Ranabaali Trailer | కోటి మంది ఆకలి చావుల వేదన నుంచి పుట్టిన కథే ‘రణబాలి’

• "నా కెరీర్‌లోనే బిగ్గెస్ట్ హైలైట్.. దాచిన చరిత్రను వెలికితీస్తున్నాం"
• 'రణబాలి' ఈవెంట్‌లో విజయ్ దేవరకొండ

Ranabaali Trailer | త్రినేత్ర న్యూస్ : రౌడీ స్టార్ విజయ్ దేవరకొండ, నేషనల్ క్రష్ రశ్మిక మందన్న జంటగా నటించిన భారీ పాన్-ఇండియా చిత్రం "రణబాలి". రాహుల్ సంకృత్యన్ దర్శకత్వంలో మైత్రీ మూవీ మేకర్స్, టీ-సిరీస్ సంయుక్తంగా అత్యంత భారీ బడ్జెట్‌తో నిర్మించిన ఈ చిత్ర ట్రైలర్ లాంచ్ ఈవెంట్ గురువారం హైదరాబాద్‌లో ఘనంగా జరిగింది. దసరా కానుకగా అక్టోబర్ 16న సినిమా ప్రపంచవ్యాప్తంగా విడుదల కానున్న నేపథ్యంలో చిత్ర బృందం మీడియాతో ఆసక్తికర విశేషాలను పంచుకుంది.

ఈ కార్యక్రమంలో హీరో విజయ్ దేవరకొండ మాట్లాడుతూ.. "పాఠ్యపుస్తకాల్లో మనకు తెలియకుండా దాచేసిన ఒక వీరుడి చరిత్రను, జానపదాల్లో మాత్రమే మిగిలిపోయిన గాథను సరిదిద్దే ప్రయత్నమే 'రణబాలి'. మన పూర్వీకులు ఎలాంటి పరిస్థితులను దాటుకుని వచ్చారో, మన రక్తంలో ఎలాంటి డీఎన్ఏ ఉందో తెలుసుకోవడానికి ప్రతి ఒక్కరూ ఈ సినిమాను చూడాలి. నా కెరీర్‌లోనే ఈ చిత్రం పెద్ద మైలురాయిగా నిలిచిపోతుంది" అని పేర్కొన్నారు. తనపై సోషల్ మీడియాలో వచ్చే ట్రోలింగ్స్ గురించి ప్రస్తావిస్తూ.. "నా శ్రమ వాళ్లకు అహంకారంగా అనిపిస్తే నేను తగ్గాలా? నా పని నేను చేసుకుంటూ ముందుకు వెళ్తాను, వెనక్కి లాగే వాళ్లే తమ జీవితాలను సరిదిద్దుకోవాలి" అంటూ ఘాటుగా సమాధానమిచ్చారు.

ఈ పాత్రకు విజయ్ దేవరకొండ పెట్టిన ఎఫర్ట్స్ అసాధారణం: రాహుల్ సంకృత్యన్

దర్శకుడు రాహుల్ సంకృత్యన్ సినిమా నేపథ్యాన్ని వివరిస్తూ తీవ్ర భావోద్వేగానికి లోనయ్యారు. "రాయలసీమ నేపథ్యంలోని ఓ బుర్రకథ విన్నప్పుడు ఈ కథపై ఆసక్తి మొదలైంది. చరిత్రను పరిశోధిస్తున్న క్రమంలో ‘ది గ్రేట్ సౌత్ ఇండియన్ మద్రాస్ ఫామైన్’ గురించి తెలిసింది. కేవలం రెండేళ్లలో మన ప్రాంతంలో కోటి మంది ప్రజలు ఆకలితో అలమటించి చనిపోయారన్న వాస్తవం నన్ను తీవ్రంగా కలచివేసింది. ఆ బాధ, ఆక్రోశం నుంచే ఈ కథ పుట్టింది. నాలుగేళ్ల పాటు రీసెర్చ్ చేసి, అత్యంత సహజంగా ‘రణబాలి’ని రూపొందించాం. ఈ పాత్రకు విజయ్ దేవరకొండ పెట్టిన ఎఫర్ట్స్ అసాధారణం" అని రాహుల్ వివరించారు.

విజయ్ విశ్వరూపం చూస్తారు: మైత్రీ నిర్మాతలు

నిర్మాతలు నవీన్ యెర్నేని, వై. రవిశంకర్ మాట్లాడుతూ.. "రణబాలి కథ విన్న వెంటనే మేము చాలా ఎగ్జైట్ అయ్యాం. విజయ్ రశ్మిక వివాహం తర్వాత జంటగా మా బ్యానర్‌లో నటిస్తుండటం ఎంతో సంతోషాన్నిస్తోంది. విజయ్ గుర్రపు స్వారీ నేర్చుకోవడంతో పాటు రాయలసీమ యాసలో అద్భుతమైన నటన కనబరిచారు. రశ్మిక జయమ్మ పాత్రలో ప్రేక్షకులను మెప్పిస్తుంది. కొందరు కావాలనే సినిమాపై విషం చిమ్ముతున్నారు. ఇలాంటి నెగిటివిటీని పట్టించుకోవాల్సిన పనిలేదు. అక్టోబర్ 16న థియేటర్లలో ప్రేక్షకులకు ఒక సరికొత్త సినిమాటిక్ ఎక్స్‌పీరియన్స్ దక్కబోతోంది" అని ధీమా వ్యక్తం చేశారు.