Hafizpet | మ‌హిళ‌ను ఈడ్చుకెళ్లింది రైల్వే పోలీసు కాదు.. హోం గార్డ్

Hafizpet | త్రినేత్ర‌.న్యూస్ : హైటెక్ సిటీ స‌మీపంలోని హ‌ఫీజ్‌పేట రైల్వే స్టేష‌న్ వ‌ద్ద జ‌రిగిన ద‌క్షిణ మ‌ధ్య రైల్వే వివ‌ర‌ణ ఇచ్చింది. మ‌హిళ‌ను ఈడ్చుకెళ్లింద‌ని రైల్వే పోలీసు కాదు అని సౌత్ సెంట్ర‌ల్ రైల్వే స్ప‌ష్టం చేసింది. స‌ద‌రు మ‌హిళ‌పై దాడి చేసింది తెలంగాణ పోలీసు శాఖ‌కు చెందిన హోం గార్డు అని తేల్చింది. స‌ద‌రు హోంగార్డును తెలంగాణ పోలీసు శాఖ డిప్యూటేష‌న్ మీద హాఫీజ్‌పేట రైల్వే స్టేష‌న్ వ‌ద్ద విధుల్లో ఉంచిన‌ట్లు తెలిపింది. ఈ ఘటనపై విచారణ పూర్తిచేసిన అనంతరం అతడిని తిరిగి తెలంగాణ రాష్ట్ర పోలీస్‌ శాఖకు పంపినట్లు పేర్కొంది. అవసరమైన క్రమశిక్షణ చర్యల కోసం తెలంగాణ పోలీస్‌ శాఖకు అప్పగించినట్లు స్పష్టం చేసింది.

అయితే ఈ ఘ‌ట‌న‌కు ముందు మ‌హిళ‌.. హోంగార్డును దూషించిన‌ట్లు స‌మాచారం. ఆ త‌ర్వాత‌నే ఆగ్ర‌హంతో హోంగార్డు మ‌హిళ‌పై దాడి చేసి ఈడ్చుకెళ్లిన‌ట్లు తెలిసింది. రోడ్డుపై ఈడ్చుకెళ్తున్న భార్య‌ను వ‌దిలేయాల‌ని భ‌ర్త ప్రాధేయ‌ప‌డిన‌ప్ప‌టికీ.. అత‌ను కనిక‌రం చూపించ‌లేదు. ఈ ఘ‌ట‌న‌కు సంబంధించిన వీడియో సోష‌ల్ మీడియాలో వైర‌ల్ అవ‌గా నెటిజ‌న్లు మండిప‌డ్డారు.

డీజీపీ సీరియ‌స్‌..

హ‌ఫీజ్‌పేట‌లో మ‌హిళ‌ను జుట్టు ప‌ట్టి లాక్కెళ్లిన ఘ‌ట‌న‌పై డీజీపీ సీవీ ఆనంద్ సీరియ‌స్ అయ్యారు. రైల్వే స్టేషన్ వద్ద మహిళపై దాడి జరిగిన ఘటనపై వివరణ ఇచ్చారు. ఏ స్థాయి సిబ్బంది అయినా ఇలాంటి ప్ర‌వ‌ర్త‌న‌ను క్ష‌మించ‌లేం. ఇది శిక్ష‌ణ‌, ఆదేశాల‌కు విరుద్ధం. స‌ద‌రు హోమ్ గార్డ్ రైల్వే పోలీస్ ఫోర్స్‌లో డిప్యూటేషన్‌పై పని చేస్తున్నాడు. అతనిని సర్వీస్ నుంచి తొలగించడంతో పాటు, క్రిమినల్ కేసు నమోదు చేసి చర్యలు తీసుకుంటాం. తక్షణమే చర్యలు తీసుకోవాలని సైబరాబాద్ పోలీస్ కమిషనర్‌ను ఆదేశించాను అని డీజీపీ వివ‌రించారు.

హోంగార్డు డిస్మిస్‌..

డీజీపీ ఆదేశాల మేర‌కు వికారాబాద్‌కు చెందిన టీజీ పోలీస్ హోంగార్డ్ ఆనంద్‌ను స‌ర్వీసు నుంచి తొల‌గించారు. ఈమేర‌కు వికారాబాద్ ఎస్పీ స్నేహా మెహ్రా ఉత్త‌ర్వులు జారీ చేశారు. మ‌రోవైపు ఈ ఘ‌ట‌న‌పై కేసు న‌మోదు చేసిన మియాపూర్ పోలీసులు హోంగార్డ్ ఆనంద్‌ను అదుపులోకి తీసుకున్నారు.

హఫీజ్‌పేట్ రైల్వే స్టేషన్ వద్ద మహిళపై దాడి ఘటనలో హోమ్ గార్డ్ ఆనంద్ అరెస్ట్

ఎఫ్ఐఆర్ నమోదు చేసి ఆనంద్‌ను అరెస్ట్ చేసిన మియాపూర్ పోలీసులు https://t.co/wtyXKPDgQg pic.twitter.com/9h4m6OXcxY

— Telugu Scribe (@TeluguScribe) September 19, 2026