Thammidikunta Lake | హైదరాబాద్‌కు మరో మణిహారం.. నేడు తమ్మిడికుంట చెరువు ప్రారంభం!

• 4వ చెరువుగా రికార్డు
• 30 ఎకరాల విస్తీర్ణంలో
• సిటీ ఆఫ్ లేక్స్‌గా హైదరాబాద్
• మరిన్ని చెరువులు లైన్‌లో
• నేడు ప్రజలకు అంకితం చేయనున్న సీఎం రేవంత్ రెడ్డి

Thammidikunta Lake | త్రినేత్ర న్యూస్ : హైదరాబాద్ ఐటీ కారిడార్‌లోని మాదాపూర్ పరిధిలో గల తమ్మిడికుంట చెరువు సరికొత్త హంగులతో ప్రజలకు అందుబాటులోకి వచ్చింది. హైడ్రా (HYDRAA) ఆధ్వర్యంలో సర్వాంగ సుందరంగా తీర్చిదిద్దిన ఈ 30 ఎకరాల చెరువును తెలంగాణ ముఖ్యమంత్రి ఎనుముల రేవంత్ రెడ్డి బుధవారం సాయంత్రం ప్రజల సమక్షంలో అధికారికంగా ప్రారంభించనున్నారు. హైదరాబాద్‌కు పూర్వవైభవం తీసుకొచ్చి, నగరాన్ని ప్రపంచ స్థాయి CityofLakesగా నిలబెట్టడమే తమ సంకల్పమని ఈ సందర్భంగా సీఎం స్పష్టం చేశారు.

హైడ్రా ఖాతాలో నాలుగో విజయం

ప్రజా ప్రభుత్వం బాధ్యతలు చేపట్టినప్పటి నుంచి హైదరాబాద్‌లోని జలాశయాల పరిరక్షణపై ప్రత్యేక దృష్టి సారించింది. ఇప్పటివరకు కూకట్‌పల్లి నల్లచెరువు, బతుకమ్మ కుంట, రాజేంద్రనగర్‌లోని బమ్-రుక్న్-ఉద్-దౌలా చెరువులను హైడ్రా ద్వారా పునరుద్ధరించి ప్రారంభించగా, తాజాగా తమ్మిడికుంట నాలుగో చెరువుగా సరికొత్త రూపాన్ని సంతరించుకుంది.

ఆక్రమణలు తొలగి.. సరికొత్త లేక్ వ్యూ పార్క్

ఒకప్పుడు పూడిక, నిర్మాణ వ్యర్థాలు, ప్లాస్టిక్ చెత్తతో దుర్గంధభరితంగా మారిన తమ్మిడికుంటను శాస్త్రీయ పద్ధతిలో శుద్ధి చేశారు. ఆక్రమణలను తొలగించి పూర్వపు 30 ఎకరాల ఎఫ్‌టీఎల్ (FTL) పరిధిని కాపాడటంతో పాటు.. చెరువు చుట్టూ వాకింగ్ ట్రాక్, ల్యాండ్‌స్కేపింగ్, గ్రీనరీని అభివృద్ధి చేశారు. స్థానిక ఐటీ ఉద్యోగులు, కాలనీవాసులకు ఆహ్లాదకరమైన వాతావరణం అందించే విధంగా ఆధునిక సదుపాయాలు కల్పించారు.

భావితరాల కోసమే చెరువుల పునరుద్ధరణ: సీఎం

నగరంలో పెరుగుతున్న కాలుష్యం, వరద ముప్పులను అధిగమించాలంటే చెరువుల పునరుజ్జీవనం తప్పనిసరని ముఖ్యమంత్రి పేర్కొన్నారు. భావితరాలకు స్వచ్ఛమైన పర్యావరణాన్ని అందించాలనే దృఢ సంకల్పంతోనే ఈ ప్రాజెక్టులను వేగవంతం చేస్తున్నామని చెప్పారు. ఇప్పటికే పలు చెరువుల్లో పునరుద్ధరణ పనులు చివరి దశకు చేరుకున్నాయని, రానున్న కొద్ది రోజుల్లోనే వాటిని కూడా ప్రారంభించి ప్రజలకు అంకితం చేస్తామని సీఎం రేవంత్ రెడ్డి వెల్లడించారు. ఈ సందర్భంగా తమ్మిడికుంట రూపురేఖలు మారిన తీరును వివరిస్తూ సీఎం తన సోషల్ మీడియా ఖాతాలో ఓ వీడియోను సైతం పంచుకున్నారు.

ప్రజల సమక్షంలో నేడు తమ్మిడికుంట చెరువు… ప్రారంభోత్సవం…

#CityofLakes గా హైదరాబాద్‌కు పూర్వవైభవం తీసుకురావడమే నా సంకల్పం..!

భావితరాలకు ఉపయోగపడేలా, హైడ్రా @Comm_HYDRAA ఆధ్వర్యంలో 30 ఎకరాల్లో తమ్మిడికుంట చెరువును అద్భుతంగా అభివృద్ధి చేసి, నేడు ప్రజలకు అంకితం చేయనున్నాము.

ప్రజా ప్రభుత్వం ఇప్పటివరకు కూకట్‌పల్లి నల్లచెరువు, బతుకమ్మ కుంట, బమ్-రుక్న్-ఉద్-దౌలా చెరువులను అభివృద్ధి చేసి ప్రారంభించగా, తమ్మిడికుంట నాలుగో చెరువుగా నిలవనుంది.

అతి కొద్ది రోజుల్లోనే పునరుద్ధరణ పనులు పూర్తికానున్న మరిన్ని చెరువులను కూడా ప్రారంభిస్తాము.

#Thammidikunta

— Revanth Reddy (@revanth_anumula) November 11, 2026