Elon Musk Trillionaire | ప్రపంచంలోనే తొలి ‘ట్రిలియనీర్’ ఎలాన్ మస్క్.. గంటకు రూ.8 కోట్లు ఖర్చు చేసినా 114 ఏళ్లు తరగని మహా సంపద!

Elon Musk Trillionaire | త్రినేత్ర.న్యూస్ : ప్రపంచ వ్యాపార చరిత్రలోనే సరికొత్త మైలురాయి నమోదైంది. టెక్ దిగ్గజం, టెస్లా అధినేత ఎలాన్ మస్క్ (Elon Musk) ప్రపంచంలోనే మొట్టమొదటి 'ట్రిలియనీర్' (Trillionaire) గా అవతరించారు. జూన్ 12, 2026న ఆయనకు చెందిన అంతరిక్ష పరిశోధనా, కృత్రిమ మేధస్సు సంస్థ 'స్పేస్‌ఎక్స్' (SpaceX) అమెరికన్ స్టాక్ మార్కెట్ నాస్‌డాక్ (Nasdaq) లో పబ్లిక్ ఇష్యూగా (IPO) లిస్ట్ అయిన సంగతి తెలిసిందే. ఈ మెగా ఐపీఓ భారీ సక్సెస్ కావడంతో మస్క్ వ్యక్తిగత సంపద మానవ చరిత్రలోనే ఎవరికీ సాధ్యంకాని స్థాయికి చేరుకుంది.

నాస్‌డాక్ మార్కెట్లో స్పేస్‌ఎక్స్ షేర్లు 'SPCX' టిక్కర్‌తో ఒక్కోటి $150 వద్ద ట్రేడింగ్ ప్రారంభించాయి. లిస్టింగ్ ప్రైస్ $135 కంటే ఇది చాలా ఎక్కువ. హిస్టరీలోనే అతిపెద్ద ఐపీఓగా నిలిచిన దీని ద్వారా ఏకంగా 75 బిలియన్ డాలర్ల నిధులను సేకరించారు. దీనివల్ల స్పేస్‌ఎక్స్ మార్కెట్ విలువ దాదాపు 1.77 ట్రిలియన్ డాలర్లకు చేరింది. ఇందులో ఎలాన్ మస్క్‌కు ఉన్న వాటాతో పాటు, టెస్లాలోని (Tesla) ఆయన షేర్ల విలువను కూడా కలిపితే మస్క్ మొత్తం నెట్ వర్త్ (Net worth) ప్రస్తుతం 1.26 ట్రిలియన్ డాలర్లకు చేరుకుంది.

ఊహకు అందని సంపద.. గంటకు రూ.8 కోట్లు ఖర్చు చేసినా..

ఒక ట్రిలియన్ డాలర్లు అంటే ఒక మిలియన్ సార్లు ఒక మిలియన్ డాలర్లు. సాధారణ మానవుల ఊహకు అందని సంపద ఇది. అర్థమయ్యేలా చెప్పాలంటే.. ఒక వ్యక్తి రోజుకు 24 గంటల పాటు విరామం లేకుండా గంటకు 1 మిలియన్ డాలర్లు (దాదాపు రూ. 8.3 కోట్లు) చొప్పున ఖర్చు చేస్తూనే ఉన్నాడనుకుందాం. అలా ఖర్చు చేసినా కూడా మస్క్ దగ్గరున్న ఆస్తి పూర్తిగా కరిగిపోవడానికి ఒక శతాబ్దానికి పైగా సమయం పడుతుంది. అంటే ఇప్పటి నుంచి మొదలుపెట్టి సుమారు క్రీ.శ. 2140 వరకు ఆ రేంజ్‌లో ఖర్చు పెట్టినా ఇంకా ఆస్తి మిగిలే ఉంటుంది!

అయితే, ఇదంతా పేపర్ వెల్త్ (Paper Wealth) మాత్రమేనని, స్టాక్ మార్కెట్లో ఇన్వెస్టర్లు ఆయన కంపెనీలను ఎలా అంచనా వేస్తారనే దానిపైనే ఈ సంపద హెచ్చుతగ్గులు ఆధారపడి ఉంటాయని మార్కెట్ నిపుణులు చెప్తున్నారు.

చాలా దేశాల కంటే మస్కే పెద్దన్న!

ఎలాన్ మస్క్ సంపద ఏకంగా పెద్ద పెద్ద దేశాల ఆర్థిక వ్యవస్థల (Economies) కంటే కూడా చాలా పెద్దది. ఇంటర్నేషనల్ మానిటరీ ఫండ్ (IMF) డేటా ప్రకారం.. ప్రపంచవ్యాప్తంగా కేవలం 20 దేశాల జీడీపీ (GDP) మాత్రమే 1.1 ట్రిలియన్ డాలర్ల కంటే ఎక్కువగా ఉంది. అంటే ప్రపంచంలోని అత్యధిక దేశాల పూర్తి సంపద కంటే ఎలాన్ మస్క్ ఒక్కడి ఆస్తి ఐశ్వర్యాలే ఎక్కువ. తైవాన్ దేశ పూర్తి ఆర్థిక వ్యవస్థ విలువ కంటే మస్క్ నెట్ వర్త్ ఎక్కువే కావడం విశేషం.

ఇక తోటి శతకోటీశ్వరులతో పోల్చి చూస్తే.. బ్లూమ్‌బెర్గ్ బిలియనీర్స్ ఇండెక్స్ (Bloomberg Billionaires Index) ప్రకారం ప్రపంచంలోని తర్వాతి మూడు స్థానాల్లో ఉన్న అమెజాన్ అధినేత జెఫ్ బెజోస్, గూగుల్ కో-ఫౌండర్లు లారీ పేజ్, సెర్గీ బ్రిన్ ల ముగ్గురి ఆస్తులను కలిపినా కూడా ఎలాన్ మస్క్ సంపదతో సరితూగలేరు. ప్రపంచ ప్రఖ్యాత ఇన్వెస్టర్ వారెన్ బఫెట్ ఆస్తితో పోల్చితే మస్క్ ఏకంగా ఏడుగురు వారెన్ బఫెట్లతో సమానమని బ్లూమ్‌బెర్గ్ స్పష్టం చేసింది.