Copa Airlines UPS Crash | రన్‌వేపై ఢీకొన్న రెండు విమానాలు

• మియామి ఎయిర్‌పోర్ట్‌లో తప్పిన పెను ప్రమాదం
• "మమ్మల్ని ఎవరో ఢీకొట్టారు" అంటూ పైలట్ కంగారు

Copa Airlines UPS Crash | త్రినేత్ర న్యూస్ : అమెరికాలోని మియామి ఇంటర్నేషనల్ ఎయిర్‌పోర్ట్‌లో పెను ప్రమాదం తృటిలో తప్పింది. శనివారం రాత్రి ఎయిర్‌పోర్ట్ టార్మాక్ (రన్‌వే సమీప మార్గం) పై ఒక ప్యాసింజర్ విమానం, మరో కార్గో విమానం పరస్పరం ఢీకొన్నాయి. ఈ ఘటనలో కోపా ఎయిర్‌లైన్స్ (Copa Airlines) విమానంలోని 172 మంది ప్రయాణికులు, సిబ్బంది సురక్షితంగా బయటపడగా.. ఇద్దరికి స్వల్ప గాయాలయ్యాయి. ఈ ప్రమాదంపై అమెరికా విమానయాన నియంత్రణ సంస్థ (FAA) ఉన్నత స్థాయి విచారణకు ఆదేశించింది.

అసలేం జరిగింది?

పనామా సిటీ నుంచి 166 మంది ప్రయాణికులు, ఆరుగురు సిబ్బందితో వచ్చిన కోపా ఎయిర్‌లైన్స్ బోయింగ్ 737 విమానం మియామి ఎయిర్‌పోర్ట్‌లో ల్యాండ్ అయి, సాధారణ వేగంతో గేట్ వైపు వెళ్తోంది. అదే సమయంలో, కొలంబియాలోని బొగోటాకు టేకాఫ్ అయ్యేందుకు యూపీఎస్ (UPS) బోయింగ్ 767 కార్గో విమానం సిద్ధమవుతోంది.

ప్రాథమిక సమాచారం ప్రకారం.. ప్యాసింజర్ విమానం వెళ్లేందుకు వీలుగా దారి ఇవ్వాలని ఎయిర్ ట్రాఫిక్ కంట్రోలర్లు (ATC) కార్గో విమాన సిబ్బందికి స్పష్టంగా సూచించారు. అయినప్పటికీ, రెండు టాక్సీవేలు కలిసే చోట కార్గో విమానం ముందుకు రావడంతో.. ప్యాసింజర్ విమానం ఎడమ రెక్క చివరి భాగం (వింగ్‌టిప్).. కార్గో విమానం ముందు భాగాన్ని (నోస్) బలంగా ఢీకొట్టింది.

ఏటీసీ ఆడియోలో ఉత్కంఠ.. పైలట్లు ఏమన్నారంటే?

ప్రమాదం జరిగిన వెంటనే పైలట్లు, కంట్రోల్ టవర్ మధ్య జరిగిన సంభాషణ (ATC Audio) ఇప్పుడు బయటకు వచ్చింది.

"మమ్మల్ని ఎవరో ఢీకొట్టారు" అంటూ కోపా ఎయిర్‌లైన్స్ పైలట్ కంగారుగా కంట్రోల్ టవర్‌కు సమాచారం ఇచ్చారు.

వెంటనే అప్రమత్తమైన కంట్రోలర్.. విమానాన్ని ఢీకొట్టారా అని యూపీఎస్ కార్గో పైలట్‌ను ప్రశ్నించారు. దీనికి బదులుగా, "అవును, మేము కొంచెం ముందుకు వచ్చేశాము.. దాంతో ఆ విమానం రెక్క మమ్మల్ని తాకింది" అని యూపీఎస్ పైలట్ అంగీకరించారు.

ఆ వెంటనే కోపా ఎయిర్‌లైన్స్ పైలట్ స్పందిస్తూ, "మా విమానం ఎడమ వింగ్‌టిప్ (రెక్క చివరి భాగం) ఊడిపోయినట్లు కనిపిస్తోంది" అని రిపోర్ట్ చేశారు.

172 మంది ప్రయాణికులు సేఫ్

ప్రమాద సమాచారం అందుకున్న మయామి-డేడ్ ఫైర్ రెస్క్యూ సిబ్బంది వెంటనే ఘటనా స్థలానికి చేరుకున్నారు. ఈ ఘటనలో స్వల్పంగా గాయపడిన ఇద్దరికి అక్కడికక్కడే ప్రాథమిక చికిత్స అందించారు. ఆసుపత్రిలో చేరాల్సిన అవసరం రాలేదని అధికారులు తెలిపారు.

విమానాన్ని టోయింగ్ వాహనం సాయంతో గేట్ వద్దకు తీసుకెళ్లి.. 172 మందిని సురక్షితంగా కిందకు దించారు. ప్రయాణికులకు కలిగిన అసౌకర్యానికి కోపా ఎయిర్‌లైన్స్ విచారం వ్యక్తం చేసింది. తమ ప్రయాణికుల భద్రతే తమకు అత్యంత ముఖ్యమని.. విచారణకు పూర్తిగా సహకరిస్తామని కోపా ఎయిర్‌లైన్స్, యూపీఎస్ సంస్థలు వేర్వేరు ప్రకటనల్లో వెల్లడించాయి.

వరుస ఘటనలతో ప్రయాణికుల ఆందోళన

అంతకుముందు రోజు (శుక్రవారం) కూడా సాంకేతిక కారణాలతో ఎఫ్ఏఏ (FAA) 'గ్రౌండ్ స్టాప్' విధించడంతో అమెరికా వ్యాప్తంగా వందలాది విమానాలు రద్దయ్యాయి. వేలాది మంది ప్రయాణికులు ఎయిర్‌పోర్ట్ టెర్మినళ్లలోనే నిద్రపోతూ తీవ్ర ఇబ్బందులు పడ్డారు. ఆ ఘటన జరిగిన 24 గంటల్లోపే మియామి ఎయిర్‌పోర్ట్‌లో రెండు విమానాలు ఢీకొనడం అమెరికా విమానయాన రంగంలో కలకలం రేపుతోంది. అయితే, ఈ రెండు ఘటనలకు ఎలాంటి సంబంధం లేదని, కార్గో పైలట్ తప్పిదంపై లోతుగా దర్యాప్తు చేస్తున్నామని ఎఫ్ఏఏ స్పష్టం చేసింది.

🚨 PLANES COLLIDE IN MIAMI:

A UPS Boeing 767 and a Copa Airlines 737 made contact on the ground at Miami International tonight, according to air traffic control audio.

The Copa pilot radios in: "Somebody hit us."

Ground control fires back at UPS: "You're supposed to give way to the 73 there... did you hit that aircraft?"

UPS: "Yeah, we went too far."

Friday the whole country was grounded.

Tonight Love Field shut down over a reported bomb threat and two jets traded paint in Miami.

What a weekend to fly. https://t.co/s9sz7ACSvE

— Gunther Eagleman™ (@GuntherEagleman) November 15, 2026