Inside Amazon HYD13 | ప్రపంచంలోనే బిగ్గెస్ట్.. మన హైదరాబాద్‌లోనే! అమెజాన్ ‘HYD13’ క్యాంపస్ మైండ్ బ్లోయింగ్ ఫీచర్స్ ఇవే!

Inside Amazon HYD13 | త్రినేత్ర.న్యూస్ : హైదరాబాద్‌ అంటేనే ఇప్పుడు గ్లోబల్ ఐటీ హబ్. ప్రపంచంలోని టాప్ టెక్ దిగ్గజాలన్నీ ఇక్కడే తమ అతిపెద్ద ఆఫీసులను ఏర్పాటు చేస్తున్నాయి. ఈ క్రమంలోనే గ్లోబల్ ఈ-కామర్స్ జెయింట్ 'అమెజాన్' (Amazon) ప్రపంచంలోనే అత్యంత పెద్ద కార్పొరేట్ ఆఫీస్ బిల్డింగ్‌ను మన భాగ్యనగరంలోనే రన్ చేస్తోంది. హైదరాబాద్ ఫైనాన్షియల్ డిస్ట్రిక్ట్ పరిధిలోని నానక్‌రామ్‌గూడలో ఉన్న ‘అమెజాన్ HYD13’ క్యాంపస్ ఇప్పుడు ఇంటర్నేషనల్ లెవెల్లో హాట్ టాపిక్‌గా నిలుస్తోంది. అమెరికా వెలుపల అమెజాన్ సంస్థకు ఉన్న మొదటి పూర్తి సొంత ఆస్తి (Fully Owned Property) కూడా ఇదే కావడం విశేషం.

9.5 ఎకరాలు.. 15 అంతస్తులు

సుమారు 9.5 ఎకరాల భారీ విస్తీర్ణంలో, 3 మిలియన్ చదరపు అడుగుల ఏరియాతో ఈ క్యాంపస్‌ను అద్భుతంగా తీర్చిదిద్దారు. 282 అడుగుల ఎత్తుతో, 15 అంతస్తులతో గగనతలాన్ని తాకుతున్నట్లు ఉండే ఈ భవనంలో ఏకంగా 15,000 మందికి పైగా ఉద్యోగులు చాలా కంఫర్టబుల్‌గా కూర్చుని వర్క్ చేయవచ్చు. గ్లోబల్ టెక్నాలజీ, ఆపరేషన్స్ హబ్‌గా ఈ క్యాంపస్ అమెజాన్‌కు అత్యంత కీలకంగా మారింది.

సెకనుకో ఫ్లోర్ దాటేసే లిఫ్టులు.. భారీ ఫుడ్ కోర్ట్

ఈ బిల్డింగ్ స్పెసిఫికేషన్స్ చూస్తే ఎవరైనా సరే ఆశ్చర్యపోవాల్సిందే.

కాన్ఫరెన్స్ రూమ్స్: మీటింగ్స్ కోసం ఏకంగా 290 కాన్ఫరెన్స్ రూమ్స్ ఉన్నాయి. అంతేకాదు, ప్రతి ఫ్లోర్‌లో టీమ్స్ కలిసి చర్చించుకోవడానికి 3 ప్రత్యేక 'స్క్రమ్ కొలాబరేటివ్ ఏరియాస్' (Scrum Areas) ఏర్పాటు చేశారు.

హై-స్పీడ్ ఎలివేటర్లు: బిల్డింగ్‌లో ప్రయాణాన్ని సులభతరం చేసేందుకు 49 హై-స్పీడ్ లిఫ్టులు ఉన్నాయి. ఇవి దాదాపు సెకనుకు ఒక ఫ్లోర్ చొప్పున దూసుకెళ్తాయి.

మెగా కెఫెటేరియా: 2,700 మంది ఒకేసారి కూర్చుని తినగలిగే భారీ ఆల్-డే మల్టీ-క్యూసిన్ ఫుడ్ కోర్ట్ ఇక్కడి ఉద్యోగులకు ప్రపంచ స్థాయి రుచులను అందిస్తోంది.

ఉద్యోగుల హ్యాపీనెస్ కోసం వినోదాలు

కేవలం పని మాత్రమే కాదు, రిలాక్సేషన్ కూడా ముఖ్యమే అంటోంది అమెజాన్. అందుకే ఇందులో టేబుల్ టెన్నిస్, బిలియర్డ్స్, ఫుస్‌బాల్‌తో పాటు గేమింగ్ ప్రియుల కోసం ప్రత్యేకంగా PS4 గేమింగ్ జోన్స్ కూడా ఉన్నాయి. హెల్త్ కాన్షియస్ ఉన్నవారి కోసం యోగా, జుంబా స్టూడియోలను సైతం ఏర్పాటు చేశారు.

ప్రతి ఒక్కరికీ సమాన గౌరవం (Inclusivity)

ఈ క్యాంపస్ డిజైన్‌లో మానవీయ కోణానికి పెద్దపీట వేశారు. దివ్యాంగులు ఎవరి సహాయం లేకుండా సులభంగా తిరిగేలా ప్రతి ఫ్లోర్‌లో యాక్సెసిబిలిటీ ర్యాంప్‌లు, హ్యాండ్‌రైల్స్ అమర్చారు. వీటికి తోడు నిశ్శబ్దంగా ఉండేందుకు క్వైట్ రూమ్స్, ప్రార్థనల కోసం ఇంటర్‌ఫెయిత్ ప్రేయర్ రూమ్స్, తల్లుల కోసం మదర్స్ రూమ్స్, వెల్‌నెస్ సెంటర్లు, జెండర్-న్యూట్రల్ రెస్ట్‌రూమ్‌లను అందుబాటులోకి తెచ్చారు.

రూఫ్‌టాప్ హెలిప్యాడ్.. ఇండియన్ టచ్

బిల్డింగ్ పైభాగంలో యాక్టివ్ హెలిప్యాడ్‌తో పాటు, చుట్టూ ఆహ్లాదకరమైన వాతావరణం కోసం ఒక మిలియన్ చదరపు అడుగుల మేర పచ్చని అవుట్‌డోర్ స్పేస్‌ను కేటాయించారు. లోపలి ఇంటీరియర్ విషయానికి వస్తే.. ప్రతి ఫ్లోర్‌ను భారతీయ హస్తకళలు, సంగీతం, చేనేత వస్త్రాల థీమ్‌లతో (Regional Themes) ఎంతో అందంగా డిజైన్ చేశారు. గచ్చిబౌలి, నానక్‌రామ్‌గూడ ఐటీ కారిడార్‌కే ఈ బిల్డింగ్ ఒక మణిహారంగా నిలిచింది.