Bollywood | నాలుగు వంద‌ల కోట్లు న‌ష్ట‌ప‌రిహారం ఇవ్వాల్సిందే – మృణాల్ ఠాకూర్ బాలీవుడ్ మూవీపై హైకోర్టులో కేసు

Bollywood |  వ‌రుణ్ ధావ‌న్‌, మృణాల్ ఠాకూర్‌, పూజా హెగ్డే హీరోహీరోయిన్లుగా న‌టించిన బాలీవుడ్ మూవీ హై జ‌వానీతో ఇష్క్ హోనా హై రిలీజ్ కావ‌డం అనుమానంగా మారింది. డైరెక్ట‌ర్ డేవిడ్ ధావ‌న్‌, నిర్మాత వ‌షు భ‌గ్నానీ మ‌ధ్య విభేదాల కార‌ణంగా జూన్ 5న రిలీజ్ కావాల్సిన ఈ సినిమా వాయిదాప‌డ‌టం ఖాయంగానే క‌నిపిస్తోంది. తాను నిర్మించిన బీవీ నంబ‌ర్ వ‌న్ సినిమాలోని పాట‌ల‌ను అనుమ‌తి లేకుండా వాడుకున్నారంటూ హై జ‌వానీతో ఇష్క్ హోనా హై ద‌ర్శ‌క‌నిర్మాత‌ల‌పై నిర్మాత వ‌షు భ‌గ్నానీ ముంబై హైకోర్టును ఆశ్ర‌యించారు. నాలుగు వంద‌ల కోట్లు న‌ష్ట‌ప‌రిహారం చెల్లించాలంటూ త‌న పిటిష‌న్‌లో పేర్కొన్నారు.

రీమిక్స్ చేశారు...

బీవీ నంబ‌ర్ వ‌న్ సినిమాలోని ఇష్క్ సోనా హై పాట‌లోని లిరిక్స్ ఆధారంగా ఈ సినిమాకు టైటిల్‌ను ఫిక్స్ చేశార‌ని , ఆ టైటిల్ మార్చాల‌ని వ‌షు భ‌గ్నానీ ఆరోపించారు. చున‌రీ చున‌రీతో పాటు ఇష్క్ సోనా హై పాట‌ల‌ను ప‌ర్మిష‌న్ లేకుండా హై జ‌వానీతో ఇష్క్ హోనా హై సినిమాలో రీమిక్స్ చేశార‌ని అన్నారు. ఈ పాట‌ల‌ను ఉప‌యోగించే అధికారం టిప్స్ సంస్థ‌తో పాటు డేవిడ్ ధావ‌న్‌కు లేద‌ని, కాపీ రైట్ చ‌ట్టాన్ని ఉల్లంఘించారంటూ వ‌షు భ‌గ్నానీ  పేర్కొన్నారు. ఈ సినిమా రిలీజ్‌ను ఆపేయ‌డ‌మే కాకుండా డిజిటిల్ రైట్స్ డీల్‌ను నిలిపివేయాల‌ని కోరారు. వ‌షు భ‌గ్నానీ కేసుతో హై జ‌వానీతో ఇష్క్ హోనా హై రిలీజ్ డైల‌మాలో ప‌డింది.

కూలీ నంబ‌ర్ వ‌న్ మూవీ...

మ‌రోవైపు వ‌షు భ‌గ్నానీ పిటిష‌న్‌తో సంబంధం లేకుండా మేక‌ర్స్ ప్ర‌మోష‌న్స్‌లో ఫుల్ బిజీగా ఉన్నారు. వ‌రుణ్ ధావ‌న్‌, పూజా హెగ్డే, మృణాల్ ఠాకూర్ ప‌లు ఈవెంట్స్‌కు అటెండ్ అవుతోన్నారు.
వ‌షు భ‌గ్నానీ నిర్మించిన బీవీ నంబ‌ర్ వ‌న్‌కు డేవిడ్ ధావ‌న్ ద‌ర్శ‌క‌త్వం వ‌హించాడు. ఒక‌ప్పుడు వీరి మ‌ధ్య సంబంధాలు బాగానే ఉండేవి. కానీ వ‌రుణ్ ధావ‌న్ హీరోగా వ‌షు భ‌గ్నానీ నిర్మాణంలో డేవిడ్ ధావ‌న్ తెర‌కెక్కించిన కూలీ నంబ‌ర్ వ‌న్ డిజాస్ట‌ర్‌గా నిలిచింది. నిర్మాత‌కు ఈ సినిమా 27 కోట్ల‌కుపైనే న‌ష్టాల‌ను మిగిల్చింది. ఈ డిజాస్ట‌ర్ వ‌ల్లే డేవిడ్ ధావ‌న్‌, వ‌షు భ‌గ్నానీ మ‌ధ్య విభేదాలు మొద‌ల‌య్యాయి.

రొమాంటిక్ ఎంట‌ర్‌టైన‌ర్‌గా...

ఇద్ద‌రు అమ్మాయిల‌తో ప్రేమ‌లో ప‌డి వారిని పెళ్లి చేసుకున్న ఓ యువ‌కుడి క‌థ‌తో రొమాంటిక్ ఎంట‌ర్‌టైన‌ర్‌గా హై జ‌వానీతో ఇష్క్ హోనా హై ప్రేక్ష‌కుల ముందుకు రాబోతుంది. ఈ సినిమా స‌క్సెస్‌పై వ‌రుణ్ ధావ‌న్‌, పూజా హెగ్డే భారీగా ఆశ‌లు పెట్టుకున్నారు.