Hidden Treasure | గుప్త నిధుల పేరుతో మోసాల‌కు పాల్ప‌డుతున్న ముఠా అరెస్ట్‌..

Hidden Treasure | త్రినేత్ర‌.న్యూస్‌: గుప్త‌నిధుల (Hidden Treasure) పేరుతో మోసాల‌కు పాల్ప‌డుతున్న ముఠాను శంషాబాద్ పోలీసులు అరెస్టు చేశారు. ముఠాలోని న‌లుగురు స‌భ్యుల‌ను అదుపులోకి తీసుకున్నారు. వారివ‌ద్ద రెండు కార్లు, ఆటో, రెండు బైకులు, సెల్‌ఫోన్లు, 25 నకిలీ (బంగారు పూత పూసిన) నాణేలు, ఇత‌ర సామాగ్రిని స్వాధీనం చేసుకున్నారు. నిందితుల‌ను గుడిమాల్కాపూర్‌కు చెందిన మహ్మద్ మునావర్ అలియాస్ మున్నా, మేడ్చ‌ల్ జిల్లా ఈసీఐఎల్‌కు చెందిన సయ్యద్ అలీ అష్రఫ్, మహ్మద్ హాజీ, కీస‌ర‌కు చెందిన మహ్మద్ సల్మాన్‌గా గుర్తించారు. ఈ ముఠా వివిధ ప్రాంతాల్లో దాదాపు 11 మందిని మోసం చేసి, సుమారు రూ.1 కోటి వరకు వసూలు చేశార‌ని అధికారులు తెలిపారు. ప్ర‌ధాన నిందితుడు మునావ‌ర్‌పై ఇప్ప‌టికే బేగంబ‌జార్ పోలీస్ స్టేష‌న్‌లో ఓ కేసు న‌మోదైంద‌ని చెప్పారు.

ఇటీవలి కాలంలో కొందరు కేటుగాళ్లు వీధులు, గ్రామాలు, పట్టణాల్లో తిరుగుతూ కొన్ని ప్రాంతాల్లో గుప్త నిధులు ఉన్నాయని, వాటిని తీసి ఇస్తామని చెప్పి అమాయక ప్రజలను మోసం చేస్తున్నార‌ని పోలీసులు తెలిపారు. ఇలాంటి మోసగాళ్లను, వారి మాటలను నమ్మి మోసపోవద్దని సూచించారు. ఎవరైనా ఇలాంటి అక్రమ, చట్టవిరుద్ధమైన కార్యకలాపాలకు పాల్పడుతున్నట్లు తెలిస్తే వెంటనే పోలీసులకు సమాచారం అందించాలని కోరారు.