Donald Trump | చ‌ర్చ‌ల‌కు ఇరాన్ రెడీ.. కానీ మేం సిద్ధంగా లేము: ట్రంప్‌

Donald Trump | ఇజ్రాయెల్, అమెరికా కలిసి ఇరాన్‌పై దాడులు ప్రారంభించి రెండు వారాలకు పైగా గడిచిన నేపథ్యంలో టెహ్రాన్ ఒప్పందానికి సిద్ధంగా ఉందని అమెరికా అధ్యక్షుడు డొనాల్డ్ ట్రంప్ పేర్కొన్నారు. అయితే తాను మాత్రం ఇప్పుడే ఒప్పందం చేసుకోవడానికి సిద్ధంగా లేనని చెప్పారు. ఎన్‌బీసీ న్యూస్‌కు ఇచ్చిన టెలిఫోన్ ఇంటర్వ్యూలో ట్రంప్ మాట్లాడుతూ యుద్ధాన్ని ముగించి కాల్పుల విరమణకు రెండు దేశాలు అంగీకరించాలంటే ఒప్పంద నిబంధనలు బలంగా, స్పష్టంగా ఉండాల‌ని అన్నారు. ఇరాన్ ఒప్పందం చేసుకోవాలని కోరుకుంటోంద‌ని, కానీ నిబంధనలు ఇంకా సరిగ్గా లేవ‌ని, క‌నుక తాను ఇప్పుడే ఒప్పందం చేసుకోవాలని అనుకోవడం లేద‌ని ఆయన ఎన్‌బీసీ న్యూస్‌కు తెలిపారు. ఏ ఒప్పందమైనా చాలా బలమైన నిబంధనలతో ఉండాల‌ని కూడా ఆయన పేర్కొన్నారు.

యుద్ధాన్ని కొన‌సాగించ‌డంపైనే దృష్టి..

యుద్ధాన్ని ముగించేందుకు జరిగే ఒప్పందంలో ఉండే నిబంధనలు ఏమిటని అడ‌గ్గా ట్రంప్ స్పందిస్తూ ఆ విషయాన్ని తాను ఇప్పుడే చెప్పాలనుకోవడం లేద‌ని సమాధానమిచ్చారు. అయితే ఇరాన్ పూర్తిగా తన అణు ఆశయాలను వదులుకోవాలని ఇచ్చే హామీ ఆ ఒప్పందంలో భాగం కావచ్చని ఆయన అంగీకరించారు. ఇక రాయిటర్స్ వార్తా సంస్థ వెల్లడించిన సమాచారం ప్రకారం ట్రంప్ ప్రస్తుతం యుద్ధాన్ని కొనసాగించడంపైనే దృష్టి పెట్టినట్లు తెలుస్తోంది. ఇప్పుడే ఆయనకు ఆ విషయంలో ఆసక్తి లేద‌ని, తాము త‌మ‌ మిషన్‌ను ఎలాంటి విరామం లేకుండా కొనసాగిస్తామ‌ని, ఒక రోజు యుద్ధం ఆపే పరిస్థితి రావచ్చ‌ని, కానీ ప్రస్తుతం ఆ ప‌రిస్థితి లేద‌ని వైట్ హౌస్‌కు చెందిన ఒక సీనియర్ అధికారి రాయిటర్స్‌కు తెలిపారు.

ఆప‌రేష‌న్ ఎపిక్ ఫ్యూరీ కొన‌సాగుతుంది..

మరో సీనియర్ వైట్ హౌస్ అధికారి కూడా ఇదే అభిప్రాయాన్ని వ్యక్తం చేశారు. ఇరాన్‌లో కొత్త నాయకత్వం వచ్చే అవకాశాలు ఉన్నాయని, వారు చర్చలకు సిద్ధంగా ఉన్నట్లు సంకేతాలు ఇచ్చారని చెప్పారు. ట్రంప్ కూడా వారికి అదే చెప్పార‌ని, చివరికి చర్చలు జరుగుతాయ‌ని, కానీ ప్రస్తుతం ఆపరేషన్ ఎపిక్ ఫ్యూరీ ఎలాంటి అంతరాయం లేకుండా కొనసాగుతుంద‌ని ఆయన పేర్కొన్నారు. రాయిటర్స్‌కు సమాచారం అందించిన ఇరాన్ వర్గాల ప్రకారం అమెరికా, ఇజ్రాయెల్ వైమానిక దాడులు పూర్తిగా నిలిపివేసే వరకు కాల్పుల విరమణపై చర్చలు జరిపే ప్రయత్నాలను టెహ్రాన్ తిరస్కరించింది. కాల్పుల విరమణ ఒప్పందంలో భాగంగా అమెరికా, ఇజ్రాయెల్ దాడులకు శాశ్వతంగా ముగింపు పలకాలని, అలాగే నష్టపరిహారం ఇవ్వాలని ఇరాన్ డిమాండ్ చేసింది.

ఆ దేశాలు అన‌వ‌స‌ర ల‌క్ష్యంగా మారాయి..

ఫిబ్రవరి 28న ఇజ్రాయెల్, అమెరికా కలిసి ఇరాన్‌పై దాడులు ప్రారంభించాయి. దీనికి ప్రతీకారంగా టెహ్రాన్ ఎనిమిది మధ్యప్రాచ్య దేశాలపై దాడులు చేసింది. ఈ పరిణామంపై స్పందించిన ట్రంప్ మాట్లాడుతూ మధ్యప్రాచ్యంలో అమెరికా మిత్రదేశాలైన యునైటెడ్ అరబ్ ఎమిరేట్స్, ఖతార్, సౌదీ అరేబియా వంటి దేశాలు అద్భుతంగా సహకరించాయ‌ని చెప్పారు. అయితే అవి అనవసరంగా లక్ష్యంగా మారాయ‌ని అన్నారు. తాను చాలా ఆశ్చర్యపోయాన‌ని ట్రంప్ అన్నారు. ఈ మొత్తం సంఘటనలో త‌న‌కు కలిగిన అతిపెద్ద ఆశ్చర్యం అదేన‌ని ట్రంప్‌ పేర్కొన్నారు.