్లో పెను సంచలనం రేపుతోంది. ఈ వివాదంలో ప్రధానంగా వినిపిస్తున్న చైనా వ్యాపారవేత్త అలిస్ హువాంగ్‌పై సింగపూర్ కేంద్రంగా పనిచేస్తున్న క్లౌడ్ కంప్యూటింగ్ సంస్థ 'మెగాస్పీడ్' (Megaspeed) ఆదివారం కీలక ప్రకటన విడుదల చేసింది. ఆలిస్ హువాంగ్ 2025 ఆగస్టు 30నే తమ కంపెనీ నుంచి అధికారికంగా తప్పుకున్నారని, ప్రస్తుతం సంస్థ కార్యకలాపాలతో ఆమెకు ఎలాంటి సంబంధం లేదని మెగాస్పీడ్ స్పష్టం చేసింది.

వ్యక్తిగత విషయాలపై స్పందించం

మీడియాతో పంచుకున్న ప్రకటనలో మెగాస్పీడ్ కీలక విషయాలను వెల్లడించింది. "అలిస్ హువాంగ్ 2025 ఆగస్టు 30 నుంచే మెగాస్పీడ్ నుంచి వైదొలిగారు. ప్రస్తుతం ఆమె కంపెనీలో ఏ హోదాలోనూ లేరు. ఆలిస్ వ్యక్తిగత, ప్రైవేట్ విషయాలపై మేము ఎలాంటి వ్యాఖ్యలు చేయదలచుకోలేదు" అని కంపెనీ తేల్చి చెప్పింది. అంతేకాకుండా, తమ వ్యాపారం, సప్లై చైన్, గ్లోబల్ ఆపరేషన్స్‌పై మీడియాలో వస్తున్న ఆరోపణలకు ఎలాంటి ఆధారాలు లేవని కొట్టిపారేసింది. తాము పూర్తిగా చట్టబద్ధమైన వ్యాపారమే చేస్తున్నామని, ఈ వ్యవహారంపై లోతైన అంతర్గత విచారణ జరిపేందుకు బయటి లీగల్ కౌన్సెల్‌ను నియమించుకున్నామని తెలిపింది.

అసలేంటి ఈ వివాదం? జెన్సన్ హువాంగ్ రాజీనామా ఎందుకు?

ఎన్విడియా వ్యవస్థాపకుడు, సీఈవో జెన్సన్ హువాంగ్ తన వివాహేతర సంబంధాలపై వార్తలు రావడంతో నవంబర్ 12న తన పదవికి రాజీనామా చేశారు. ఆయనతో సన్నిహిత సంబంధం ఉన్న వారిలో మెగాస్పీడ్ మాజీ ఎగ్జిక్యూటివ్ అలిస్ హువాంగ్ కూడా ఉన్నట్లు కథనాలు వచ్చాయి.

మరోవైపు, 'ది న్యూయార్క్ టైమ్స్' కథనం ప్రకారం.. అలిస్ హువాంగ్ చైనా నిఘా సంస్థ (MSS) కోసం పనిచేసే 'ఇంటెలిజెన్స్ అసెట్' (గూఢచారి) అని అమెరికా నిఘా వర్గాలు బలంగా నమ్ముతున్నాయి. జెన్సన్ హువాంగ్, ఎన్విడియా కంపెనీని లక్ష్యంగా చేసుకుని కీలక సమాచారాన్ని బీజింగ్‌కు చేరవేసే ఆపరేషన్‌లో భాగంగానే చైనా ఆమెను నియమించుకుందని అమెరికా ఏజెన్సీలు అనుమానిస్తున్నాయి.

చైనాకు అక్రమంగా ఏఐ చిప్స్ తరలింపు?

ఆసియా-పసిఫిక్ ప్రాంతంలో ఎన్విడియా కంప్యూటింగ్ పవర్ క్లౌడ్ బిజినెస్‌లో మెగాస్పీడ్ ఒక ప్రధాన భాగస్వామి (Core Business Partner). సింగపూర్, ఇండోనేషియాలో కార్యాలయాలు ఉన్న ఈ సంస్థ, ఎన్విడియా జీపీయూ (GPU) చిప్స్ ద్వారా కస్టమర్లకు కంప్యూటింగ్ పవర్‌ను అద్దెకు ఇస్తుంటుంది.

అయితే, అమెరికా ఆంక్షలు ఉన్నప్పటికీ.. మెగాస్పీడ్ ఒక ముసుగు సంస్థగా వ్యవహరిస్తూ అత్యంత శక్తివంతమైన ఎన్విడియా ఏఐ (AI) చిప్స్‌ను చైనాకు అక్రమంగా తరలిస్తోందన్న అనుమానంతో అమెరికా అధికారులు 2024 నుంచే దర్యాప్తు చేస్తున్నారు. తాజాగా సింగపూర్ హోం వ్యవహారాల మంత్రిత్వ శాఖ కూడా ఈ వ్యవహారంపై విచారణ ప్రారంభించింది. ఈ నేపథ్యంలో, తమపై వస్తున్న ఆరోపణలన్నింటినీ మెగాస్పీడ్ తాజా ప్రకటన ద్వారా తోసిపుచ్చింది.