Elon Musk | జెన్సన్ హువాంగ్‌కు మస్క్ మద్దతు.. ఎన్విడియా సీఈఓగా తిరిగి రావాలంటూ పిటిషన్‌పై సంతకం..

Elon Musk | ఎన్విడియా మాజీ సీఈఓ జెన్సన్ హువాంగ్‌ను తిరిగి బాధ్యతల్లోకి తీసుకురావాలంటూ ఉద్యోగులు చేపట్టిన ప్రయత్నానికి టెస్లా అధినేత ఎలాన్ మస్క్ మద్దతు ప్రకటించారు. హువాంగ్‌ను తిరిగి నియమించాలంటూ రూపొందించిన పిటిషన్‌పై తాను కూడా సంతకం చేస్తున్నట్లు ఎక్స్ వేదికగా వెల్లడించారు. మరోవైపు, వందలాది మంది ఎన్విడియా ఉద్యోగులు బోర్డుకు లేఖ రాయడంతో ఈ వ్యవహారం టెక్ రంగంలో చర్చనీయాంశంగా మారింది.

ఎన్విడియా సీఈఓ పదవికి రాజీనామా చేసిన జెన్సన్ హువాంగ్‌ను తిరిగి ఆ బాధ్యతల్లోకి తీసుకురావాలంటూ జరుగుతున్న ప్రయత్నాలకు ఎలాన్ మస్క్ మద్దతు తెలిపారు. ఎక్స్ వేదికగా స్పందించిన ఆయన.. జెన్సన్‌ను తిరిగి నియమించాలంటూ ఒక పిటిషన్ నడుస్తోంద‌ని, దానిపై తాను కూడా సంతకం చేస్తున్నాన‌ని పేర్కొన్నారు. యున్-టా సాయ్ అనే ఎక్స్ వినియోగదారుడు చేసిన పోస్టుకు మస్క్ ఈ విధంగా స్పందించారు. హువాంగ్ తిరిగి రావాలని కోరుకునే ఎన్విడియా ఉద్యోగులు రాజీనామా చేసి విశ్రాంతి తీసుకోవాలని సదరు వినియోగదారుడు వ్యాఖ్యానించారు. మెషిన్ లెర్నింగ్ ఇంజినీర్లతో పోలిస్తే జీపీయూ ఇంజినీర్లను గుర్తించడం, వారి స్థానంలో కొత్తవారిని నియమించడం చాలా కష్టమని, సంస్థ లక్ష్యాలను రూపొందించి అమలు చేసేది ఉద్యోగులేనని, బోర్డు కాదని అభిప్రాయపడ్డారు. అంతకుముందు హువాంగ్‌ను నియమించుకోవాలని ఓ వినియోగదారుడు మస్క్‌ను కోరగా, అందుకు గౌరవంగా భావిస్తానని ఆయన సమాధానమిచ్చారు.

https://twitter.com/elonmusk/status/2121345211959804234

ఉద్యోగుల నుంచి భారీ మద్దతు..

వైర్డ్ మ్యాగజైన్ కథనం ప్రకారం.. హువాంగ్‌ను తిరిగి నియమించాలంటూ ఎన్విడియా అంతర్గతంగా చేపట్టిన ప్రయత్నానికి 1,600కు పైగా వ్యాఖ్యలు వచ్చాయి. వాటిలో ఎక్కువ మంది ఆయనకు మద్దతు తెలిపారు. వందలాది మంది ఉద్యోగులు కూడా హువాంగ్‌ను తిరిగి తీసుకురావాలని కోరుతూ బోర్డుకు లేఖ రాశారు. హువాంగ్‌ను తిరిగి నియమించడంతోపాటు కొత్త స్వతంత్ర డైరెక్టర్లను నియమించాలని, లేనిపక్షంలో ఉద్యోగులు స్పేస్‌ఎక్స్‌కు చెందిన టెరాఫ్యాబ్ ప్రాజెక్టులో చేరే అవకాశం ఉందని ఆ లేఖలో పేర్కొన్నట్లు సమాచారం. వారికి ఉద్యోగాలు కల్పిస్తానని మస్క్ హామీ ఇచ్చినట్లు కూడా ఆ లేఖలో ప్రస్తావించినట్లు కథనం వెల్లడించింది.

33 ఏళ్ల పాటు ఎన్విడియా సీఈఓగా పనిచేసిన హువాంగ్ రాజీనామా చేసిన నేపథ్యంలో, కంపెనీ చీఫ్ ఫైనాన్షియల్ ఆఫీసర్ కొలెట్ క్రెస్‌ను తాత్కాలిక సీఈఓగా నియమించారు. కొత్త నాయకత్వం కోసం అంతర్గత, బాహ్య అభ్యర్థులను బోర్డు పరిశీలిస్తోంది. మరోవైపు, బోర్డు ఛైర్మన్ హార్వే జోన్స్.. కొలెట్ క్రెస్, నాయకత్వ బృందంపై తమకు పూర్తి విశ్వాసం ఉందని, కంపెనీ కార్యకలాపాలు, కస్టమర్లకు ఇచ్చిన హామీలు, ఉత్పత్తుల రోడ్‌మ్యాప్‌లో ఎలాంటి అంతరాయం ఉండదని తెలిపారు. ఈ పరిణామాల నేపథ్యంలో ఎన్విడియా షేర్లు గ‌త సెష‌న్‌లో 2 శాతానికి పైగా పడిపోయాయి.