Vishnu Temple Iran | ఇరాన్‌లో 134 ఏళ్ల నాటి అద్భుతమైన విష్ణు దేవాలయం.. బిగ్ బి షేర్ చేసిన ఈ టెంపుల్ విశేషాలివే

Vishnu Temple Iran | త్రినేత్ర.న్యూస్ : బాలీవుడ్ మెగాస్టార్ అమితాబ్ బచ్చన్ (Amitabh Bachchan) సోషల్ మీడియాలో ఎప్పుడూ యాక్టివ్‌గా ఉంటారు. తాజాగా ఆయన తన ఇన్‌స్టాగ్రామ్‌లో షేర్ చేసిన ఓ వీడియో నెట్టింట వైరల్‌గా మారింది. ఆ వీడియోలో ఉన్నది మన దేశంలోని గుడి కాదు.. ఇస్లామిక్ దేశమైన ఇరాన్ (Iran) లోని బందర్ అబ్బాస్ నగరంలో ఉన్న 134 ఏళ్ల నాటి పురాతన విష్ణు దేవాలయం! అసలు ఇరాన్‌లో హిందూ టెంపుల్ (Hindu Temple) ఎలా వెలసింది? దీని వెనుక ఉన్న హిస్టరీ ఏంటో తెలుసుకుందాం రండి.

 

View this post on Instagram

 

A post shared by Amitabh Bachchan (@amitabhbachchan)

వైరల్ అవుతున్న అమితాబ్ పోస్ట్

ఇరాన్‌లోని హార్మోజ్‌గాన్ ప్రావిన్స్ రాజధాని బందర్ అబ్బాస్‌లో ఉన్న ఈ టెంపుల్ వీడియోను బిగ్ బి షేర్ చేయగా, అది కేవలం 24 గంటల్లోనే 7 లక్షల వ్యూస్, 30 వేలకు పైగా లైక్స్ సొంతం చేసుకుంది. "ఇరాన్‌లోని బందర్ అబ్బాస్‌లో ఉన్న ప్రాచీన హిందూ విష్ణు దేవాలయం ఇది. 1892లో ఖజర్ (Qajar) కాలంలో నిర్మించారు. నగరంలో పనిచేసే భారతీయ వ్యాపారుల కోసం దీన్ని కట్టారు.. బ్యాక్‌గ్రౌండ్ సాంగ్ పర్షియన్ భాషలో ఉంది" అంటూ అమితాబ్ క్యాప్షన్ ఇచ్చారు.

ఇరాన్‌లో విష్ణు దేవాలయం చరిత్ర (History)

చారిత్రక ఆధారాలు, యూట్యూబ్ ట్రావెల్ వ్లాగ్స్ ప్రకారం.. ఈ గుడిని 1892లో మొహమ్మద్ హసన్ సాద్-ఓల్-మలెక్ పాలనలో నిర్మించారు. బందర్ అబ్బాస్ నగరం ప్రపంచ షిప్పింగ్ రూట్‌లో అత్యంత కీలకమైన ప్రాంతం. 19వ శతాబ్దంలో బ్రిటిష్ ఇండియన్ కంపెనీ తరఫున ఇక్కడ పనిచేయడానికి వచ్చిన భారతీయులకు.. 1888లో గుడి కట్టుకోవడానికి స్థానిక పాలకులు అనుమతి ఇచ్చారు. నాలుగేళ్ల నిర్మాణ సమయం తర్వాత ఈ గుడి పూర్తయింది. ఇది ఇరాన్-భారతీయుల మధ్య ఉన్న ప్రాచీన సంబంధానికి, మతసామరస్యానికి ప్రతీకగా నిలుస్తోంది.

స్థానికులు హిందువులను 'గూర్' లేదా 'గబర్' అని పిలిచేవారు. అందుకే ఈ టెంపుల్‌కు స్థానికంగా 'గూరాన్' (Gooran) అనే పేరు స్థిరపడిపోయింది. ప్రస్తుతం ఇది ఇరాన్‌లో రిజిస్టర్డ్ నేషనల్ హిస్టారిక్ మాన్యుమెంట్‌గా గుర్తింపు పొందింది.

భిన్నమైన ఇండో-ఇరానియన్ ఆర్కిటెక్చర్

మన దేశంలో లేదా ఆసియాలో కనిపించే రెగ్యులర్ హిందూ టెంపుల్ ఆర్కిటెక్చర్ (Architecture) ఇక్కడ కనిపించదు. ఇదొక అద్భుతమైన ఇండో-ఇరానియన్ శైలి కట్టడం. మధ్యలో ఉండే గదిపై ఉల్లిపాయ ఆకారంలో ఉండే పెద్ద డోమ్ (Dome) ఉంటుంది. దానిపై తామరపువ్వు చెక్కబడి ఉంటుంది. మట్టి, సున్నం, పగడపు రాళ్లతో దీనిని నిర్మించారు.

గుడికి పైభాగంలోకి వెళ్లడానికి ఒక స్పైరల్ మెట్ల మార్గం ఉంటుంది. గుడి లోపలికి సూర్యరశ్మి పుష్కలంగా వచ్చేలా ఈ నిర్మాణాన్ని అద్భుతంగా డిజైన్ చేశారు. పూజారులు, సన్యాసులు ఉండటానికి గర్భగుడి చుట్టూ చిన్న చిన్న గదులు కూడా నిర్మించారు.

గుడి లోపల ఏమున్నాయి?

1979 ఇస్లామిక్ రివల్యూషన్ తర్వాత చాలా మంది భారతీయులు ఇరాన్‌ను విడిచిపెట్టి వచ్చేశారు. దీంతో ఈ గుడి తన పాత వైభవాన్ని కోల్పోయింది. గర్భగుడిలోని ఎన్నో పెయింటింగ్స్ ధ్వంసమయ్యాయి.

అయితే, ఇప్పటికీ అక్కడ బుద్ధుడు (Buddha), విష్ణుమూర్తి విగ్రహాలతో పాటు.. రాధాకృష్ణుల అందమైన పెయింటింగ్స్‌ చూడొచ్చు. పునరుద్ధరణకు నోచుకోని ఎన్నో పాత విగ్రహాలు అక్కడ ఉన్నాయి. గుడికి ఆనుకుని ఉన్న ఒక చిన్న రూమ్‌ను ఇప్పుడు మ్యూజియంగా మార్చారు. అందులో ఆనంద తాండవం చేస్తున్న పరమశివుడి (నటరాజ) పాత విగ్రహం కూడా ఉంది.

ఇరాన్‌లో ఉన్న ఏకైక హిందూ టెంపుల్ ఇది మాత్రమే కాదు. సిస్తాన్-బలూచిస్తాన్ ప్రావిన్స్ రాజధాని జహెదాన్ (Zahedan) లో ఒక ఆర్యసమాజ్ టెంపుల్ కూడా ఉండటం విశేషం.