Cyberabad Police Weekend Drunk and Drive | మందుబాబులకు సైబరాబాద్ పోలీసులు షాక్: డ్రంక్ అండ్ డ్రైవ్‌లో 137 మంది అరెస్ట్.. 10 ఏళ్ల జైలు తప్పదు!

Cyberabad Police Weekend Drunk and Drive |త్రినేత్ర.న్యూస్ : మద్యం సేవించి వాహనాలు నడిపే వారిపై సైబరాబాద్ ట్రాఫిక్ పోలీసులు ఉక్కుపాదం మోపుతున్నారు. వీకెండ్‌ స్పెషల్ డ్రైవ్‌లో భాగంగా కమిషనరేట్ పరిధిలో విస్తృతంగా తనిఖీలు నిర్వహించి, నిబంధనలు ఉల్లంఘించిన 137 మందిపై కేసులు నమోదు చేశారు.

వాహనాల వారీగా నమోదైన కేసులు

పట్టుబడిన వారిలో అత్యధికంగా బైక్స్ నడిపే వారే ఉండటం గమనార్హం. బైక్స్ 92 కాగా, కార్లు 39, ఆటోలు 5, ఒక భారీ వాహనం ఉన్నాయి.

ఆల్కహాల్ స్థాయిలు (BAC)

తనిఖీల్లో పట్టుబడిన వారిలో ఆల్కహాల్ స్థాయిలు షాకింగ్‌గా ఉన్నాయి. 13 మందిలో బ్లడ్‌ ఆల్కహాల్‌ కాన్సన్ట్రేషన్ (BAC) 301 ఎంజీ నుంచి 550 ఎంజీ వరకు నమోదైంది. మరో 16 మందిలో 201-300 ఎంజీ మధ్య, 108 మందిలో 35-200 ఎంజీ మధ్య రీడింగ్ వచ్చినట్లు పోలీసులు తెలిపారు. వీరందరినీ త్వరలోనే కోర్టులో హాజరుపరచనున్నారు.

కొత్త చట్టం.. కఠిన శిక్షలు

మద్యం మత్తులో వాహనం నడిపి ఎవరికైనా ప్రాణహాని కలిగిస్తే, భారతీయ న్యాయ సంహిత (BNS) – 2023లోని సెక్షన్ 105 ప్రకారం కేసు నమోదు చేస్తామని పోలీసులు హెచ్చరించారు. ఈ సెక్షన్ కింద నేరం రుజువైతే గరిష్టంగా 10 ఏళ్ల జైలు శిక్షతో పాటు భారీ జరిమానా విధిస్తారు.

గత వారం తీర్పులు

జనవరి 5 నుండి జనవరి 9 వరకు జరిగిన డ్రంక్ అండ్ డ్రైవ్ కేసులకు సంబంధించి కోర్టులు మొత్తం 929 కేసులను పరిష్కరించాయి. ఇందులో 23 మందికి జైలు శిక్ష, 33 మందికి సామాజిక సేవ (Social Service), 873 మందికి జరిమానా విధించారని పోలీసులు తెలిపారు.