Telangana Oil Palm Cultivation | 6వ తరం హైబ్రిడ్ ఆయిల్‌పామ్ విత్తనాల ఉత్పత్తి కోసం దేశంలోనే తొలి సీడ్ గార్డెన్‌ ఖమ్మంలో

• ఆయిల్‌పామ్ సాగు లక్ష్యం రెట్టింపు కావాలి
• రైతులకు నాణ్యమైన మొక్కలు అందించండి
• గోద్రెజ్ ప్రతినిధులకు మంత్రి తుమ్మల ఆదేశం

Telangana Oil Palm Cultivation | త్రినేత్ర న్యూస్ : తెలంగాణలో ఆయిల్‌పామ్ సాగును మరింత విస్తరించడమే లక్ష్యంగా ప్రైవేటు సంస్థలు పనిచేయాలని రాష్ట్ర వ్యవసాయ, మార్కెటింగ్, సహకార శాఖల మంత్రి తుమ్మల నాగేశ్వరరావు స్పష్టం చేశారు. మంగళవారం హైదరాబాద్ సచివాలయంలో ప్రముఖ వ్యవసాయ ఉత్పత్తుల దిగ్గజం 'గోద్రెజ్ ఆగ్రోవెట్' ఉన్నత స్థాయి ప్రతినిధి బృందం మంత్రితో ప్రత్యేకంగా భేటీ అయింది. రాష్ట్రంలో ఆయిల్‌పామ్ ప్రాసెసింగ్ యూనిట్ల విస్తరణ, రైతులకు మేలైన మొక్కల పంపిణీపై ఈ సమావేశంలో సమగ్రంగా చర్చించారు.

దేశంలోనే తొలి హైబ్రిడ్ సీడ్ గార్డెన్: 35 ఎకరాల భూమికి విజ్ఞప్తి

ఖమ్మం జిల్లా కొణిజర్ల మండలం అంజనాపురంలో గోద్రెజ్ ఏర్పాటు చేసిన సమీకృత ఆయిల్‌పామ్ యూనిట్‌కు సంబంధించి పలు కీలక ప్రతిపాదనలను కంపెనీ ప్రతినిధులు మంత్రి ముందుంచారు.

దేశంలోనే మొట్టమొదటి ప్రాజెక్ట్ : 6వ తరం అత్యాధునిక హైబ్రిడ్ ఆయిల్‌పామ్ విత్తనాల ఉత్పత్తి కోసం భారతదేశంలోనే తొలి సీడ్ గార్డెన్‌ను ఏర్పాటు చేయాలని నిర్ణయించామని, ఇందుకుగాను మరో 35 ఎకరాల భూమిని కేటాయించాలని కోరారు.

ప్రత్యేక రాయితీలు: రాష్ట్ర ఆహార శుద్ధి విధానం (ఫుడ్ ప్రాసెసింగ్ పాలసీ), పారిశ్రామిక ప్రోత్సాహకాలకు అదనంగా ఈ యూనిట్‌కు ప్రత్యేక ఇన్సెంటివ్ ప్యాకేజీని మంజూరు చేయాలని విజ్ఞప్తి చేశారు.

మౌలిక వసతులు, కేటాయింపులు: యూనిట్‌కు రాకపోకలు సులభతరం చేసేందుకు రోడ్డు విస్తరణ పనులు చేపట్టాలని, తమ ఆధునిక మిల్లు సామర్థ్యానికి అనుగుణంగా అదనపు జిల్లాలను కేటాయించాలని కోరారు. అలాగే గెలల ధరల నిర్ణయంలో కంపెనీల అభిప్రాయాలను పరిగణనలోకి తీసుకోవాలని ప్రతిపాదించారు.

సమస్యల పరిష్కారానికి తక్షణ చర్యలు

ఈ విజ్ఞప్తులపై మంత్రి తుమ్మల సానుకూలంగా స్పందించారు. అంజనాపురం యూనిట్ వద్ద భూమి కేటాయింపు, అప్రోచ్ రోడ్ల విస్తరణ తదితర అంశాలపై వెంటనే ఖమ్మం జిల్లా కలెక్టర్‌తో మాట్లాడి పనులు వేగవంతం చేయాలని అధికారులను ఆదేశించారు. దేశంలోనే తొలి సీడ్ గార్డెన్ ప్రాజెక్టును వీలైనంత త్వరగా పూర్తి చేసి రైతులకు అందుబాటులోకి తీసుకురావాలని కంపెనీకి సూచించారు.

పొట్టి రకం మొక్కలు.. రెట్టింపు సాగు లక్ష్యం

ఇప్పటికే ఆయిల్‌పామ్ సాగు అమలవుతున్న జిల్లాల్లో నిర్దేశిత లక్ష్యాలను రెట్టింపు చేసి పనిచేయాలని మంత్రి గోద్రెజ్ ప్రతినిధులకు దిశానిర్దేశం చేశారు. "ఆయిల్‌పామ్ తోటల విస్తరణ ఎంత ముఖ్యమో, రైతులకు మేలుజాతి మొక్కలు అందించడం అంతకంటే ముఖ్యం. తక్కువ ఎత్తు పెరిగి, అధిక దిగుబడినిచ్చే 'షార్ట్ వెరైటీ' హైబ్రిడ్ మొక్కలను రైతులకు అందుబాటులోకి తేవాలి" అని స్పష్టం చేశారు. ప్రభుత్వం, కంపెనీలు సమన్వయంతో ముందడుగు వేసినప్పుడే అన్నదాతలకు గరిష్ట ఆర్థిక ప్రయోజనం దక్కుతుందని ఆయన పేర్కొన్నారు.

ఈ కీలక సమావేశంలో ఆయిల్ ఫెడ్ ఎండీ యాస్మిన్ బాషా, గోద్రెజ్ ఆగ్రోవెట్ లిమిటెడ్ ఎండీ అండ్ సీఈవో సునీల్ కటారియా, గ్రూప్ హెడ్ (కార్పొరేట్ అఫైర్స్) రాకేష్ స్వామి తదితర ఉన్నతాధికారులు పాల్గొన్నారు.