POCSO Case | 11 ఏండ్ల చిన్నారిపై లైంగిక వేధింపులు.. యువ‌కుడికి ఐదేండ్ల జైలుశిక్ష‌

POCSO Case | త్రినేత్ర‌.న్యూస్‌: మైన‌ర్ బాలిక‌పై లైంగిక వేధింపులకు పాల్ప‌డిన వ్య‌క్తికి పోక్సో కోర్టు (POCSO court) ఐదేండ్ల జైలు శిక్ష విధించింది. దీంతోపాటు రూ.9 వేలు జ‌రిమానా విధిస్తూ తీర్పు వెలువ‌రించింది.

హైద‌రాబాద్‌లోని ముషీరాబాద్ (Musheerabad) పోలీస్ స్టేష‌న్ ప‌రిధిలోని రామ్‌న‌గ‌ర్‌కు చెందిన వీ.మ‌ణికంఠ (27) పొరుగున ఉండే 11 ఏండ్ల బాలిక‌పై అస‌భ్యంగా ప్ర‌వ‌ర్తిస్తూ లైంగిక వేధింపుల‌కు గురిచేసేవాడు. బాలిక ప‌ట్ల‌ అనుచితంగా మాట్లాడటం, జుట్టు లాగడం, చేతులు, కాళ్లు పట్టుకుని వేధించడం, దుస్తులపై అనుచిత వ్యాఖ్యలు చేస్తూ బుగ్గలు తాకడం వంటి చర్యలకు పాల్పడేవాడు. దీంతో బాధితురాలి తల్లి 2023, జూన్ 4న ముషీరాబాద్ పోలీసుల‌కు ఫిర్యాదు చేశారు. దీంతో పోక్సోతోపాటు (POCSO Case) వివిధ సెక్ష‌న్ల కింద కేసు న‌మోదుచేశారు. తాజాగా ఈ కేసులో నిందితుడికి నాంపల్లిలోని 12వ‌ అదనపు సెషన్స్ కోర్టు (పోక్సో కేసుల విభాగం) 5 సంవత్సరాల సాధారణ జైలు శిక్ష, రూ. 9,000 జరిమానా విధిస్తూ తీర్పు వెలువరించింది. ఈమేర‌కు హైదరాబాద్ ఉమెన్ సేఫ్టీ డిప్యూటీ కమిషనర్ ఆఫ్ పోలీస్ (DCP) వెల్ల‌డించారు. నిందుడికి శిక్ష‌ప‌డేలా చేసిన పోలీసు అధికారులు, భ‌రోసా టీమ్‌, లీగ‌ల్ టీమ్‌ను హైదరాబాద్ నగర పోలీస్ కమిషనర్ వీసీ సజ్జనార్ అభినందించారు.