Mehdipatnam GHMC Raid | జీహెచ్‌ఎంసీ ఆఫీసులో ఏసీబీ మెరుపు దాడి: 4 లక్షలు లంచం తీసుకుంటూ చిక్కిన టౌన్ ప్లానింగ్ సూపర్‌వైజర్

• అదనంగా మరో రూ.2.5 లక్షల క్యాష్ సీజ్

Mehdipatnam GHMC Raid | త్రినేత్ర న్యూస్ : హైదరాబాద్ నగరంలోని జీహెచ్‌ఎంసీ కార్యాలయంలో అవినీతి నిరోధక శాఖ (ఏసీబీ) అధికారులు భారీ ఆపరేషన్ చేపట్టారు. భవన నిర్మాణ పనులకు ఆటంకం కలగకుండా ఉండేందుకు లంచం డిమాండ్ చేసిన గోల్కొండ జోన్, సర్కిల్-33 (మెహిదీపట్నం) టౌన్ ప్లానింగ్ సూపర్‌వైజర్ తులసిరామ్ సునీతను ఏసీబీ సిటీ రేంజ్-1 అధికారులు సోమవారం రెడ్ హ్యాండెడ్‌గా పట్టుకున్నారు.

డిప్యూటీ కమిషనర్ ఆర్డర్లను పక్కన పెట్టేందుకు రూ.8 లక్షల డీల్

బాధితుడు చేపడుతున్న భవన నిర్మాణ పనులకు సంబంధించి జీహెచ్‌ఎంసీ డిప్యూటీ కమిషనర్ ఇచ్చిన 'స్పీకింగ్ ఆర్డర్స్'ను పట్టించుకోకుండా ఉండేందుకు, ఎలాంటి ఇబ్బందులు పెట్టకుండా నిర్మాణం సాగించేందుకు సునీత రూ.8 లక్షలు లంచం డిమాండ్ చేశారు.

ఇందులో భాగంగా అడ్వాన్స్‌గా రూ.4 లక్షలు తీసుకుంటుండగా ఏసీబీ అధికారులు ఆకస్మిక దాడి చేసి ఆమెను అదుపులోకి తీసుకున్నారు. బాధితుడి నుంచి తీసుకున్న రూ.4,00,000 కెమికల్ కోటెడ్ నగదును అధికారులు స్వాధీనం చేసుకున్నారు.

లెక్కల్లో లేని మరో రూ.2.50 లక్షల నగదు స్వాధీనం

లంచం డబ్బులతో పాటు సునీత వద్ద లెక్కల్లో లేని మరో రూ.2,50,000 నగదు లభించడంతో అధికారులు విస్మయానికి గురయ్యారు. మొత్తం రూ.6.5 లక్షల నగదును సీజ్ చేసినట్లు ఏసీబీ వర్గాలు వెల్లడించాయి.

అధికారిక విధులను దుర్వినియోగం చేస్తూ అక్రమంగా లబ్ధి పొందేందుకు యత్నించిన నిందితురాలిని నాంపల్లిలోని ప్రత్యేక ఏసీబీ కోర్టు న్యాయమూర్తి ఎదుట హాజరుపరిచి జ్యుడీషియల్ రిమాండ్‌కు పంపేందుకు ఏర్పాట్లు చేస్తున్నారు. భద్రతా కారణాల దృష్ట్యా ఫిర్యాదుదారుడి వివరాలను గోప్యంగా ఉంచినట్లు అధికారులు తెలిపారు.

లంచం అడిగితే 1064 నంబర్‌కు ఫిర్యాదు చేయండి: ఏసీబీ

ప్రభుత్వ అధికారులు ఎవరైనా పనుల కోసం లంచం డిమాండ్ చేస్తే ఏమాత్రం భయపడకుండా ఏసీబీ టోల్ ఫ్రీ నంబర్ 1064కు కాల్ చేసి ఫిర్యాదు చేయాలని ఉన్నతాధికారులు ప్రజలకు విజ్ఞప్తి చేశారు.

అలాగే వాట్సాప్ (9440446106), సోషల్ మీడియా వేదికలైన ఫేస్‌బుక్ (Telangana ACB), ‘ఎక్స్’ (@Telangana ACB) ద్వారా కూడా సమాచారం ఇవ్వవచ్చని తెలిపారు. సమాచారం అందించిన వారి వివరాలు పూర్తిగా గోప్యంగా ఉంచుతామని అధికారులు స్పష్టం చేశారు.

ఇదీ చదవండి | తెలంగాణ నెక్స్ట్ సీఎం ఎవరు?