Saudi Arabia Houthi Deal | యుద్ధం ఆపేందుకు రూ.8,400 కోట్లు?: హౌతీలతో సౌదీ సీక్రెట్ డీల్.. తెరవెనుక ఇరాన్ చక్రం!

Saudi Arabia Houthi Deal | త్రినేత్ర న్యూస్ : పశ్చిమాసియాలో దశాబ్దాలుగా కొనసాగుతున్న ఉద్రిక్తతలకు తెరదించేందుకు తెరవెనుక అనూహ్యమైన దౌత్య అడుగులు పడుతున్నాయి. యెమెన్‌కు చెందిన హౌతీ తిరుగుబాటుదారులు తమ భూభాగంపై చేస్తున్న భీకర దాడులను శాశ్వతంగా ఆపడానికి సౌదీ అరేబియా ఏకంగా 1 బిలియన్ డాలర్ల (భారత కరెన్సీలో సుమారు రూ.8,400 కోట్లు) భారీ ఆర్థిక ప్యాకేజీని ప్రతిపాదించినట్లు సంచలన కథనం వెలుగులోకి వచ్చింది. ఇరాన్ మధ్యవర్తిత్వంతో ఈ రహస్య ఒప్పందంపై తీవ్ర చర్చలు సాగుతున్నాయని ఇజ్రాయెల్ వార్తాపత్రిక 'ఇజ్రాయెల్ హయోమ్' (Israel Hayom) గల్ఫ్ దౌత్య వర్గాలను ఉటంకిస్తూ వెల్లడించింది.

సైనిక విమానంలో నేరుగా టెహ్రాన్‌కు..

సౌదీ రక్షణ మంత్రి ప్రిన్స్ ఖలీద్ బిన్ సల్మాన్ ఇటీవల అనూహ్యంగా ఇరాన్ రాజధాని టెహ్రాన్‌లో పర్యటించారు. ఆయన ప్రయాణించిన 'హెర్క్యులస్' మిలిటరీ ట్రాన్స్‌పోర్ట్ ఎయిర్‌క్రాఫ్ట్‌లో నేరుగా నగదు రూపంలోనే ఈ $1 బిలియన్‌ను తీసుకెళ్లినట్లు ఆ కథనం పేర్కొంది. ప్రాంతీయ సంక్షోభాన్ని తగ్గించేందుకు ఇరాన్ స్వయంగా దౌత్య మధ్యవర్తిత్వం వహించేందుకు ముందుకు రావడంతో ఈ సమావేశం ప్రాధాన్యం సంతరించుకుంది.

మరోవైపు, ఈ పర్యటనను సౌదీ విదేశాంగ శాఖ కూడా ధ్రువీకరించింది. ప్రస్తుత సంక్షోభాన్ని తగ్గించేందుకు.. ఖతార్, పాకిస్థాన్ చేస్తున్న శాంతి ప్రయత్నాలకు మద్దతుగా ఈ చర్చలు జరిగాయని పేర్కొంది.

రంగంలోకి పాకిస్థాన్, టర్కీ పెద్దలు

ఈ కీలక చర్చల్లో ప్రాంతీయ సైనిక భాగస్వామ్య దేశాలు కూడా పాలుపంచుకున్నాయి. పాకిస్థాన్ ఆర్మీ చీఫ్ ఫీల్డ్ మార్షల్ అసిమ్ మునీర్, టర్కీ నిఘా సంస్థ (ఇంటెలిజెన్స్) చీఫ్ ఇబ్రహీం కలిన్, ఇరాన్ అధ్యక్షుడు మసూద్ పెజెష్కియాన్, సుప్రీం నేషనల్ సెక్యూరిటీ కౌన్సిల్ కార్యదర్శి మొహసేన్ రెజాయ్, ఐఆర్‌జీసీ ఉన్నతాధికారులు పాల్గొన్నారు.

మక్కా జాయింట్ డిఫెన్స్ అలయన్స్‌లో ఉన్నప్పటికీ.. క్షేత్రస్థాయిలో పూర్తిస్థాయి సైనిక మోహరింపు కంటే దౌత్యపరమైన పరిష్కారానికే పాకిస్థాన్, టర్కీ ప్రాధాన్యమిస్తున్నట్లు తాజా పరిణామాలు స్పష్టం చేస్తున్నాయి.

ఈ బిలియన్ డాలర్ల డీల్ ఎందుకు?

గత కొంతకాలంగా సౌదీ అరేబియా విమానాశ్రయాలు, కీలకమైన చమురు శుద్ధి కర్మాగారాలపై హౌతీలు డ్రోన్లు, క్షిపణులతో దాడులు చేస్తున్నారు. ఒకానొక దశలో రియాద్ ఎయిర్‌పోర్టును రోజుల తరబడి మూసివేయాల్సి రావడమే కాకుండా, అంతర్జాతీయ పెట్టుబడుల సదస్సును కూడా వాయిదా వేసుకోవాల్సి వచ్చింది. దీనికితోడు హార్ముజ్ జలసంధిలో చమురు రవాణా నౌకలపై వేధింపులు సౌదీ ఆర్థిక వ్యవస్థను తీవ్రంగా దెబ్బతీశాయి.

మూడేళ్ల క్రితం కుదిరిన ప్రాథమిక ఒప్పందాలను సౌదీ ఉల్లంఘించిందని ఆరోపిస్తూనే హౌతీలు ఈ దాడులను సమర్థించుకుంటున్నారు. తాజా డీల్ ప్రకారం.. హౌతీల నియంత్రణలో ఉన్న ప్రాంతాల్లో పౌర మౌలిక వసతుల పునర్నిర్మాణం చేపట్టాలి. నిలిచిపోయిన పబ్లిక్ సెక్టార్ ఉద్యోగుల జీతాలను చెల్లించడానికి ఈ $1 బిలియన్ నిధులను సౌదీ నేరుగా సమకూర్చాలి.

ప్రతిగా హౌతీలు పూర్తిస్థాయి కాల్పుల విరమణను (Ceasefire) పాటిస్తూ, సౌదీ భూభాగంపై ఎలాంటి దాడులు చేయకూడదు.

ఆర్థికంగా బలమైన సౌదీ.. శాశ్వత శాంతి కోసం నేరుగా హౌతీల చేతికే ఈ మొత్తాన్ని అందించేందుకు సిద్ధపడటం మధ్యప్రాచ్య రాజకీయాల్లో అత్యంత కీలక మలుపుగా విశ్లేషకులు భావిస్తున్నారు.