Bangladesh Elections | బంగ్లాదేశ్‌లో పార్ల‌మెంట్‌ ఎన్నిక‌లు.. రేపు ఉద‌యానికి ఫ‌లితాలు

Bangladesh Elections | త్రినేత్ర‌.న్యూస్‌: తీవ్ర రాజ‌కీయ అస్థిర‌త‌ను ఎదుర్కొంటున్న బంగ్లాదేశ్‌లో సార్వ‌త్రిక ఎన్నిక‌లు (Bangladesh Elections) జ‌రుగుతున్నాయి. గురువారం ఉద‌యం 7.30 గంట‌ల‌కు 13వ జాతీయ పార్ల‌మెంట్ ఎన్నిక‌ల పోలింగ్ ప్రారంభ‌మైంది. మొత్తం 300 పార్ల‌మెంటు స్థానాల‌కుగాను 299 స్థానాల‌కు ఎన్నిక‌లు జ‌రుగుతున్నాయి. 1981 మంది అభ్య‌ర్థులు బ‌రిలో నిలిచారు. మొత్తం 51 పార్టీలు ఎన్నిక‌ల్లో పాల్గొంటున్నాయి. అయిన‌ప్ప‌టికీ బంగ్లాదేశ్ నేషనలిస్టు పార్టీ (BNP), షఫీకుర్ రెహమాన్ నేతృత్వంలోని జమాత్-ఎ-ఇస్లామీ కూటమి మధ్య ప్రధాన పోటీ నెలకొంది. విద్యార్థుల ఉద్యమంలో కీలక పాత్ర పోషించిన నేషనల్ సిటిజన్ పార్టీ (NCP) జమాత్ ఇస్లామీ కూటమిలో చేరింది.

హ‌సీనా లేకుండా..

2024లో విద్యార్థుల భారీ ఉద్య‌మంతో మాజీ ప్రధాని షేక్ హసీనా (Sheikh Hasina) నేతృత్వంలోని అవామీ లీగ్ (Awami League) ప్రభుత్వం కుప్ప‌కూలిన విష‌యం తెలిసిందే. అప్ప‌టి నుంచి మ‌హ‌మ్మ‌ద్ యూన‌స్ (Muhammad Yunus) ఆధ్వ‌ర్యంలో తాత్కాలిక ప్ర‌భుత్వం కొన‌సాగుతున్న‌ది. తాజా ఎన్నిక‌ల‌తో తాత్కాలిక ప్ర‌భుత్వానికి తెర‌ప‌డ‌నుంది. కాగా, షేక్ హ‌సీనా నేతృత్వంలోని అవామీ లీగ్ పార్టీ లేకుండా బంగ్లాదేశ్‌లో ఎన్నిక‌లు జ‌ర‌గ‌డం ఇదే మొద‌టిసారి. ఆ పార్టీపై తాత్కాలిక ప్ర‌భుత్వం నిషేధం విధించిన విష‌యం తెలిసిందే.

శుక్ర‌వారం ఉద‌యానికి ఫ‌లితాలు

కట్టుదిట్టమైన భద్రత న‌డుమ‌ ఉదయం 7.30 గంటలకు ప్రారంభ‌మైన‌ పోలింగ్, సాయంత్రం 4.30 గంట‌ల‌కు ముగియ‌నుంది. వెంట‌నే ఓట్ల లెక్కింపు ప్రారంభ‌మ‌వుతుంది. ఫలితాలు అర్ధ‌రాత్రి త‌ర్వాత వెలువ‌డే అవ‌కాశం ఉంది. అయితే శుక్ర‌వారం ఉద‌యం ఫ‌లితాల‌ను అధికారికంగా వెల్ల‌డిస్తామ‌ని ఎన్నిక‌ల సంఘం ప్ర‌క‌టించింది.

యువ ఓట‌ర్లే కీల‌కం..

ఈ ఎన్నిక‌ల్లో దాదాపు 12.7 కోట్ల మంది ఓటర్లు తమ ఓటు హక్కు వినియోగించుకోనున్నారు. వీరిలో సగానికి పైగా యువతే ఉండటం గమనార్హం. వారిలో దాదాపు 45 లక్షల మంది తొలిసారి ఓటు వేయబోతున్నారు. అందువ‌ల్ల యువత తీసుకునే నిర్ణయంపైనే ఫలితాలు ఆధార‌ప‌డి ఉంటాయి.

https://x.com/ANI/status/2021759105892041200