Cantonment Land Scam | కంటోన్మెంట్‌లో రూ.800 కోట్ల ల్యాండ్ స్కామ్.. అందులో కాంగ్రెస్ ఎమ్మెల్యేకు రూ.5 కోట్లు

Cantonment Land Scam | త్రినేత్ర.న్యూస్ : కంటోన్మెంట్ పరిధిలో ఓ భారీ ల్యాండ్ స్కామ్ (Land Scam) వ్యవహారం స్థానికంగా కలకలం రేపుతోంది. బోయిన్‌పల్లి సర్వే నెం.157/1లో ఉన్న సుమారు రూ.800 కోట్ల విలువైన 8 ఎకరాల ప్రభుత్వ భూమిని కబ్జాదారుల నుంచి రక్షించాలని డిమాండ్ చేస్తూ.. బీఆర్ఎస్ (BRS) నాయకులు గురువారం ఎమ్మార్వో (MRO) ఆఫీస్‌ను ముట్టడించారు. ఆ స్థలంలో పేదల కోసం 6 వేల ఇందిరమ్మ ఇళ్లు నిర్మించాలంటూ పెద్ద ఎత్తున ఆందోళనకు దిగారు.

ఈ సందర్భంగా బీఆర్ఎస్ మెంబర్‌షిప్ ఇన్‌చార్జ్ డాక్టర్ మన్నె క్రిశాంక్ మాట్లాడుతూ కాంగ్రెస్ ప్రభుత్వంపై సంచలన ఆరోపణలు చేశారు. దశాబ్దాలుగా రికార్డుల్లో ప్రభుత్వ భూమిగానే ఉన్న ఆ 8 ఎకరాల ల్యాండ్‌ను.. ఇప్పుడు కబ్జాకోరులకు అప్పజెప్పే కుట్ర జరుగుతోందని మండిపడ్డారు. ఇదే స్థలంలో గతంలో 6,000 ఇందిరమ్మ ఇళ్లు నిర్మిస్తామని చెప్పిన కాంగ్రెస్ నాయకులు.. ఇప్పుడు సైలెంట్ అవ్వడం వెనుక పెద్ద స్కెచ్ ఉందన్నారు. ఈ ల్యాండ్ సెటిల్‌మెంట్‌లో కాంగ్రెస్ ఎమ్మెల్యేకు ఏకంగా రూ.5 కోట్లు ముట్టాయని ఆయన సంచలన వ్యాఖ్యలు చేశారు.

గతంలో ఎఫ్ఐఆర్.. ఇప్పుడు రాసిచ్చేస్తారా?

గత బీఆర్ఎస్ ప్రభుత్వ హయాంలో 2023 ఆగస్టు 19న కబ్జాదారులు ఈ భూమిలోకి ఎంట్రీ ఇచ్చినప్పుడు.. అప్పటి ఎమ్మార్వో ద్వారా పోలీస్ స్టేషన్‌లో ఎఫ్ఐఆర్ (FIR) నమోదు చేయించి మరీ ఆ ల్యాండ్‌ను కాపాడామని డా. క్రిశాంక్ గుర్తుచేశారు. కానీ, 2026లో ప్రస్తుత కాంగ్రెస్ ప్రభుత్వం ఆ ప్రభుత్వ భూమిని కబ్జాదారులకు రాసిచ్చే ప్రయత్నం చేయడం దారుణమన్నారు. భూములను రక్షించాల్సిన ప్రభుత్వమే వాటిని కబ్జాదారుల చేతుల్లో పెడుతోందని విమర్శించారు.

షాపింగ్ మాల్స్ కోసం కాదు.. పేదల ఇళ్ల కోసం

రూ.800 కోట్ల విలువైన ఆ భూమిని ప్రైవేట్ వ్యక్తుల షాపింగ్ మాల్స్ (Shopping Malls) కోసం కాకుండా, పేదల సొంతింటి కల నెరవేర్చేందుకు ఉపయోగించాలని బీఆర్ఎస్ నేతలు డిమాండ్ చేశారు. కాంగ్రెస్ ప్రభుత్వ అధికారులు చట్టపరంగా ఫైట్ చేసి ఆ స్థలాన్ని కాపాడాలని.. లేదంటే పబ్లిక్ మూవ్‌మెంట్‌ను (Public Movement) మరింత ఉద్ధృతం చేస్తామని హెచ్చరించారు.

ఈ ముట్టడి కార్యక్రమంలో డా. మన్నె క్రిశాంక్‌తో పాటు మాజీ కార్పొరేషన్ చైర్మన్ గజ్జల నగేష్, మాజీ కంటోన్మెంట్ బోర్డు సభ్యులు జక్కుల మహేశ్వర్ రెడ్డి, నివేదిత, అనిత, నళిని, కిరణ్, పాండు యాదవ్, శ్యామ్ కుమార్, టి.ఎన్. శ్రీనివాస్ తదితరులు పాల్గొన్నారు.