Bhadrachalam Rama Controversy | భద్రాద్రి రాముడే కొట్టుకుపోతాడా?

• దేవుడిపై సీఎం రేవంత్ కామెంట్స్‌పై భగ్గుమన్న బీఆర్ఎస్
• సీఎంపై దాసోజు శ్రవణ్ ఫైర్

Bhadrachalam Rama Controversy | త్రినేత్ర.న్యూస్ : భద్రాచలం శ్రీరాముడిపై, మేడిగడ్డ బ్యారేజీ (Medigadda Barrage) భద్రతపై ముఖ్యమంత్రి రేవంత్ రెడ్డి చేసిన తాజా వ్యాఖ్యలు తెలంగాణ రాజకీయాల్లో తీవ్ర దుమారం రేపుతున్నాయి. ఖమ్మంలో జరిగిన రైతు సభలో సీఎం చేసిన కామెంట్స్‌పై బీఆర్ఎస్ ఎమ్మెల్సీ దాసోజు శ్రవణ్ శనివారం తీవ్ర స్థాయిలో మండిపడ్డారు. సీఎం కుర్చీ తాత్కాలికమని, రాముడు అజరామరుడు అని కౌంటర్ ఇస్తూ ఓ ఘాటైన ప్రెస్ నోట్ (Press Note) విడుదల చేశారు.

కుర్చీ భయంతోనే దేవుడిపై కామెంట్స్

రోమ్ నగరం తగలబడుతుంటే నీరో చక్రవర్తి ఫిడేల్ వాయించినట్లు.. తెలంగాణలో రైతులు కరువుతో అల్లాడుతుంటే సీఎం రేవంత్ రెడ్డి తుగ్లక్ పాలన సాగిస్తున్నారని శ్రవణ్ దుయ్యబట్టారు. కేవలం 80 వేల క్యూసెక్కుల వరదకే భద్రాచలం కొట్టుకుపోతుందని, రాముడే ఉండడంటూ సీఎం చేసిన వ్యాఖ్యలు హిందువుల మనోభావాలను తీవ్రంగా గాయపరిచాయన్నారు. 1986లో 36 లక్షల క్యూసెక్కుల వరద వచ్చినా, 2022లో 24 లక్షల క్యూసెక్కుల భీకర ప్రవాహం వచ్చినా చెక్కుచెదరని భద్రాద్రి.. ఇప్పుడు కొట్టుకుపోతుందా అని ప్రశ్నించారు. దేవుడిని అవమానించినందుకు సీఎం వెంటనే ముక్కునేలకు రాసి క్షమాపణ చెప్పాలని డిమాండ్ చేశారు.

ఢిల్లీ పెద్దలతో చీకటి ఒప్పందం ఉందా?

2028లో జరగాల్సిన అసెంబ్లీ ఎన్నికలు (Elections) 2029లో జరుగుతాయని, రాష్ట్రంలో అసెంబ్లీ సీట్లు 119 నుంచి 182కు పెరుగుతాయని సీఎం చెప్పడంపై శ్రవణ్ ఆశ్చర్యం వ్యక్తం చేశారు. కేంద్ర ఎలక్షన్ కమిషన్ (EC) ఏమైనా సీఎం జూబ్లీహిల్స్ ఇంట్లో నుంచి పనిచేస్తోందా అని ఎద్దేవా చేశారు. కాంగ్రెస్ అధిష్ఠానం డి-లిమిటేషన్‌ను (Delimitation) వ్యతిరేకిస్తుంటే, రేవంత్ రెడ్డి మాత్రం బీజేపీ పెద్దలైన మోదీ, అమిత్ షాలతో కుమ్మక్కై ఈ వ్యాఖ్యలు చేస్తున్నారని ఆరోపించారు. ఎప్పుడు ఎవరితో పదవి ఊడుతుందో తెలియని ఈ 'ఈఎంఐ సీఎం' (EMI CM) గెలిచేది లేదు, చేసేది లేదంటూ సెటైర్లు వేశారు.

రిపేర్లు చేతకాక.. ఆంధ్రాకు నీళ్లు

మేడిగడ్డ బ్యారేజీ నిర్వహణలో కాంగ్రెస్ ప్రభుత్వం ఘోరంగా విఫలమైందని బీఆర్ఎస్ నేత ఆరోపించారు. కేవలం రెండు పిల్లర్లు కుంగితే, వాటికి రిపేర్ (Repair) చేసే చేతకానితనంతో నాటకాలు ఆడుతున్నారని విమర్శించారు. బ్యారేజీ గేట్లు మూయకుండానే దేవాదుల ప్రాజెక్టు తరహాలో నీటిని లిఫ్ట్ (Lift) చేసే అవకాశం ఉన్నా ప్రభుత్వం పట్టించుకోవడం లేదన్నారు. తన రాజకీయ గురువు చంద్రబాబు నాయుడికి కృతజ్ఞతగా తెలంగాణ రైతుల నోట్లో మట్టికొడుతూ.. కన్నెపల్లి వద్ద పంపింగ్ చేయకుండా ఆంధ్రాకు నీటిని వదిలేస్తున్నారని దాసోజు శ్రవణ్ తీవ్ర ఆరోపణలు చేశారు.

రైతులను వంచిస్తూ, అబద్ధాలు ఆడుతున్న కాంగ్రెస్ ప్రభుత్వానికి ప్రజల కోర్టులో పరాభవం తప్పదని ఆయన హెచ్చరించారు.