Ashwini Vaishnaw | హైదరాబాద్‌లో 3 బుల్లెట్ రైలు కారిడార్లు

Ashwini Vaishnaw | త్రినేత్ర.న్యూస్ : భారత ఐటీ రంగం భవిష్యత్తు కోసం కేంద్ర మంత్రి అశ్వినీ వైష్ణవ్ సరికొత్త రోడ్‌మ్యాప్‌ను ఆవిష్కరించారు. ఇప్పటివరకు సాఫ్ట్‌వేర్ సేవల (Software services) ఆధారిత మోడల్‌లో విజయాలు సాధించిన భారత ఐటీ పరిశ్రమ.. ఇకపై "ఏఐ యాజ్ ఏ సర్వీస్" (AI as a Service) నమూనా వైపు వేగంగా అడుగులు వేయాలని పిలుపునిచ్చారు. ప్రధాని మోదీ కన్న కల అయిన వికసిత్ భారత్-2047లో (Viksit Bharat-2047) ఆర్టిఫిషియల్ ఇంటెలిజెన్స్, సెమీకండక్టర్లు, ఎలక్ట్రానిక్స్ తయారీ రంగాలది కీలక పాత్ర అని, అందులో హైదరాబాద్‌ దే అగ్రస్థానం అని ఆయన స్పష్టం చేశారు. హైదరాబాద్ సాఫ్ట్‌వేర్ ఎంటర్‌ప్రైజెస్ అసోసియేషన్ (HYSEA) ఆధ్వర్యంలో జరిగిన ఇండస్ట్రీ లీడర్స్ టౌన్‌హాల్‌లో కేంద్ర మంత్రులు అశ్వినీ వైష్ణవ్, జి. కిషన్ రెడ్డి పాల్గొన్నారు.

ఐటీ ముఖచిత్రాన్ని మార్చేస్తున్న 'ఏఐ'

ప్రతీ కొత్త AI టెక్నాలజీ కొత్త అవకాశాలను తెస్తోందని అశ్వినీ వైష్ణవ్ అన్నారు. ప్రపంచవ్యాప్తంగా నైపుణ్యం కలిగిన మన యువత బలాన్ని వాడుకుని.. డిజైన్, ప్రొడక్ట్ డెవలప్‌మెంట్ రంగాల్లో వినూత్న సెమీకండక్టర్ పరిష్కారాలను తీసుకురావాలని పరిశ్రమలను ప్రోత్సహించారు. ఈ దిశగా విద్యార్థులకు అవగాహన కల్పించేందుకు నాస్కామ్ (NASSCOM), కేంద్రం సంయుక్తంగా ఒక ప్రత్యేక ఏఐ సిలబస్‌ను అభివృద్ధి చేసినట్లు వెల్లడించారు.

సెమీకండక్టర్ రంగంలో దూసుకుపోతున్న భారత్

ప్రస్తుతం దేశవ్యాప్తంగా 12 సెమీకండక్టర్ (Semiconductor) ప్లాంట్లు వివిధ దశల్లో ఉన్నాయని, వీటిలో మూడింటి నుంచి జపాన్, యూరప్‌కు చిప్స్ (Chips) ఎగుమతి అవుతున్నాయని మంత్రి తెలిపారు. ఎలక్ట్రానిక్స్ తయారీ రంగం కూడా అపూర్వమైన వృద్ధిని సాధిస్తోందని, త్వరలోనే దీని విలువ రూ.20 లక్షల కోట్లకు చేరుకుంటుందని అంచనా వేశారు. తెలంగాణలో 104 ఎలక్ట్రానిక్స్ కంపెనీల ఏర్పాటుకు కేంద్రం మద్దతునిచ్చిందని గుర్తుచేశారు.

హైదరాబాద్‌కు 3 బుల్లెట్ రైళ్లు

మౌలిక సదుపాయాల అభివృద్ధిలో భాగంగా హైదరాబాద్‌ను మెగా హబ్‌గా మార్చేలా మూడు బుల్లెట్ రైలు కారిడార్లకు (Bullet train corridors) కేంద్రం ప్లాన్ చేస్తోందని వైష్ణవ్ ప్రకటించారు. తెలంగాణలో రైల్వే అభివృద్ధి కోసం యూపీఏ హయాంలో ఏటా రూ.880 కోట్లు ఇస్తే.. ఇప్పుడు ఏకంగా రూ.5,400 కోట్లు కేటాయించామని తెలిపారు. అమృత్ భారత్ స్టేషన్ స్కీమ్ కింద రాష్ట్రంలో 40 స్టేషన్లను ఆధునికీకరిస్తున్నామన్నారు.

ఈ సందర్భంగా కేంద్ర మంత్రి కిషన్ రెడ్డి (Kishan Reddy) మాట్లాడుతూ.. ఐటీ, పారిశ్రామిక అభివృద్ధి కేవలం హైదరాబాద్‌కే పరిమితం కాకుండా వరంగల్, కరీంనగర్ వంటి ద్వితీయ శ్రేణి నగరాలకు కూడా విస్తరించాల్సిన అవసరం ఉందన్నారు. సికింద్రాబాద్, నాంపల్లి స్టేషన్ల ఆధునికీకరణ పనులు వేగంగా సాగుతున్నాయని తెలిపారు. అనంతరం మంత్రులిద్దరూ కొండకల్‌లోని మేధా బోగీస్ ఫ్యాక్టరీని సందర్శించి రైల్వే కోచ్‌ల తయారీ పనులను సమీక్షించారు.