Vaishnavi Chaitanya | టాలీవుడ్‌కు బ్రేక్ – కోలీవుడ్‌పై క‌న్నేసిన బేబీ హీరోయిన్ – రొమాంటిక్ జాన‌ర్‌లో డెబ్యూ మూవీ

Vaishnavi Chaitanya |  బేబీ సినిమాతో ఓవ‌ర్‌నైట్‌లోనే స్టార్‌గా మారిపోయింది వైష్ణ‌విచైత‌న్య‌(Vaishnavi Chaitanya). పాజిటివ్‌గా క‌నిపించే నెగెటివ్ పాత్ర‌లో ఈ ముద్దుగుమ్మ న‌ట‌న‌కు చిరంజీవి, అల్లు అర్జున్ లాంటి స్టార్లు సైతం ఫిదా అయ్యారు. టాలీవుడ్‌కు మంచి హీరోయిన్ దొరికిందంటూ ప్ర‌శంస‌లు కురిపించారు. బేబీ త‌ర్వాత డిఫ‌రెంట్ కాన్సెప్ట్‌ల‌తో ల‌వ్ మీ, జాక్ సినిమాలు చేసింది వైష్ణ‌వి చైత‌న్య‌. ఈ రెండు సినిమాలు బాక్సాఫీస్ వ‌ద్ద బోల్తా కొట్టాయి.

బోల్డ్ రోల్‌లో...

దాంతో త‌న పంథా మార్చి రొమాంటిక్ జాన‌ర్‌లో ఎపిక్ (Epic Movie) సినిమా చేసింది. ఇటీవ‌లే థియేట‌ర్ల‌లో రిలీజైన ఈ సినిమా కూడా వైష్ణ‌వి చైత‌న్య‌కు విజ‌యాన్ని తెచ్చిపెట్ట‌లేక‌పోయింది. ఈ డిజాస్ట‌ర్ల‌తో టాలీవుడ్‌లో వైష్ణ‌విచైత‌న్య జోరుకు బ్రేకులు ప‌డ్డాయి. ఎపిక్ త‌ర్వాత తెలుగులో కొత్త సినిమా ఏది అంగీక‌రించ‌లేదు. ఆఫ‌ర్లు త‌గ్గ‌డంతో కోలీవుడ్ బాట ప‌ట్టింది.

హ‌లో కాద‌ల్‌...

సైలెంట్‌గా ఓ సినిమా షూటింగ్ కూడా పూర్తిచేసింది. రొమాంటిక్ కామెడీగా తెర‌కెక్కుతోన్న ఈ సినిమాలో ఆర్య హీరోగా న‌టిస్తోన్నాడు. ఈ సినిమాకు హ‌లో కాద‌ల్ అనే టైటిల్‌ను ఖ‌రారు చేశారు. ఆర్య సినిమాతోనే కోలీవుడ్‌లోకి హీరోయిన్‌గా వైష్ణ‌వి చైత‌న్య ఎంట్రీ ఇస్తోంది. ఇందులో నిఖిలా విమ‌ల్ మ‌రో నాయిక‌గా క‌నిపించ‌బోతుంది.

మ‌ల‌యాళ డైరెక్ట‌ర్‌...

మ‌ల‌యాళ మూవీ ప్ర‌ణ‌య విలాసం ఫేమ్ నిఖిల్ ముర‌ళీ ద‌ర్శ‌క‌త్వం వ‌హిస్తున్న హ‌లో కాద‌ల్ మూవీ షూటింగ్ పూర్త‌య్యింది. మోడ్ర‌న్ అమ్మాయిగా బోల్డ్ రోల్‌లో వైష్ణ‌వి చైత‌న్య క‌నిపించ‌బోతున్న‌ట్లు స‌మాచారం. ఈ సినిమా కోసం త‌మిళం నేర్చుకున్న వైష్ణ‌విచైత‌న్య సొంతంగా డ‌బ్బింగ్ కూడా చెప్పిన‌ట్లు ప్ర‌చారం జ‌రుగుతోంది. డిసెంబ‌ర్‌లో ఈ అచ్చ తెలుగు బ్యూటీ త‌మిళ డెబ్యూ మూవీ ప్రేక్ష‌కుల ముందుకు రాబోతున్న‌ట్లు స‌మాచారం.

అఖిల్ హీరోయిన్‌....

హ‌లో కాద‌ల్ సినిమాను హీరో ఆర్య వైఫ్ స‌యేషా నిర్మించ‌బోతుంది. స‌యేషా ప్రొడ్యూస‌ర్‌గా వ్య‌వ‌హ‌రిస్తోన్న తొలి సినిమా ఇది. గ‌తంలో స‌యేషా అఖిల్ అక్కినేని డెబ్యూ మూవీ అఖిల్‌లో క‌థానాయిక‌గా క‌నిపించింది.