Donald Trump | మ‌రో ప‌ది రోజులు.. ఇరాన్ మౌలిక స‌దుపాయాల‌పై దాడుల గ‌డువును పొడిగించిన ట్రంప్‌

Donald Trump | త్రినేత్ర‌.న్యూస్‌: ఇరాన్ (Iran) ఇంధ‌న మౌలిక స‌దుపాయాల‌పై దాడుల విష‌యంలో అమెరికా అధ్య‌క్షుడు డొనాల్డ్ ట్రంప్ (Donald Trump) కీల‌క నిర్ణ‌యం తీసుకున్నారు. దాడుల (Strikes) గ‌డువును మ‌రో 10 రోజుల‌పాటు పొడిగిస్తున్న‌ట్లు ప్ర‌క‌టించారు. యుద్ధం ముగింపున‌కు సంబంధించి ఇరు దేశాల మ‌ధ్య చ‌ర్చ‌లు ఆశాజ‌న‌కంగా జ‌రుగుతున్నాయ‌ని చెప్పారు. ఇరాన్ ప్రభుత్వం నుంచి వచ్చిన ప్రత్యేక విజ్ఞప్తి మేరకు, శాంతి చర్చలకు మరింత సమయం ఇవ్వాలనే ఉద్దేశంతో గడువును ఏప్రిల్ 6న‌ రాత్రి 8 గంట‌ల వ‌ర‌కు దాడులు చేయ‌కూడ‌ద‌ని నిర్ణయం తీసుకున్నట్లు తన సోషల్ మీడియా ట్రూత్‌లో పోస్టు చేశారు.

హర్మూజ్‌ జలసంధిని (Strait of Hormuz) 48 గంటల్లోగా తెరవాలని, లేదంటే విద్యుత్ కేంద్రాల‌పై దాడులు (Energy Infrastructure) చేస్తామ‌ని ట్రంప్ హెచ్చ‌రించిన విష‌యం తెలిసిందే. ఆ తర్వాత ఈ విషయంలో వెనక్కితగ్గిన ఆయ‌న ఇరాన్‌తో చర్చలు కొనసాగుతున్నాయని, ఆ దేశ ఇంధన మౌలిక సదుపాయాలు, విద్యుత్‌ కేంద్రాలపై దాడులను ఐదు రోజుల వరకు వాయిదా వేస్తున్నట్లు ప్రకటించారు. తాజాగా ఈ దాడుల నిలిపివేతను మరో 10 రోజులపాటు పొడిగిస్తున్నట్లు పేర్కొన్నారు. అమెరికా మీడియాపై ట్రంప్ ఆగ్ర‌హం వ్య‌క్తం చేశారు. ఇరాన్‌తో చర్చలు విఫలమవుతున్నాయంటూ వస్తున్న వార్తలను ఆయన ఖండించారు. అవి 'ఫేక్ న్యూస్'గా కొట్టిపారేశారు. మ‌రోవైపు ఇరాన్‌పై భూత‌ల దాడులకు అమెరికా సిద్ధ‌మ‌వుతున్న‌ది. వేలాది మంది అమెరికా జ‌వాన్లు ప‌శ్చిమాసియాలో అడుగుపెడుతున్నారు.