Ranabaali | ర‌ణ‌బాలి ట్రైల‌ర్ ముహూర్తం ఫిక్‌.. 3.47 నిమిషాల నిడివితో..!

Ranabaali | విజయ్‌ దేవరకొండ, రష్మిక మందన్న జంటగా నటిస్తున్న తాజా చిత్రం రణబాలి. టాక్సీవాలా, శ్యామ్‌ సింగరాయ్‌ చిత్రాలతో తనదైన ముద్ర వేసుకున్న రాహుల్‌ సంకృత్యాన్‌ ఈ సినిమాకు దర్శకత్వం వహిస్తున్నారు. పీరియడ్‌ యాక్షన్‌ డ్రామాగా తెరకెక్కుతున్న ఈ చిత్రాన్ని మైత్రీ మూవీ మేకర్స్‌ భారీ స్థాయిలో నిర్మిస్తోంది. అక్టోబర్‌ 16న ఈ సినిమా ప్రపంచవ్యాప్తంగా థియేటర్లలో విడుదల కానుంది.

విడుదలకు సమయం దగ్గరపడుతున్న నేపథ్యంలో చిత్ర బృందం ప్రమోషన్స్‌లో వేగం పెంచింది. ఇందులో భాగంగా ‘రణబాలి’ ట్రైలర్‌ను రేపు సాయంత్రం 6.03 గంటలకు విడుదల చేయనున్నట్లు ప్రకటించింది. ట్రైలర్‌ నిడివి 3 నిమిషాల 47 సెకన్లు ఉండనుంది. భారీ విజువల్స్‌, యాక్షన్‌ సన్నివేశాలతో రూపొందిన ఈ ట్రైలర్‌ సినిమాపై అంచనాలను మరింత పెంచేలా ఉంటుందని చిత్ర వర్గాలు చెబుతున్నాయి.

ఇక ‘రణబాలి’లో ‘ది మమ్మీ’ ఫేమ్‌ ఆర్నాల్డ్‌ వోస్లూ కీలక పాత్రలో నటించడం ప్రత్యేక ఆకర్షణగా నిలుస్తోంది. పాన్‌ ఇండియా స్థాయిలో రూపొందుతున్న ఈ చిత్రానికి అజయ్‌–అతుల్‌ సంగీతం అందిస్తున్నారు. ఇప్పటికే విడుదలైన ప్రచార కంటెంట్‌తో ఆసక్తిని పెంచుకున్న ఈ సినిమా.. ట్రైలర్‌తో మరింత హైప్‌ తెచ్చుకుంటుందనే అంచనాలు ఉన్నాయి. ట్రైలర్‌ ఎలా ఉండబోతోందనే ఆసక్తితో విజయ్‌ దేవరకొండ అభిమానులు ఎదురుచూస్తున్నారు.