Khairatabad By Election Update | ఖైరతాబాద్ ఉప ఎన్నికపై ఈసీఐ కీలక నిర్ణయం.. హైకోర్టుకు ఎన్నికల సంఘం స్పష్టీకరణ

Khairatabad By Election Update | త్రినేత్ర న్యూస్ : హైదరాబాద్‌లోని ఖైరతాబాద్ అసెంబ్లీ నియోజకవర్గం ఉప ఎన్నిక నిర్వహణపై కేంద్ర ఎన్నికల సంఘం (ECI) కీలక విషయాన్ని తెలంగాణ హైకోర్టు దృష్టికి తీసుకెళ్లింది. ఈ నియోజకవర్గానికి సంబంధించి కోర్టులో దాఖలైన పిటిషన్ ఒక కొలిక్కి వచ్చేంత వరకు ఉప ఎన్నిక నోటిఫికేషన్‌ను జారీ చేయబోమని ఈసీఐ ఉన్నత న్యాయస్థానానికి స్పష్టం చేసింది.

ఎన్నికల పిటిషన్ పరిష్కారమయ్యే దాకా నోటిఫికేషన్ లేదు

అయితే ఖైరతాబాద్ ఉప ఎన్నిక‌కు నోటిఫికేష‌న్ ఇవ్వ‌కుండా ఆపాల‌ని పీజేఆర్ కూతురు, కాంగ్రెస్ నేత విజ‌యారెడ్డి.. గురువారం హైకోర్టులో పిటిష‌న్ దాఖ‌లు చేశారు. నోటిఫికేష‌న్ జారీ చేయ‌కుండా ఎలక్షన్ కమిషన్‌కు ఆదేశాలు ఇవ్వాలని పిటిష‌న్‌లో విజ్ఞ‌ప్తి చేశారు.

ప్రస్తుతం ఈ పిటిషన్‌పై విచారణ పెండింగ్‌లో ఉంది. చట్టపరమైన ఈ వివాదం తుది పరిష్కారం అయ్యే వరకు ఖైరతాబాద్ స్థానానికి ఉప ఎన్నిక షెడ్యూల్‌ను గానీ, నోటిఫికేషన్‌ను గానీ విడుదల చేయబోమని న్యాయస్థానానికి ఎన్నికల సంఘం నివేదించింది.

దానం నాగేందర్ అనర్హతతో ఏర్పడిన ఖాళీ

ఖైరతాబాద్ ఎమ్మెల్యేగా గెలిచిన దానం నాగేందర్‌‌పై అనర్హత వేటు పడటంతో ఈ అసెంబ్లీ స్థానం ఖాళీ అయింది. సాధారణ నిబంధనల ప్రకారం ఆరు నెలల వ్యవధిలో అక్కడ ఉప ఎన్నిక జరగాల్సి ఉంది. అయితే, విజయారెడ్డి దాఖలు చేసిన పిటిషన్ ఇంకా న్యాయపరిధిలో ఉండటంతో ఈసీ తీసుకున్న తాజా నిర్ణయం రాజకీయంగా అత్యంత ప్రాధాన్యత సంతరించుకుంది.

కోర్టులో ఈ పిటిషన్‌పై వెలువడే తదుపరి తీర్పు ఆధారంగానే ఖైరతాబాద్ బై-ఎలక్షన్ భవితవ్యం తేలనుంది. అప్పటివరకు ఈ స్థానానికి ఎన్నికల నగారా మోగే అవకాశం లేదని స్పష్టమవుతోంది.