Hyderabad Service Apartments Police Warning | మీ సర్వీస్ అపార్ట్‌మెంట్‌లో ఇవి జరిగితే ఇల్లు సీజ్ చేస్తాం: సైబరాబాద్ పోలీసుల తీవ్ర హెచ్చరిక

Hyderabad Service Apartments Police Warning | త్రినేత్ర న్యూస్ : హైదరాబాద్‌లోని ఐటీ కారిడార్ పరిధిలో ఉన్న సర్వీస్ అపార్ట్‌మెంట్లపై సైబరాబాద్ పోలీసులు నిఘా కట్టుదిట్టం చేశారు. నివాసాల ముసుగులో పేకాట, వ్యభిచారం వంటి అసాంఘిక కార్యకలాపాలు నిర్వహిస్తే చూస్తూ ఊరుకునేది లేదని, అవసరమైతే ఆయా ప్రాపర్టీలను నేరుగా సీజ్ చేయిస్తామని ప్రాపర్టీ ఓనర్లకు పోలీసులు స్పష్టమైన హెచ్చరికలు జారీ చేశారు.

ఇటీవల మాదాపూర్ పరిధిలో రెండు గ్యాంబ్లింగ్ (పేకాట), ఒక వ్యభిచారం కేసుకు సంబంధించి మొత్తం మూడు ఎఫ్‌ఐఆర్‌లు నమోదు కావడంతో పోలీసులు ఈ కఠిన నిర్ణయం తీసుకున్నారు.

అయ్యప్ప సొసైటీలో రైడ్.. బట్టబయలైన వ్యవహారం

సెప్టెంబర్ 27న అయ్యప్ప సొసైటీలోని 'వైట్ కాజిల్ సర్వీస్ అపార్ట్‌మెంట్స్'పై మాదాపూర్ పోలీసులు, కూకట్‌పల్లి ఎస్‌వోటీ (SOT) బృందాలు సంయుక్తంగా దాడి చేశాయి. అక్కడ రోజువారీ అద్దె ప్రాతిపదికన ఫ్లాట్లు తీసుకుని వ్యభిచార రాకెట్ నడుపుతున్నట్లు గుర్తించారు. ఇతర ప్రాంతాల నుంచి మహిళలను రప్పించి కస్టమర్లను అక్కడికే పిలిపిస్తున్న ముఠా గుట్టు రట్టయింది.

ఈ నేపథ్యంలో మాదాపూర్ ఇన్‌స్పెక్టర్ కేవీ సుబ్బారావు మాట్లాడుతూ.. సర్వీస్ అపార్ట్‌మెంట్లన్నీ ప్రస్తుతం పోలీసుల రాడార్‌లో ఉన్నాయని తెలిపారు. అద్దెకు వచ్చేవారి బ్యాక్‌గ్రౌండ్ వెరిఫికేషన్ చేయకుండా ఇస్తే, యజమానులపై కూడా కేసులు పెట్టి రెవెన్యూ అధికారులతో ఆస్తులను సీజ్ చేయిస్తామని హెచ్చరించారు.

ఓనర్లకు రిస్క్.. సీపీ వార్నింగ్

"చట్టవిరుద్ధ కార్యకలాపాలు జరిగే ఇళ్లను, ప్రాపర్టీలను సీజ్ చేయించే అధికారం మాకుంది. ఇది యజమానులకు చాలా పెద్ద రిస్క్" అని సైబరాబాద్ పోలీస్ కమిషనర్ ఎం. రమేష్ రెడ్డి స్పష్టం చేశారు. చాలామంది ఓనర్లు ఇలాంటి పనులను నేరుగా ప్రోత్సహించకపోయినా, అజాగ్రత్త వల్ల చిక్కుల్లో పడుతున్నారని, అందుకే ముందుగానే నియమ నిబంధనలపై అవగాహన కల్పిస్తున్నామని పేర్కొన్నారు.

ఎన్నారై యజమానులే టార్గెట్?

కూకట్‌పల్లి డీసీపీ రీతిరాజ్ మాట్లాడుతూ.. సర్వీస్ అపార్ట్‌మెంట్లలో అనైతిక కార్యకలాపాల నిరోధక చట్టం (PITA) కింద కేసులు నమోదవుతున్నాయని వివరించారు. ముఖ్యంగా చాలామంది ఓనర్లు విదేశాల్లో లేదా ఇతర నగరాల్లో ఉంటూ, ప్రాపర్టీలను బ్రోకర్లకు లేదా థర్డ్ పార్టీ ఏజెంట్లకు అప్పగిస్తున్నారు. కొందరు బ్రోకర్లు ఎక్కువ కమీషన్ల ఆశతో చట్టవిరుద్ధ పనులని తెలిసీ రోజువారీ అద్దెలకు ఇచ్చేస్తున్నారని గుర్తించారు.

ఓనర్లు తప్పనిసరిగా పాటించాల్సిన రూల్స్

Stay Purpose: అద్దెకు వచ్చేవారు నగరంలో ఎందుకు ఉంటున్నారు, ఎక్కడి నుంచి వచ్చారు అనే విషయాన్ని ఖచ్చితంగా రాతపూర్వకంగా (Written Statement) తీసుకోవాలి.

ID వెరిఫికేషన్: ఆధార్ లేదా ఇతర ప్రభుత్వ గుర్తింపు కార్డులు తీసుకుని పూర్తి వివరాలు నమోదు చేయాలి.

గెస్టుల సంఖ్య: ఫ్లాట్‌లో ఎంతమంది బస చేస్తున్నారు అనేది ముందే రిజిస్టర్‌లో నమోదు చేసుకోవాలి.

ముందుజాగ్రత్తగా ఈ వివరాలన్నీ సేకరించి పెట్టుకుంటే, భవిష్యత్తులో అద్దెదారులు ఏదైనా తప్పు చేసినా.. తమకేం సంబంధం లేదని నిరూపించుకోవడానికి యజమానులకు రక్షణగా ఉంటుందని పోలీసులు స్పష్టం చేశారు.