Wamiqa Gabbi | హ‌నుమాన్ సీక్వెల్‌లో లోకేష్ క‌న‌గ‌రాజ్ హీరోయిన్ – ప‌ద‌కొండేళ్ల త‌ర్వాత తెలుగు సినిమాలో ఛాన్స్‌!

Wamiqa Gabbi |  లోకేష్ క‌న‌గ‌రాజ్ హీరోగా ఇటీవ‌ల రిలీజైన‌ డీసీ మూవీలో చంద్ర అనే పాత్ర‌లో క‌నిపించింది బాలీవుడ్ బ్యూటీ వామికా గ‌బ్బి. వేశ్య పాత్ర‌లో రా అండ్ ర‌స్టిక్ యాక్టింగ్‌తో అభిమానుల‌ను మెప్పించింది. వేశ్య అన‌గానే బోల్డ్‌గా, గ్లామ‌ర‌స్‌గా చూపించ‌డం కాకుండా రెబెల్ అటిట్యూడ్ ఉన్న అమ్మాయిగా కొత్త కోణంలో డైరెక్ట‌ర్ అరుణ్ మాథేశ్వ‌ర‌న్ వామికా గ‌బ్బి పాత్ర‌ను తీర్చిదిద్దారు. డీసీలో త‌న న‌ట‌న‌తో లోకేష్ క‌న‌గ‌రాజ్‌ను డామినేట్ చేసింది వామికా. డీసీతో లాంగ్ గ్యాప్ త‌ర్వాత ద‌క్షిణాదిలో బిగ్గెస్ట్ స‌క్సెస్‌ను ద‌క్కించుకుంది.

హ‌నుమాన్ సీక్వెల్‌...

డీసీ స‌క్సెస్‌ను ఎంజాయ్ చేస్తోన్న ఈ బ్యూటీ తాజాగా తెలుగులో ఓ మైథాల‌జీ మూవీలో ఛాన్స్ ద‌క్కించుకున్న‌ట్లు స‌మాచారం. ఈ సినిమాతో దాదాపు ప‌ద‌కొండేళ్ల త‌ర్వాత టాలీవుడ్‌లోకి పున‌రాగ‌మ‌నం చేయ‌బోతుంది. తేజా స‌జ్జా హీరోగా ప్ర‌శాంత్ వ‌ర్మ డైరెక్ష‌న్‌లో రూపొందిన బ్లాక్‌బ‌స్ట‌ర్ మూవీ హ‌నుమాన్ కు సీక్వెల్ రాబోతుంది. జై హ‌నుమాన్ పేరుతో తెర‌కెక్కుతోన్న ఈ సీక్వెల్‌లో కాంతార ఫేమ్ రిష‌బ్ శెట్టి హీరోగా న‌టిస్తున్నాడు. రానా ద‌గ్గుబాటి ఓ కీల‌క పాత్ర‌లో క‌నిపించ‌బోతున్నాడు.

వార‌ధిగా...

ఈ బ్లాక్‌బ‌స్ట‌ర్ సీక్వెల్‌లో వామికా గ‌బ్బి భాగం కానున్న‌ట్లు స‌మాచారం. ఓ కీల‌క పాత్ర కోసం ఈ బాలీవుడ్ బ్యూటీని మేక‌ర్స్ క‌న్ఫామ్ చేశార‌ట‌. రాముడికి, హ‌నుమంతుడికి మ‌ధ్య వార‌ధిగా వామికా గ‌బ్బి క్యారెక్ట‌ర్ సాగుతుంద‌ని అంటున్నారు. డీసీలో వామికా గ‌బ్బి న‌ట‌న‌కు ఇంప్రెస్ అయిన ప్ర‌శాంత్ వ‌ర్మ జై హ‌నుమాన్‌లో కీల‌క పాత్ర కోసం వామికా గ‌బ్బిని అప్రోచ్ అయిన‌ట్లు స‌మాచారం.

200 కోట్ల బ‌డ్జెట్‌...

ఈ సీక్వెల్‌లో రిష‌బ్ శెట్టి హ‌నుమంతుడి పాత్ర‌లో క‌నిపించ‌బోతుండ‌గా...అశ్వ‌త్థామ పాత్ర‌ను రానా ద‌గ్గుబాటి పోషిస్తున్నారు. హ‌నుమాన్ సీక్వెల్ దాదాపు 200 కోట్ల బ‌డ్జెట్‌తో రూపొందుతోంది. మైత్రీ మూవీ మేక‌ర్స్ సంస్థ ఈ సినిమాను నిర్మిస్తుంది. వ‌చ్చే ఏడాది ద్వితీయార్థంలో ఈ సినిమా థియేట‌ర్ల‌లోకి రాబోతుంది. జై హ‌నుమాన్ కాకుండా మ‌రో ఏడు సినిమాల‌ను అంగీక‌రించింది వామికా గ‌బ్బి. హిందీ, త‌మిళం, మ‌ల‌యాళంతో పాటు పంజాబీ భాష‌ల్లో సినిమాలు చేస్తోంది. తెలుగులో 2015లో వ‌చ్చిన భ‌లే మంచి రోజులో వామికా గ‌బ్బి హీరోయిన్‌గా న‌టించింది. ప‌ద‌కొండేళ్ల త‌ర్వాత జై హ‌నుమాన్‌తో టాలీవుడ్‌లోకి రీఎంట్రీ ఇవ్వ‌బోతుంది. జై హ‌నుమాన్‌తో పాటు అడివి శేష్‌తో గూఢ‌చారి 2లో న‌టిస్తోంది.