Bangladesh | బంగ్లాదేశ్‌లో హిందువులపై ఆగని దాడులు.. మరో వ్యక్తిపై దాడి చేసి నిప్పంటించిన అల్లరి మూక

Bangladesh | బంగ్లాదేశ్‌లో హిందువులపై దాడులు ఆగడం లేదు. రోజురోజుకూ పెరుగుతున్నాయి తప్పితే ఆగడం లేదు. హిందూ మైనార్టీలను లక్ష్యంగా చేసుకొని అల్లరి మూక రెచ్చిపోతోంది. ఇప్పటికే ముగ్గురు హిందూ యువకులను పొట్టన పెట్టుకున్న నిరసనకారులు.. తాజాగా మరో హిందువుపై దాడి చేశారు. 50 ఏళ్ల ఖోకన్ దాస్‌పై షరియత్‌పూర్ జిల్లాలో అల్లరిమూక దాడి చేసింది. అతడిని తీవ్రంగా గాయపరిచి నిప్పంటించారు. దీంతో అక్కడి నుంచి పరిగెత్తుకెళ్లిన దాస్.. సమీపంలోని చెరువులో దూకి ప్రాణాలు కాపాడుకున్నాడు. కానీ.. అప్పటికే తీవ్ర రక్త స్రావం అయిన ఖోకన్ దాస్‌ని వెంటనే ఢాకా మెడికల్ కాలేజీ ఆసుపత్రికి తరలించి చికిత్స అందిస్తున్నారు. అతడి పరిస్థితి విషమంగానే ఉన్నట్లు తెలుస్తోంది. గత రెండు వారాల్లో హిందువులపై జరిగిన నాలుగో దాడి ఇది.

డిసెంబర్ 31న హరియత్‌పూర్ జిల్లాలో ఈ దాడి జరిగింది. తన ఇంటికి వెళ్తున్న క్రమంలో బాధితుడిపై దాడి చేసిన అల్లరి మూక.. కత్తితో కడుపులో పొడిచారు. అనంతరం అతడి శరీరంపై పెట్రోల్ పోసి నిప్పంటించారు. మెడికల్ షాపు నిర్వహిస్తున్న దాస్.. షాపు మూసేసి ఇంటికి వెళ్తున్న క్రమంలో ఈ దాడి జరిగింది.